Skagfirðingabók - 01.01.1966, Page 7
FORMÁLI
Sögufélag Skagfirðinga hóf útgáfustarf sitt árið 1939.
Á vegum þess hafa birzt tólf rit, öll hin nýtustu verk og sum ærið
umfangsmikil, svo sem Jarða- og búendatalið. Má með fullum
sanni segja, að félagið hafi orðið skagfirzkri fræðistarfsemi hin
mesta lyftistöng og öllum hlutaðeigendum til sóma.
Fremstu hvatamenn að stofnun Sögufélagsins voru þeir Jón Sig-
urðsson á Reynistað og séra Helgi sálugi Konráðsson. Þeir fengu
til liðs við sig marga ágætismenn, og ber að þakka þeim öllum, sem
staðið hafa vörð um félagið og lagt fram sinn skerf til rita þess,
annaðhvort sem höfundar eða aðstoðarmenn við útgáfustörf. En
vonandi er á engan hallað, þótt Jóns á Reynistað sé getið hér sér-
staklega sem helzta frömuðar skagfirzkrar fræðistarfsemi nú um
sinn. Hann hefur ekki aðeins borið hag skagfirzkra fræða fyrir
brjósti, örvað menn til rannsókna og ritstarfa á þeim vettvangi og
rutt Sögufélaginu braut, heldur kannað ýmis skagfirzk fræðiefni
manna mest sjálfur; einkum er mikilvægur þáttur hans í Jarða- og
búendatalinu og Skagfirzkum æviskrám. Einnig á hann ómældan
hlut í vexti Héraðsskjalasafns Skagfirðinga, sem orðið er nú þegar
höfuðmiðstöð skagfirzkra fræðiiðkana heima fyrir. Hann var og
frumkvöðull að stofnun hins gagnmerka byggðasafns í Glaumbæ
og hefur æ síðan unnið að eflingu þess og heill. Fyrir öll ofan-
greind störf vill ritstjórn þessarar árbókar flytja honum þakkir
fyrir munn fjöldamargra, og hún ber fram þá ósk, að merki hans
verði á loft haldið af þeim, sem á eftir koma.
5