Bændablaðið - 01.11.2018, Blaðsíða 19

Bændablaðið | Fimmtudagur 1. nóvember 2018 19
Byggt upp á Kaupvangsbökkum
og Melgerðismelum
Einnig nefna þeir félagar að Léttisfólk
réðst í það stórvirki árið 1962 að
kaupa jörðina Kaupangsbakka í
Eyjafjarðarsveit, skammt sunnan
Akureyrar. Safnað var fyrir jörðinni
með framlögum félagsmanna
sjálfra og þá lagði sjóður kenndur
við Caroline Rest fram umtalsverða
fjármuni til kaupanna. Hesthús og
greiðasala með því nafni stóð í
Grófargili í eina tíð, en það reisti
George Schrader árið 1913. Þegar
hann yfirgaf landið 1915 skildi
hann eftir sig eignir og fjármuni
sem mynduðu sjóðinn. Léttisfélagar
reistu minnisvarða um hestavininn
Schrader á 100 ára ártíð Caroline
Rest árið 2013.
„Jörðin Kaupangsbakki var
lengi vel einungis notuð til beitar
fyrir hesta félagsmanna, en hin
síðari ár höfum við staðið þar fyrir
mikilli uppbyggingu. Nú hefur á
jörðinni verið reist glæsilegt hús,
Bakkahöll sem svo er nefnd, stór
rétt sömuleiðis og önnur aðstaða
sem kemur að góðum notum.
Kaupangsbakkar eru líkast til
fjöfarnasti áningastaður hestamanna
á Norðurlandi, þar hefjast flestar
hestaferðir frá Akureyri og Eyjafirði
og enda þar sömuleiðis. Það stendur
svo til að halda áfram uppbyggingu
á svæðinu og viðhalda þeirri
aðstöðu sem þar er fyrir,“ segja þeir
Björn og Sigfús.
Hestamannafélagið Léttir hefur
einnig í samstarfi við hestamanna-
félagið Funa í Eyjafjarðarsveit unnið
að uppbyggingu á Melgerðismelum
í Eyjafjarðarsveit en þar er ljómandi
fínt mótssvæði og hafa þar verið
haldin mörg stórmót hestamanna,
m.a. fjórðungsmót og þá var
Landsmót hestamanna haldið þar
árið 1998. „Okkar framtíðarsýn
er sú að Melgerðismelar verði
útivistarparadís hestamanna,
þar er fyrirhugað að byggja upp
mannvirki, m.a. þjónustuhús og
tjaldsvæði til að sá draumur verði
að veruleika.“
Engin aldurstakmörk í
hestamennskunni
Léttir hefur einnig tekið gamalt
eyðibýli í Fnjóskadal, Sörlastaði, í
fóstur, en frá árinu 1975 hefur það
leigt jörðina af Þingeyjarsveit og
hefur um árin verið unnið að því að
bæta og viðhalda gömlu íbúðarhúsi
á jörðinni.
„Það má segja að við höfum búið
okkur til sælureit að Sörlastöðum,
hann nýtum við vel yfir sumarið
enda ávallt gott að dvelja þar og
njóta lífsins.“
Sigfús nefnir að margir kostir
fylgi því að vera félagsmaður í Létti,
vel sé hugsað um alla aldurshópa
sem hestamennsku stunda,
hestamennskan eigi sér raunar engin
aldursmörk, hvorki efri né neðri.
„Það geta allir stundað hesta-
mennsku, sama hver aldurinn
er. Við höfum ávallt staðið fyrir
miklu og góðu æskulýðsstarfi og
því munum við halda áfram, það
er nauðsynlegt að hlúa að ungum
og efnilegum hestamönnum, það
eru þeir sem taka við keflinu af
okkur. Við höfum góða aðstöðu
fyrir þennan hóp og munum hér
eftir sem hingað til leggja mikla
rækt við hann, enda býr lengi að
fyrstu gerð eins og þar stendur,“
segir Sigfús.
Gott veganesti inn í framtíðina
Björn nefnir að á þeim tímamótum
sem Léttir fagni 90 ára afmæli
standi félagið einkar vel, það
eigi umtalsverðar eignir og sé
skuldlaust.
„Við Léttismenn erum ákaflega
stolt af þessari stöðu. Það hefur
verið gæfa félagsins alla tíð að vel
hefur verið farið með fé og sú stefna
höfð að leiðarljósi að skuldsetja
félagið ekki um of til framtíðar. Það
er einmitt þess vegna sem okkur
þykir framtíð félagsins einkar björt.
Okkar mesti auður liggur í
félagsmönnum sem eru tilbúnir að
leggja á sig ómælt sjálfboðaliðastarf
bæði í nefndarstarfi ýmiss konar eða
við verklega framkvæmdir. Þetta
er fólk sem ann félaginu sínu og
er umhugað um að það dafni og
eflist. Akureyrarbær hefur verið
okkar sterkasti bakhjarl, hefur stutt
við okkar starf með miklum sóma
í áratugi.
Með þetta veganesti, traustan
bakhjarl, frábæra félagsmenn,
miklar eignir og skuldleysi höldum
við bjartsýn til móts við framtíðina,“
segir Björn.
Styrkir til rannsóknar- og
þróunarverkefna 2019
(A-flokkur)
Framleiðnisjóður landbúnaðarins
Hvanneyrargötu 3, 311 Borgarnesi
Sími 430-4300
Framleiðnisjóður landbúnaðarins er leiðandi stuðningsaðili
við þróunar- og nýsköpunarstarf landbúnaðarins og kallar eftir
umsóknum um styrki til verkefna á sviði hagnýtra rannsókna,
þróunar og þekkingarsköpunar.
Forgangs njóta þau verkefni sem fela í sér verulega nýbreytni
og sem líkleg eru til að leiða af sér þekkingu, tækni eða aðrar
afurðir sem hægt er að hagnýta í náinni framtíð í íslenskum
landbúnaði.
Styrkir til atvinnuuppbyggingar á lögbýlum á vegum einstakra
bænda (B-flokkur) sem og námsstyrkir verða auglýstir síðar.
Umsóknum skal skilað á sérstöku umsóknareyðublaði sem er
að finna á heimasíðu sjóðsins, www.fl.is. Mikilvægt er að vanda
til gerðar umsókna og gera grein fyrir öllum efnisatriðum sem
farið er fram á í umsóknarforminu.
Umsóknarfrestur er til 21. desember n.k. (póststimpill gildir).
Umsóknum skal skilað til Framleiðnisjóðs landbúnaðarins,
Hvanneyrargötu 3, 311 Borgarnes. Nánari upplýsingar eru
veittar á skrifstofu Framleiðnisjóðs landbúnaðarins, Hvanneyri.
Sími 430-4300/netfang fl@fl.is.
Styrkir þessir eru auglýstir með fyrirvara um fjárheimildir
Alþingis til sjóðsins fyrir árið 2019.
Landstólpi leitar að samstarfi - þjónustufulltrúa
Vegna aukinna umsvifa þjónustudeildar Landstólpa leitum við nú logandi ljósi að þjónustulunduðum
og klárum einstaklingi til að sinna viðgerðum og viðhaldi tækja og búnaðar hjá viðskiptavinum
fyrirtækisins.
Viðkomandi þarf að sinna þjónustu við viðskiptavini okkar á sviði mjaltaþjóna, mjólkurtanka og
öðrum þeim tækjum sem fyrirtækið þjónustar. Ekki er um fullt starf að ræða heldur verktöku eftir
þörfum viðskiptavina hverju sinni.
Starfssvæðið er Eyjafjarðar- og Þingeyjarsýslur og þarf viðkomandi að hafa bíl til umráða.
Verkefnið hentar bæði einstaklingum eða fyrirtækjum í þjónusturekstri sem vilja bæta við sig
verkefnum.
Viðkomandi þarf að:
- hafa þekkingu á vélum og vélbúnaði
- vera þjónustulundaður
- vera fljótur að setja sig inn í verkefni og geta miðlað upplýsingum
- vera tilbúinn að læra og leggja sig fram
- hafa þekkingu á þörfum bænda og annarra viðskiptavina Landstólpa
- geta unnið sjálfstætt en jafnframt vera hluti af liðsheild
- geta sinnt útköllum utan hefðbundins vinnutíma
Auk ofangreinds er góð enskukukunnátta og bílpróf nauðsynlegt.
Viðkomandi þarf að geta hafið störf sem fyrst.
Frekari upplýsingar um starfið veitir Anton þjónustustjóri í s. 846-6116.
Umsóknarfrestur er til 15. nóvember næstkomandi og skal umsóknum skilað á netfangið
anton@landstolpi.is
Finna má okkur á heimasíðunni, www.landstolpi.is eða á facebook “Landstólpi”
Landstólpi ehf. - Gunnbjarnarholti - 801 Selfoss - Tel.: +354 480 5600
Erum við að leita að þér?
Hestur og maður á dýrlegri stundu á Akureyri síðsumars 2018, hér eru þau
Valgerður Sigurbergsdóttir og Atli Sigfússon að leggja í hann inn í sólarlagið.
Mynd / Léttir
Frá Sörlastöðum í Fnjóskadal. Mynd / Léttir
Hestaferð í Þingeyjarsýslu. Komið að Fosshól þar sem Léttir hefur komið
upp glæsilegri rétt. Mynd / Léttir