Gerðir kirkjuþings - 01.01.2011, Page 22

22

Ágæta samkoma.
Fyrir þremur vikum kom út gagnmerk ævisaga Þórhalls Bjarnarsonar biskups,
Brautryðjandinn eftir Óskar Guðmundsson rithöfund. Þar kemur fram að þennan
merka og frjálslynda forystumann þjóðkirkjunnar, sem kom víða við sögu þjóðar og
kirkju og var biskup yfir Íslandi fyrir 100 árum, dreymdi stóra og fagra drauma, meðal
annars um sjálfstæða þjóðkirkju andspænis óbreyttri ríkiskirkju sem þá var og
fríkirkjuhugmyndum sem hingað bárust frá Vesturheimi. Hann dreymdi jafnvel um
aðskilnað ríkis og kirkju sem hann taldi þó ekki tímabæran og varð svo um síðir
afhuga. Hugsjónir Þórhalls biskups um sjálfstæða þjóðkirkju hafa jafnt og þétt verið
að fá á sig skýrari mynd í þroska og þróun kirkjunnar. Það er þjóðkirkjunni sífelld
nauðsyn að dreyma stóra og fagra drauma og leggja sig alla fram um að leita jafnan að
endurbótum í verklagi og boðun í því skyni að treysta og efla siðgæði og trúarlíf í
landinu. Um leið og ég hvet kirkjuþing til þess að taka af festu og framsýni á brýnum
álitaefnum í starfsumhverfi þjóðkirkjunnar, henni sjálfri og þjóðinni allri til heilla og
blessunar, minni ég á andlátsorð Þórhalls biskups hinn 15. desember 1916 og geri þau
að mínum við setningu þessa kirkjuþings: „Guð gefi góðu málefni sigur.“