Morgunblaðið - 28.12.2019, Blaðsíða 33

MORGUNBLAÐIÐ TÍMAMÓT 29. 12. 2019 33
Kjaraviðræður í vor þóttu erfiðari en oft áður og töldu forvígismenn fjögurra verkalýðsfélaga
sig nauðbeygða til þess að boða til svonefndra „skæruverkfalla“ vegna kjaradeilunnar. Vakti
þar sérstaka athygli að stéttarfélagið Efling nýtti sér sérútbúinn „verkfallsbíl“ til þess að
hjálpa félagsmönnum sínum að kjósa um hin boðuðu verkföll. Ekki voru allir á eitt sáttir um
þetta tiltæki Eflingar, en Sólveig Anna Jónsdóttir, formaður félagsins, var hins vegar mjög
ánægð með þátttöku félagsmanna sinna, bæði í kosningunni og í verkföllunum sem fylgdu.
Kjaradeilum ársins lauk svo að mestu með gerð hinna svonefndu „lífskjarasamninga“.
Morgunblaðið/Hari
Kosið um verkföll í sérstökum bíl
Ísland tók þátt sem endranær í Söngvakeppni evrópskra sjónvarpsstöðva, Eurovision. Að
þessu sinni var framlag Íslands BDSM-pönkbandið Hatari, sem vakti athygli fyrir óvenjulega
sviðsframkomu og búninga. Fyrir keppnina skapaðist mikil umræða um þátttöku Íslands í
keppninni, sem að þessu sinni var haldin í Ísrael, og lögðu sumir hart að hljómsveitinni að
hætta við þátttöku í keppninni. Hatari komst í lokakeppnina, en náði ekki flugi í stigagjöf
dómnefnda, þrátt fyrir bjartar vonir. Þegar lokastaða Íslands var kynnt drógu meðlimir sveit-
arinnar upp dulur með fána Palestínumanna á, og voru ekki allir sáttir með uppátækið.
Morgunblaðið/Eggert
Hatari ekki allra í Eurovision
Mótmæli og verkföll settu mikinn svip á árið hérlendis, en skólaverkfallið 15. mars skar sig
þó úr að því leytinu til að þar var um að ræða samstillt átak nemenda í grunnskólum víðs-
vegar um heiminn. Hér á landi var gengið frá Hallgrímskirkju og niður að Austurvelli, þar sem
stjórnvöldum var tilkynnt að æska landsins vildi róttækar aðgerðir í loftslagsmálum þegar í
stað og að meiri fjármunum yrði varið til málaflokksins en áður. Þetta var í fjórða sinn sem
efnt var til loftslagsverkfalls á Íslandi, en þau voru innblásin af sambærilegum „verkföllum“
hinnar sænsku Gretu Thunberg.
Morgunblaðið/RAX
Verkfall vegna loftslagsins
Morgunblaðið/Árni Sæberg
Max-vélarnar kyrrsettar
Icelandair neyddist til þess að kyrrsetja allar Boeing 737 MAX-vélar sínar í aprílmánuði
eftir að tvö mannskæð flugslys erlendis með stuttu millibili leiddu í ljós alvarlegan galla
á hönnun vélarinnar. Þurfti félagið að fella niður um hundrað ferðir vegna kyrrsetning-
arinnar á tímabilinu frá 1. apríl til 15. júní, og enn var ekki ljóst í árslok hvenær vélarnar
gætu hafist til lofts á ný.
Ok-jökull var kvaddur formlega í ágústmánuði, en hann mun vera fyrstur íslenskra jökla til
þess að hverfa á tímum loftslagsbreytinga. Um hundrað manns sóttu athöfnina, þar sem
skjöldur var settur upp til minningar um jökulinn, með skilaboðum til framtíðarinnar. Lofts-
lagsvísindamenn frá Texas-ríki stóðu að viðburðinum, sem vakti heimsathygli á stöðu jökla á
Íslandi og víðar vegna loftslagsbreytinga. Telja vísindamenn að allir jöklar landsins geti farið
sömu leið og Ok-jökull á næstu 200 árum, verði þróun hitastigs á sama veg og hún er nú.
Morgunblaðið/RAX
Ok-jökull kvaddur með viðhöfn