Tímarit hjúkrunarfræðinga - 01.02.2013, Page 36

Tímarit hjúkrunarfræðinga – 1. tbl. 89. árg. 201332
HJÚKRUNARMÓTTAKA FYRIR KRANSÆÐASJÚKLINGA
Christer Magnusson, christer@hjukrun.is
Í júní 2012 lokaði Landspítali göngudeild kransæðasjúklinga en það var
hjúkrunarmóttaka fyrir þá sem hafa gengist undir kransæðavíkkun á hjartadeild.
Hjúkrunarfræðingunum á hjartadeildinni fannst það ótækt og tveir þeirra ákváðu
að opna einkarekna móttöku.
Tveir hjúkrunarfræðingar, Hildur Rut
Albertsdóttir og Sólveig Helga Ákadóttir,
tóku í ágúst sl. á móti fyrsta sjúklingnum
á móttöku fyrir kransæðasjúklinga í
Læknasetrinu í Mjódd. Þetta bar brátt
að og ekki var mikill tími til undirbúnings.
„Boltinn fór bara að rúlla,“ segir Sólveig
Helga. Þær fóru af stað án þess að hafa
hugsað mikið um rekstur, skattamál og
þess háttar. „Við ákváðum bara að láta
slag standa og halda áfram með þessa
starfsemi á nýjum stað. Við höfum svo
verið að læra um rekstur á meðan við
sinnum sjúklingum,“ segir Hildur Rut.
Hildur Rut og Sólveig Helga útskrifuðust
báðar frá hjúkrunarfræðideild Háskóla
Íslands 2007 og skrifuðu saman loka-
verkefni um reynslu karlmanna sem hafa
lent í hjartastoppi. Þær vinna báðar
á hjartadeild Landspítalans og hafa
á nokkrum árum eftir útskrift náð að
ljúka framhaldsnámi. Hildur Rut er með
meistarapróf í hjúkrun og Sólveig Helga
með diplóma í lýðheilsuvísindum. Hildur
Rut er að auki formaður fagdeildar
hjartahjúkrunarfræðinga.