Bændablaðið - 01.11.2018, Blaðsíða 4

Bændablaðið | Fimmtudagur 1. nóvember 20184
FRÉTTIR
Útflutningur á lambakjöti til Indlands og Kína:
Kjarnafæði stígur fyrsta skrefið
inn á Indlandsmarkað
– Gott verð er í boði fyrir íslenska framleiðandann
Opnað hefur verið fyrir útflutning
á lambakjöti til Indlands.
Matvæla stofnun hefur undanfarin
tvö ár unnið að því að afla leyfis
fyrir slíkum útflutningi frá Íslandi,
í samvinnu við SAH Afurðir,
Kjarnafæði og sendiráð Íslands
á Indlandi. Leyfið sem hefur
verið gefið út er til sex mánaða og
tekur til fimm tonna lambakjöts;
hluti þess er í heilum og hálfum
skrokkum en annað hlutað niður
og úrbeinað.
Leyfið sem nú hefur verið
veitt gildir fyrir sláturhús SAH
Afurðir á Blönduósi og kjötvinnslu
Kjarnafæðis, sem jafnframt er
útflutningsaðilinn. Fyrsta sendingin
fór til Indlands í byrjun október og
eru fleiri sendingar fyrirhugaðar á
næstu vikum.
Riða ekki greinst á fjórum
varnarsvæðum
Matvælastofnun greinir frá þessum
tíðindum á vef sínum á dögunum.
Þar segir enn fremur að ýmsar
sérkröfur séu gerðar og skilyrði
sett fyrir útflutningnum; einungis
sé heimilt að flytja út lambakjöt af
þeim svæðum þar sem riða hefur
aldrei greinst, auk þess sem kjötinu
á að halda aðskildu frá öðru kjöti
í vinnslu og í geymslum. Mikil
áhersla sé á rekjanleika sláturlamba
og öryggi afurðanna. Á fjórum
varnarsvæðum hefur aldrei greinst
riða; Snæfellsneshólf, Vestfjarðahólf
eystra, N-Þingeyjarsýsluhluti
Norðausturhólfs og Öræfahólf.
Kjarnafæði stígur inn á
Indlandsmarkað
Andrés Vilhjálmsson, sölustjóri
Kjarnafæðis, hefur síðustu tvö ár
unnið að því, fyrir hönd Kjarnafæðis,
að fá leyfi hjá indverskum
yfirvöldum fyrir innflutningi á
íslensku lambakjöti til Indlands.
„Þetta hefur verið gert í mjög góðri
samvinnu við Matvælastofnun
og Gissur Guðmundsson, sem er
milliliður í þessu verkefni og sá sem
í upphafi kom þessum viðskiptum
á. Sendiráð Íslands á Indlandi
hefur líka komið komið að þessu
verkefni,“ segir Andrés.
Kaupandinn flytur inn 20 tonn
lambakjöts á mánuði
„Tímabundið leyfi fékkst fyrir fimm
tonnum sem gildir í sex mánuði fyrst
um sinn og fór fyrsta prufusendingin
út í byrjun október. Þar er svo stefnt á
að næsta sending fari í nóvember og
við áætlum að það verði um 20 tonn,
en með því skilyrði að leyfið verði
fyrst framlengt. Ekki er vitað hversu
mikið magn þetta getur orðið en sá
sem kaupir af okkur núna flytur inn
20 tonn í hverjum mánuði frá Nýja-
Sjálandi og Ástralíu. Þessar tölur
gefa þó ekki nákvæma vísbendingu
um hversu mikið magn af íslensku
lambakjöti þetta getur orðið, það
gæti verið minna og einnig þarf að
hafa í huga að kjötið þarf að koma
frá riðufríum svæðum. Þetta er á
algjöru frumstigi og þess vegna
mikilvægt að stíga varlega til jarðar
í öllum væntingum, en þetta lofar
þó góðu.“
Tækifæri fyrir aðrar
afurðastöðvar
Að sögn Andrésar var samningurinn
gerður á milli innflutningsaðila á
Indlandi og SAH Afurða á Blönduósi
og Kjarnafæðis. „Við vonumst til að
fleiri afurðastöðvar geti notið góðs
af þessu verkefni ef vel tekst til svo
þetta muni gefa fleiri afurðastöðvum
tækifæri á að selja inn á þennan
markað þar sem þó nokkur hefð er
fyrir neyslu á sauðfjárafurðum.
Skilyrðin fyrir þessum útflutningi
til Indlands er að lambakjötið komi
frá riðufríum svæðum og þarf að
halda kjötinu aðskildu frá öðru kjöti
í vinnslu og geymslum. Einnig er
lögð sérstök áhersla á rekjanleika
afurðarinnar. Matvælastofnun
hefur unnið mjög gott starf í þessu
verkefni og á hrós skilið.“
Gott verð mun fást
„Verðið sem fæst fyrir kjötið er
gott fyrir íslenska framleiðandann
ef úr þessu verður,“ segir Andrés.
„Kjarnafæði sendi fyrst út prufur
til sendiráðs Íslands í Nýju-Delí á
Indlandi fyrir tveimur árum þar sem
íslenska lambakjötið var kynnt fyrir
áhrifamönnum í matreiðslugeiranum
á Indlandi.
Kaupandinn hefur svo kynnt
íslenska lambakjötið fyrir
matreiðslumönnum eftir að fyrsta
prufusendingin fór út núna í byrjun
október, meðal annars fjölmörgum
af bestu hótelum í Nýju-Delí,
höfuðborg Indlands, og fengið
frábærar viðtökur.
Nú er búið að stíga fyrsta skrefið
en fyrsta sendingin var að fara í gegn
hjá indverskum tollayfirvöldum sem
gekk vel. Næsta skref verður tekið
í nóvember og vonandi getum við
horft á Indland sem framtíðarmarkað
fyrir íslenskt lambakjöt,“ segir
Andrés.
Fjallalamb þreifar á
Kínamörkuðum
Eins og komið hefur fram var áður
veitt leyfi til útflutnings á lambakjöti
til Kína með svipuðum skilyrðum.
Þar er þó tilgreint að svæðin skuli
vera riðufrí í dag, en ekki skilyrt
við að þar hafi aldrei greinst riða
eins og Indverjar gera kröfu um.
Þar er hins vegar gerð krafa um að
sláturhús, kjötpökkunarstöðvar og
frystigeymslur séu á riðulausum
svæðum. Björn Víkingur Björnsson,
framkvæmdastjóri Fjallalambs á
Kópaskeri, segir að Fjallalamb
standi nú í viðræðum við fjóra aðila
í Kína um sölu á lambakjöti og þær
gangi mjög vel. „Það er ánægjulegt
að svæðið fái nú að njóta þeirrar
landfræðilegu sérstöðu sem það
hefur.
Nú bíðum við eftir heilbrigðis-
vottorði frá Matvælastofnun en
kínversk og íslensk yfirvöld eru
að koma sér saman um ákveðið
heilbrigðisvottorð sem mun fylgja
vörunni alla leið til kaupenda.
Þegar það er komið þá þarf
að skrá leyfi Fjallalambs á öllum
tollstöðvum. Það er okkur mjög
mikilvægt að þetta ferli taki sem
stystan tíma, svo hægt sé að hefja
sölu.“
Hundrað tonna útflutningsþörf
„Þegar þessu ferli er lokið ætti
ekkert að standa í vegi fyrir því að
fara að senda kjöt út. Útflutningsþörf
Fjallalambs er ríflega 100 tonn, en
ef við fáum gott verð þá munum við
örugglega senda meira.
Mitt markmið er að fá gott verð
fyrir vöruna þannig að bændur og
Fjallalamb sjái sér hag í því að selja
á þennan markað án þess að tapa á
því. Ef það gengur eftir gætum við
verið að tala um framtíðarviðskipti.
Verðið skiptir öllu máli. Viðræður um
verð eru í gangi en ég get ekki upplýst
frekar um þau mál núna.
Kínverjar gera kröfu um það
að sláturhúsið sé staðsett á hreinu
svæði sem gerir það að verkum að
Fjallalamb er eina húsið á landinu
sem gat fengið leyfi. Það hefur aldrei
komið upp riða á svæði Fjallalambs
þannig að ég geri fastlega ráð fyrir
því að við getum líka fengið leyfi
á Indlandi en ég hef aðallega verið
að skoða Kínamarkaðinn. Við erum
að tala um mjög stóra markaði
og þurfum því að vanda mjög til
verka í samningunum,“ segir Björn
Víkingur. /smh
Fyrirkomulag rjúpnaveiða 2018:
Fleiri veiðidagar á stærri veiðistofn
Náttúrufræðistofnun Íslands
hefur metið að rjúpnastofninn þoli
veiðar á 67 þúsund fuglum. Í fyrra
var niðurstaðan 57 þúsund fuglar
og árið 2016 40 þúsund fuglar.
Umhverfis- og auðlindaráðherra
hefur ákveðið að veiðidagar rjúpu
verði fimmtán talsins í ár, en í
fyrra og árið 2016 voru þeir 12.
Veiðitímabilið hófst á föstudaginn
og skiptist niður á næstu fimm
helgar.
Miðað er við að tíu rjúpur komi í
hlut hvers veiðimanns ef þessum 67
þúsund fuglum er dreift jafnt á milli
þeirra sem héldu til veiða á síðasta
ári. Áfram er sölubann á rjúpum.
Sjálfbær rjúpnastofn
Í tilkynningu úr umhverfis- og
auðlindaráðuneytinu kemur fram að
meginstefna stjórnvalda sé að nýting
rjúpnastofnsins skuli vera sjálfbær,
sem og annarra auðlinda. Jafnframt
skuli rjúpnaveiðimenn stunda
hóflega veiði til eigin neyslu. „Til
að vinna að sjálfbærri veiðistjórnun
eru stundaðar mikilvægar rannsóknir
og vöktun á stofninum og síðan rekið
stjórnkerfi til að stýra veiðinni að
viðmiðum um hvað telst sjálfbær
nýting. Rjúpnastofninn stendur
betur nú en undanfarin ár. Því er talið
ásættanlegt að rýmka þann tíma sem
hægt er að stunda veiðar. Það getur
jafnframt orðið til þess að minnka
álag á veiðislóð.“
Fyrirkomulag rjúpnaveiða 2018 er
eftirfarandi samkvæmt tilkynningu úr
umhverfis- og auðlindaráðuneytinu:
1. Heildarveiði árið 2018 miðast
við 67.000 rjúpur sbr. mat
Náttúrufræðistofnunar Íslands
á veiðiþoli stofnsins.
2. Sölubann er á rjúpum. Óheimilt
er að flytja út, bjóða til sölu eða
selja rjúpur og rjúpnaafurðir.
Með sölu er átt við hvers konar
afhendingu gegn endurgjaldi.
Umhverfisstofnun er falið að
fylgja því eftir.
3. Hófsemi skal vera í fyrirrúmi.
Veiðimenn eru eindregið
hvattir til að sýna hófsemi og
eru sérstaklega beðnir um að
gera hvað þeir geta til að særa
ekki fugl umfram það sem
þeir veiða m.a. með því að
ljúka veiðum áður en rökkvar.
Umhverfisstofnun verður falið
að hvetja til hófsemi í veiðum.
4. Veiðiverndarsvæði verður áfram
á SV-landi líkt og undanfarin ár.
5. Veiðidagar eru 15 og skiptast
á fimm helgar, frá föstudegi
til sunnudags og hefst veiði
síðustu helgina í október sem
hér segir:
• Föstudaginn 26. október til
sunnudags 28. október, þrír
dagar.
• Föstudaginn 2. nóvember til
sunnudags 4. nóvember, þrír
dagar.
• Föstudaginn 9. nóvember
til sunnudags 11. nóvember,
þrír dagar.
• Föstudaginn 16. nóvember
til sunnudags 18. nóvember,
þrír dagar.
• Föstudaginn 23. nóvember
til sunnudags 25. nóvember,
þrír dagar.
6. Fyrirsjáanleiki. Umhverfis-
og auðlindaráðherra mun, til
samræmis við ákvæði laga
nr. 64/1994 um vernd, friðun
og veiðar á villtum fuglum
og villtum spendýrum,
fela Umhverfisstofnun
að höfðu samráði við
Náttúrufræðistofnun Íslands að
hefja vinnu við gerð tillögu um
fyrirkomulag rjúpnaveiða sem
taki gildi frá og með haustinu
2019. Um það hafi stofnunin
samstarf við Samráðsnefnd
um sjálfbærar veiðar og
eftir atvikum aðra aðila, en
í nefndinni sitja fulltrúar
Skotvís, Fuglaverndar,
Bændasamtakanna og
Náttúru stofa, auk fyrrgreindra
stofnana. Sú tillaga liggi fyrir
í febrúar nk. /smh
Erpsstaðir
hlutu Fjöreggið
Fjöreggið, viðurkenningu Matvæla-
og næringarfræðafélags Íslands
og Samtaka iðnaðarins, hlaut
Rjómabúið á Erpsstöðum í Dölum,
en það var afhent á Matvæladegi
Matvæla- og næringarfræðafélags
Íslands sem haldinn var á Grand
hótel á fimmtudaginn.
Fjöreggið er veitt fyrir lofsvert
framtak á matvæla- og næringarsviði.
Í dag er framleitt gamaldags skyr, tvær
tegundir af ostum á Erpsstöðum,
margar tegundir af ís og skyrkonfekt.
Á Erpsstöðum er rekin sveitaverslun
sem selur framleiðsluvörur
fyrirtækisins.
Önnur verkefni og fyrirtæki
sem voru tilnefnd til Fjöreggsins
voru: AstaLýsi, blanda af íslensku
astasantíni og síldarlýsi, Efstidalur
II, fjölskyldubýli sem rekið er af
fjórum systkinum og fjölskyldum
þeirra, Heilsuprótein, framleiðsla
á verðmætum afurðum úr mysu
sem áður hefur verið fargað, og
Matartíminn, vörumerki í eigu
Sölufélags garðyrkjumanna sem
framleiðir mat handa skólabörnum.
/smh
Andrés Vilhjálmsson, sölustjóri Kjarnafæðis. Mynd / Kjarnafæði
Björn Víkingur Björnsson, fram-
kvæmda stjóri Fjallalambs.
Mynd / Fjallalamb