Bændablaðið - 01.11.2018, Blaðsíða 18

Bændablaðið | Fimmtudagur 1. nóvember 201818
„Á þessum merku tímamótum
getum við svo sannarlega verið
stolt af okkar félagi. Það hefur
vaxið og dafnað í áranna rás
og heilmargt sem við höfum
afrekað undanfarna áratugi
sem við njótum góðs af bæði í
nútímanum og til framtíðar litið,“
segja þeir Björn Jóhann Jónsson,
formaður Hestamannafélagsins
Léttis á Akureyri, og Sigfús Ólafur
Helgason, framkvæmdastjóri þess,
en Léttir fagnar 90 ára afmæli
sínu með veglegri afmælishátíð
um komandi helgi, dagana 2. til
4. nóvember.
Stofndagur Léttis er 5. nóvember
1928 og er félagið þriðja elsta
hestamannafélag landsins, Glaður
í Dalasýslu var stofnaður fyrr á
sama ári og Fákur í Reykjavík
árið 1922. Fyrsti formaður þess
var Pálmi Hannesson, síðar rektor
Menntaskólans í Reykjavík.
Um 500 félagsmenn
Þeir Björn og Sigfús segja að strax
í upphafi hafi félagið markað sér
stefnu sem enn, 90 árum síðar,
sé í heiðri höfð, þ.e. að Léttir
sé hagsmunafélag og málsvari
hestamanna á öllum sviðum. Hæst
beri þar að hafa milligöngu um að
útvega félagsmönnum beitarhaga
fyrir hross sín, leggja og útvíkka
reiðvegi út frá Akureyri, styðja við
og efla hrossarækt sem og að koma
upp völlum og góðri aðstöðu fyrir
keppni í hestaíþróttum.
„Það var mikill kraftur í starfsemi
félagsins strax eftir stofnun og unnið
að ýmsum málum sem til hagsbóta
voru fyrir félagsmenn, en svo gerist
það þegar áhrifa kreppunnar fór að
gæta á fyrstu árum fjórða áratugarins
þá lagðist félagið í dvala, en tók
svo við sér með endurnýjuðum
krafti þegar kom fram á fimmta
áratuginn. Jón nokkur Geirsson,
læknir á Akureyri, ásamt fleiri
góðum mönnum átti stóran hlut í
að endurreisa félagið. Það hefur allar
götur síðan starfað af miklum krafti,
félögum hefur fjölgað jafnt og þétt
en félagsmenn eru um 500 talsins nú
þegar við fögnum 90 ára afmælinu,“
segir Björn.
„Á níu áratugum hefur auðvitað
mikið breyst, bæði hvað varðar
hestamennskuna sjálfa og eins líka
alla umgjörð um hestinn,“ bætir
Sigfús við.
„Hér á árum áður var hestahald
víða um bæinn, hér og hvar um
Akureyri og ekkert sérstakt skipulag
í gildi hvar slík hús mátti reisa, né
heldur voru til staðar reglugerðir
um hvaða skilyrði þau þurftu að
uppfylla. Hesthús og eða kofar
voru víða í bakgörðum íbúðarhúsa
og afskaplega misjöfn að gæðum.“
Sigfús nefnir að fyrir 50 árum,
árið 1968 hóf að rísa fyrsta eiginlega
og skipulagða hesthúsabyggðin
á Akureyri, á mýrunum ofan
Miðhúsaklappa, á svæði sem í
daglegu tali nefnist Breiðholt. Nú
eru þar um 100 hesthús og þar eru
haldin um 1500 hross á fóðrum yfir
veturinn. Tíu árum síðar, 1978, var
hafist handa við byggingu annars
hesthúsahverfis, í Hlíðarholti í
Lögmannshlíð, en þar eru um 20
hesthús sem rúma um það bil 350
hross. Þar er einnig keppnissvæði
félagsins með hringvöllum, kynbóta-
og kappreiðabraut. Árið 2008 reis á
svæðinu reiðhöll, sú næststærsta á
landinu í dag. Hlíðarholtssvæðið í
heild sinni er glæsilegt mótssvæði
og getur tekur við flestum af stærstu
mótum sem haldin eru hér á landi.
Þeir félagar Björn og Sigfús segja
tilkomu reiðhallar fyrir áratug hafa
breytt heilmiklu til batnaðar fyrir
hestamennsku á Akureyri. Það er
jafnan líf og fjör í höllinni, mótahald
er umfangsmikið, um 20 mót haldin
árlega auk námskeiða ýmiss konar,
m.a. eru knapamerkjanámskeið
haldin þar. Þá hafa fleiri notið góðs
af reiðhöllinni, en námskeið fyrir
hunda og sýningar eru þar af og
til. Glæsilegur salur sem rúmar um
180 manns er á efri hæð og er hann
sömuleiðis vel nýttur fyrir allra
handa viðburði.
Bættar samgöngur efst á
óskalistanum
„Því er ekki að neita að efst á
óskalista okkar hestamanna er
að Akureyrarbær gefi félaginu
í afmælisgjöf lagfæringar á
samgöngum að svæðinu og að
ljúka við þau verkefni hér umhverfis
svæðið sem enn hafa ekki verið
kláruð, svo sem að malbika
bílastæði við reiðhöllina,“ segja
þeir. Vegurinn að hesthúsahverfinu
við Hlíðarholt er afskaplega lélegur,
þolir enga bleytu og verður þá oft
og iðulega ófært upp í hverfið þegar
veður er með þeim hætti.
„Aðkoman að hverfinu getur
verið skelfileg og ekki á hvers manns
færi að komast þangað. Það er eitt
af brýnustu verkefnunum sem við
stöndum frammi fyrir að gera þarna
verulega bragarbót á. Það má segja að
reiðhöllin og sú starfsemi sem þar fer
fram sé miðpunktur hestamennsku
í Eyjafirði og renneríið er mikið,
það er því afskaplega leiðinlegt að
neyðast til að bjóða upp á þessar
lélegu samgöngur.“
Hestamannafélagið Léttir hefur
um árin lagt gjörva hönd á margt
sem til hagsbóta er fyrir félagsmenn
og segja þeir Björn og Sigfús að
þó svo að félagið sé í aðra röndina
öflugt íþróttafélag sinni það líka af
kostgæfni hinum almenna félaga
sem ekki endilega er í hestamennsku
til að keppa og eða sýna.
„Við sinnum öllum þáttum, hvort
heldur sem er þessum íþróttatengdu
eða hinum almennu en á því sviði
höfum við sem dæmi látið vel
til okkar taka þegar kemur að
reiðvegamálum,“ segja þeir.
HROSS&HESTAMENNSKA
Margrét Þóra Þórsdóttir
mth@bondi.is
Hestamannafélagið Léttir á Akureyri fagnar 90 ára afmæli:
Traustur bakhjarl, frábærir félagsmenn, miklar eignir
og engar skuldir er gott veganesti til framtíðar
Hestamannafélagið Léttir var fyrst hestamannafélaga á Íslandi til að taka upp félagsbúning, það gerðist árið 1974. Hér er höfðinginn Ingólfur Ármannsson
fánaberi Léttismanna á landsmóti hestamanna á Vindheimamelum sama ár. Mynd / Léttir
Björn Jóhann Jónsson, formaður Hestamannafélagsins Léttis, og Sigfús Ólafur Helgason framkvæmdastjóri í
Mynd / Léttir