Gerðir kirkjuþings - 01.01.2017, Side 44

44 45
2. mál kirkjuþings 2017
Flutt af kirkjuráði
Skýrsla
um fjármál þjóðkirkjunnar
Fjárlög næsta árs og samanburður
Í skýrslu þessari er hefðbundið að fjalla fyrst um tekjur þjóðkirkjunnar í frumvarpi til
komandi fjárlaga og bera saman við gildandi fjárlög. Nú er hins vegar svo sem kunnugt er
uppi sú óvenjulega staða að frumvarp til fjárlaga næsta árs var lagt fram af ríkisstjórn sem
síðan féll og situr nú sem starfsstjórn. Þetta veldur auðvitað ákveðinni óvissu en eftir sem
áður er ljóst hverjar grunnforsendur þær eru sem gengið var út frá varðandi framreikning
á gildandi fjárlagaramma. Þar er miðað við þjóðhagsspá Hagstofu Íslands. Hún gerir ráð
fyrir að vísitala neysluverðs muni hækka milli áranna 2017 og 2018 um 2%. Það er því sú
grunnforsenda sem miðað er við varðandi verðlagsbreytingar fjárlaganna milli ára á öllum
rekstrartölum nema launum. Launavísitalan mælir þær breytingar en nú háttar svo til að
úrskurðir Kjararáðs eru að baki með umtalsverðum launabreytingum. Kjarasamningar
bhm félaga eru hins vegar lausir með viðeigandi óvissu um breytingar launakostnaðar
þeirra félaga. Hugsanlegri hækkun á honum skal hins vegar mætt með launabótum í
fjárheimildum þannig að hún á ekki að hafa áhrif á fjárhagslega stöðu kirkjunnar.
Taflan á næstu bls. sýnir fjárlagafrumvarp 2018 í samanburði við gildandi fjárlagaramma
og fjárvöntun til að kirkjujarðasamkomulagið sé uppfyllt og fylgt ákvæðum laga um
sóknargjöld o.fl. Gerð hefur verið krafa um að framlög komi á fjáraukalögum ársins vegna
þessa svo sem verið hefur síðustu tvö ár hvað varðar kirkjujarðasamkomulagið. Samtals
vantar 1.748,2 m.kr. til að staðið sé við gerða samninga af hálfu ríkisins og farið eftir
lögum um sóknargjöld o.fl. sem sundurliðast þannig: Til að kirkjujarðasamkomulagið sé
virt vantar 497,5 m.kr. á fjárlagaliðinn Biskup Íslands og höfuðkirkjur og 58,1 m.kr. á
fjárlagaliðinn Kristnisjóður. Til að fara eftir lögum um sóknargjöld o.fl. vantar 932,8 m.kr.
á fjárlagaliðinn Sóknargjöld, 113,3 m.kr. á fjárlagaliðinn Kirkjumálasjóður og 146,5 m.kr.
á fjárlagaliðinn Jöfnunarsjóður sókna. Í fjárlagafrumvarp til næsta árs vantar 1.667,6 m.kr.
í sama skyni og sú tala er á verðlagi gildandi fjárlaga og á þannig að hækka um 2% með
verðlagsbótum og verða 1.701 m.kr.