Gerðir kirkjuþings - 01.01.2011, Qupperneq 36

36

Ávarp forseta kirkjuþings unga fólksins,
Jónínu Sifjar Eyþórsdóttur

Biskup, forseti og þingmenn!

Kirkjuþing unga fólksins 2011 þakkar biskupi, vígslubiskupum og forseta kirkjuþings
fyrir nærveru sína á kirkjuþingi unga fólksins. Það voru mikilvæg skilaboð til unga
fólksins sem sátu þingið að vita að yfirstjórn kirkjunnar láti sig málefni ungs fólks
varða.

Unnar hafa verið þrjár meginályktanir upp úr nefndarálitum sem samþykkt voru á
kirkjuþinginu, þær eru svohljóðandi:

Að þróa eigi starf fyrir ungmenni á framhaldsskólaaldri, þar sem staðreyndin er sú að
eftir að grunnskólaaldri lýkur, fjarlægjast ungmenni sem hafa verið í kristilegu starfi
til lengri tíma kirkjuna, þar sem lítið starf er í boði fyrir þennan aldur.

Að niðurskurður ríkisins á sóknargjöldum til íslensku þjóðkirkjunnar sé farinn að
vega þungt að barna- og unglingastarfi sem unnið er í kirkjum landsins.

Kirkjuþing unga fólksins fagnar því að verið sé að koma á fót nefnd sem hefur
hagsmuni æskulýðsstarfsins að leiðarljósi. Lagt er til að unga fólkið fái að minnsta
kosti 1/3 þeirra sæta sem eru í æskulýðsnefnd, samanber þingmál nr. 21 á kirkjuþingi
2011.

Sem forseti kirkjuþings unga fólksins bendi ég á að öll nefndarálit og greinagerðir
kirkjuþings unga fólksins verða aðgengileg þátttakendum kirkjuþings 2011 og mælist
ég til þess að þeir fulltrúar sem hér eru kynni sér það starf sem fram fór á þinginu
okkar og þá frábæru vinnu sem þar var unnin.