Bændablaðið - 16.11.2017, Blaðsíða 10

10 Bændablaðið | Fimmtudagur 16. nóvember 2017
Stór og vegleg landbúnaðarsýning
verður haldin í Laugardalshöllinni
í Reykjavík á næsta ári dagana
12.–14. október. Ár og dagar
eru síðan áþekk sýning var
haldin í höfuðborginni en það er
fyrirtækið Ritsýn sf. sem heldur
utan um viðburðinn. Markmið
sýningarinnar er að kynna
íslenskan landbúnað og leiða
saman fyrirtæki og einstaklinga
sem starfa í atvinnugreininni.
Ólafur M. Jóhannesson hjá
Ritsýn er framkvæmdastjóri
„Íslensks landbúnaðar 2018“
en hann hefur haldið fjölmargar
sýningar í gegnum tíðina, meðal
annars Sjávarútvegssýninguna 2016
og síðast Stóreldhúsið 2017 þar sem
fagaðilar í veitingageiranum báru
saman bækur sínar. Ólafur hefur
metnaðarfullar áætlanir en hann
hefur á síðustu mánuðum rætt við
fjölda fyrirtækja og hagsmunaaðila
innan landbúnaðarins.
„Sýningin verður að uppistöðu
kynning á sölu- og þjónustuaðilum
landbúnaðargeirans en líka blanda
af fræðslu og fyrirlestrum um
greinina,“ segir Ólafur sem er
þessa dagana ásamt samstarfsfólki
sínu að hefja sölu á sýningarplássi
í Laugardalshöllinni, bæði inni
og á útisvæði. Að sögn Ólafs eru
viðtökurnar góðar og ekki við
öðru að búast en að sýningin verði
myndarleg.
„Markmið sýningarinnar er
meðal annars að kynna fjölbreytni
íslensks landbúnaðar og hreinleika
matvælaframleiðslunnar. Að kynna
fyrir bændum og öðrum gestum tæki
og tól til landbúnaðar og hvers kyns
rekstrarvörur og aðrar vörur sem til
þarf,“ segir Ólafur.
Öllum félagsmönnum BÍ boðið
á sýninguna
Landbúnaðarsýningin verður öllum
opin og gert er ráð fyrir að þúsundir
gesta láti sjá sig. „Við munum
senda prentaða boðsmiða til allra
félagsmanna Bændasamtakanna,
en við höfum gert samkomulag
við Bændablaðið um samstarf.
Sýnendur fá einnig frímiða svo þeir
geti boðið sínum viðskiptavinum
á staðinn. Þannig næst afar góð
markaðssetning beint til réttra
aðila innan landbúnaðarins.
Almenningi gefst einnig tækifæri
á að heimsækja sýninguna gegn
vægu gjaldi,“ segir Ólafur.
Sérhannað sýningarhúsnæði
Dagskrá sýningarinnar er í mótun
en fyrirlestradagskrá og aðrar
uppákomur verða kynntar þegar nær
dregur. Bændablaðið mun gefa út
sýningarblað og senda til allra bænda
landsins og annarra áskrifenda í
aðdraganda sýningarinnar.
Að sögn Ólafs er Laugar-
dalshöllin eina sérhannaða
sýningarhúsnæðið fyrir stærri
sýningar á Íslandi með þægilegu
aðgengi fyrir gesti. Áhugasamir
þátttakendur geta haft samband í
netfangið olafur@ritsyn.is eða í
síma 587-7826 eða Ingu í síma 898-
8022 eða netfangið inga@athygli.
is. /TB
Íslenskur landbúnaður 2018:
Landbúnaðarsýning verður haldin
í Laugardalshöllinni haustið 2018
Í kjölfar dómsuppkvaðningar
í Héraðsdómi Suðurlands 1.
nóvember 2016 (mál nr. S-17/2016),
þar sem ökumaður var sakfelldur
fyrir að hafa óskráðan eftirvagn
í eftirdragi á þjóðvegi, vöknuðu
spurningar um túlkun á 1. mgr.
63. gr. umferðarlaga nr. 50/1987.
Þar er m.a. kveðið á um
undanþágu frá skráningarskyldu fyrir
eftirvagna dráttarvéla og bifreiða,
sem gerðir eru fyrir meira en 750
kg að heildarþyngd, enda séu þeir
nær eingöngu notaðir utan opinberra
vega.
Bændasamtök Íslands hafa talið
þörf á nánari skýringu þess hluta
ákvæðisins er snýr að undanþágu
frá skráningarskyldu, þ.e. í hvaða
tilvikum eftirvagnar teljist nær
eingöngu notaðir utan opinberra
vega. Nánari útfærslu á ákvæðinu sé
hvorki að finna í lögskýringargögnum
né reglugerð. Af því tilefni sendu
samtökin fyrirspurn til samgöngu-
og sveitarstjórnarráðuneytisins
þann 24. febrúar sl. Var þess óskað
að ráðuneytið svaraði erindinu sem
fyrst ásamt leiðbeinandi afmörkun
eða nánari skilgreiningu á orðalaginu
„sem nær er eingöngu notaður utan
vega“. Svar við fyrirspurninni
barst skriflega þann 8. september
sl. en ráðuneytið hafði leitað til
Samgöngustofu eftir umsögn.
Aðeins ætlað vögnum utan vega
Í svari ráðuneytisins sagði að
með lögum nr. 130/2015 hafi
umferðarlögum verið breytt á þá
leið að í 2. mgr. 63. gr. væri ráðherra
veitt heimild til að setja reglugerð
og kveða þar á um undanþágu frá
skráningu ökutækis sem er ætlað til
aksturs utan almennrar umferðar.
Í athugasemdum með greinargerð
frumvarpsins segði að eftirvagn
bifreiða á beltum eða dráttarvélar
sem alfarið væri notaður utan
vega og ökutæki ætluð til aksturs
á afmörkuðum skilgreindum
svæðum og ekki til notkunar á
almennri umferð væru dæmi um
ökutæki sem falla myndu undir
ákvæðið. Þá væri ákvörðun um að
veita undanþágu frá skráningu í
verkahring Samgöngustofu. Ekki
væri vafamál að eftirvagnar sem
alfarið eru notaðir utan vega og ekki
í almennri umferð séu undanþegnir
skráningarskyldu samkvæmt
ákvæðinu.
Svokölluð „bændaleyfi“ gilda
ekki á opinberum vegum
Varðandi það hvað teldist „nær
eingöngu utan opinberra vega“ væri
rétt að hafa í huga að samkvæmt
frumvarpi til umferðarlaga
nr. 50/1987 er undanþága frá
skráningu ákveðin með hliðsjón af
öryggissjónarmiðum.
Í greinargerð með frumvarpi
því er varð að umferðarlögum
kæmi fram að undanþágan væri
hugsuð til þess að ekki þurfi að
skrá ökutæki sem notuð eru á
afmörkuðu vinnusvæði. Ráðuneytið
tæki undir með Samgöngustofu sem
segði í umsögn sinni að svokölluð
„bændaleyfi“, þ.e. flutningur
bænda á heyi, áburði, jarðvegi o.fl.
innan eigin jarða og einnig stystu
leið milli landareigna sem þeir
nýti, séu skýrt dæmi um hvenær
ökutæki telst nær eingöngu notað
utan opinberra vega. Hins vegar
verði t.d. flutningur á vinnuvélum
og öðrum búnaði á óskráðum
eftirvögnum um langar vegalengdir
og jafnvel bæjarfélaga á milli á vegi
með öðrum skráningarskyldum
ökutækjum ekki talið til aksturs
nær utan opinberra vega, jafnvel
þó að eftirvagninn sé utan þess nær
eingöngu notaður utan opinberra
vega. Því skyldi skrá slíka vagna.
Að lokum kom fram að álitaefnin
í fyrirspurn samtakanna væru
meðal þess sem haft yrði í huga við
endurskoðun umferðarlaganna sem
nú standi yfir.
Samkvæmt ofangreindum
upplýsingum frá ráðuneytinu er því
nauðsynlegt að skrá eftirvagna sem
notaðir eru víðar en á afmörkuðum
vinnusvæðum. Heimilt er að fara
með óskráða vagna stutta vegalengd,
t.d. ef þvera þarf veg til að komast
milli afmarkaðra vinnusvæða. /GVS
Bændasamtök Íslands:
Undanþága frá skráningar-
skyldu eftirvagna
– Gildir einungis fyrir nýtingu vagna utan vega
Matarauður Íslands:
Nýr vefur um mat og matarhefðir
FRÉTTIR
ÍSLENSKUR
LANDBÚNAÐUR
2018
Landbúnaðarsýningin „Íslenskur landbúnaður 2018“ verður haldin í nýju Laugardalshöllinni 12.–14. október á
næsta ári. Sala sýningarpláss mun hefjast á næstu dögum. Mynd / ISH
Ólafur M. Jóhannesson framkvæmdastjóri segir að í uppsiglingu sé glæsileg
landbúnaðarsýning á besta stað sem mun styrkja ímynd íslensks land-
búnaðar. Mynd / TB
Á árum áður voru haldnar glæsilegar landbúnaðarsýningar í Laugardalshöllinni. Fræg er sýningin frá 1968 sem
var vel sótt af borgarbúum og bændum. Á næsta ári verða 50 ár frá þeirri sýningu. Mynd / Agnar Guðnason
Matarauður Íslands er verkefni
sem heyrir undir sjávarútvegs-
og landbúnaðarráðherra og
hefur það markmið að upphefja
íslenska matvælaframleiðslu
og ýta undir verðmætasköpun í
matarferðaþjónustu, vöruþróun
og ímyndaruppbyggingu. Nýlega
opnaði Matarauðurinn vefsíðuna
mataraudur.is þar sem finna má
fjölbreyttar upplýsingar um mat
og matarmenningu Íslendinga
fyrr og nú. Tilgangur síðunnar er
að vekja athygli á fjölbreytileika
og gæðum íslensks matar og þeim
ríkulegu hefðum sem við eigum.
„Verum þakklát fyrir gjöful mið og
fjölbreytilegar landbúnaðarafurðir.
Verum þakklát þeim Íslendingum
sem brauðfæða okkur og leggja
sig fram um að bjóða okkur upp á
hreinar afurðir úr faðmi íslenskrar
náttúru,“ segir í fréttatilkynningu frá
Matarauði Íslands.
Á vefsíðunni verða m.a.
upplýsingar um ýmsa matartengda
viðburði, s.s. matarsýningar,
hátíðir og ráðstefnur. Frumkvöðlar
í matvælaframleiðslu og öðrum
vöruflokkum fá sitt pláss á síðu
Matarauðsins en þar er hægt
að nálgast upplýsingar um
nýsköpunarfyrirtæki og nýjar
hugmyndir í matvælaframleiðslu.
„Matur er stór hluti af ímynd
þjóða og speglar náttúruna, söguna
og tíðarandann. Matarferðaþjónusta
er hratt vaxandi angi innan
ferðaþjónustunnar. Hjá flestum
okkur blundar þrá eftir því að tengja
það sem við látum ofan í okkur við
einhvern uppruna og merkingu. Að
sitja á veitingahúsi í Öræfasveit með
útsýni yfir stórfenglegan Vatnajökul
og drekka bjór sem bruggaður er
úr vatni jökulsins eða að snæða
ylvolgt hverabakað rúgbrauð með
taðreyktum silungi í Mývatnssveit
er dæmi um það hvernig hægt er að
tengja mat við landið og söguna,“
segir í tilkynningu frá Matarauði
Íslands.
Samhliða opnun vefsins var
glænýtt myndband sett í loftið þar
sem matvælaframleiðsla í sátt við
náttúruna er í brennidepli.
Á vefsíðunni mataraudur.is eru
fjölbreyttar upplýsingar um mat og
matarmenningu fyrr og nú.