Són - 01.01.2015, Blaðsíða 115

HávAmál resens prófessors 113
[T]hese texts constitute a separate redaction of Hávamál, so different
from the received text that one might even think that the changes
are not just editorial and scribal, but indicate rather that this version
is not derived from the Codex Regius at all, but from another, now
lost, medieval version.
(Faulkes 1977:87–88)
Hins vegar bendir Faulkes á ákveðna lesháttu í textanum sem virðast
runnir frá Konungsbók. Þeir leshættir myndu þó ekki sanna að allur
textinn sé þaðan fenginn. Faulkes bendir því á þann möguleika að hluti
Resens-textans sé runninn frá einhverri miðaldagerð textans annarri en
þeirri sem við höfum í Konungsbók.3
Einar G. Pétursson rekur skoðanir Faulkes og bætir sjálfur við
nokkrum athugunum (Einar G. Pétursson 1998:430–433). Hann segir
málið „torvelt og þarfnast mikilla rannsókna“ (bls. 431). Í sama streng
tekur Vésteinn Ólason í inngangi að Eddukvæðaútgáfu þeirra Jónasar
Kristjánssonar:
Frekari rannsóknar er þörf til að fá staðfest hvort í þessum textum
og pappírshandritum sem þeir eru byggðir á kunni að vera áhrif frá
annarri miðaldagerð Hávamála en þeirri sem skráð er á Konungsbók.
(Jónas Kristjánsson og Vésteinn Ólason 2014:140)
Einn höfundur enn sem hvatt hefur til rannsókna á textum HÁVAMÁLA er
Þórður Tómasson í Skógum (1971). Þórður skrifaði grein um handrits-
brot HÁVAMÁLA með einkennilegum texta og er handrit hans greinilega
með texta skyldan útgáfu Resens. Ýmis fleiri handrit frá miðri 17. öld og
síðar hafa skyldan texta og hefur samband þeirra lítt verið kannað enda
væri það ærið verk (sjá þó Einar G. Pétursson 2007 og Teresu Dröfn
Njarðvík 2015). Í þessari atrennu læt ég hina prentuðu útgáfu duga sem
fulltrúa þessarar Hávamálagerðar.
3. Munnleg geymd og röð vísna
Meirihluti vísnanna í útgáfu Resens á sér beina samsvörun í Konungsbók
þótt orðalag sé gjarnan mismunandi. En einnig koma fyrir vísur þar
3 Lokakafli HÁVAMÁLA hjá Resen er titlaður Rúnakapítuli og hefst þar erindatala að
nýju. Þessi texti er greinilega fenginn úr Konungsbók og er tiltölulega lítið afbakaður
(Faulkes 1977:87); ég fjalla ekki meira um hann hér. Í Konungsbók hefst þessi hluti
HÁVAMÁLA með stórum upphafsstaf svo sem sérstakt kvæði væri.