Bændablaðið - 01.11.2018, Blaðsíða 32

Bændablaðið | Fimmtudagur 1. nóvember 201832
Uppskeruhátíð ferðaþjónustunnar
á Norðurlandi fór nýverið fram í
Húnaþingi vestra.
Húnvetningar tóku vel á móti
kollegum sínum í ferðaþjónustu
og farið var í heimsóknir til
ýmissa fyrirtækja á svæðinu og nýr
útsýnispallur við Kolugljúfur var
sömuleiðis skoðaður. Um kvöldið
var svo haldin vegleg veisla í
veislusalnum á Hótel Laugarbakka,
þar sem dansinn dunaði fram eftir
nóttu. Venju samkvæmt voru þrjár
viðurkenningar veittar, Sproti ársins,
Fyrirtæki ársins og viðurkenning
fyrir störf í þágu ferðaþjónustunnar.
Hotel Natur er Fyrirtæki ársins
Viðurkenningin Fyrirtæki ársins
er veitt fyrirtæki sem er búið
að slíta barnsskónum og hefur
skapað sér sterka stöðu á markaði.
Fyrirtækið hefur unnið að stöðugri
uppbyggingu, vöruþróun og
nýsköpun og er með höfuðstöðvar á
Norðurlandi. Í ár féll viðurkenningin
í skaut félaginu Hotel Natur sem þau
Stefán Tryggvason og Inga Margrét
Árnadóttir reka á Svalbarðsströnd.
Þau höfðu um árabil rekið
kúabú en fóru í kringum árið 2004
að hugleiða að hætta þeim búskap
og snúa sér að ferðamennsku. Árið
2005 höfðu þau gert breytingar á
fjósinu og hlöðu, og opnuðu þar 10
herbergja hótel. Árin á eftir fylgdu
fleiri breytingar og herbergin eru
nú 36 talsins.
Hotel Natur er sannkallað
fjölskyldufyrirtæki, þar sem
foreldrarnir hafa séð um að stýra
skútunni en börnin koma að
daglegum rekstri og þá sérstaklega
yfir sumartímann. Mikil áhersla
hefur verið lögð á umhverfismál
og endurnýtingu. Engar nýjar
byggingar hafa verið byggðar
heldur þeim gömlu breytt og nýjasta
dæmið um það er útsýnispallurinn
í súrheysturninum. Sumir myndu
reyndar segja að Stefán hefði
ákveðið blæti fyrir turnum, enda
var hann ekki lengi að tryggja
sér glerturnana sem áður hýstu
keiluhöllina á Akureyri þegar hún
var rifin niður.
Hótel Laugarbakki
er Sproti ársins
Viðurkenningin Sproti ársins er
veitt ungu fyrirtæki sem hefur
skapað eftirtektarverða nýjung í
ferðaþjónustu á Norðurlandi. Það
fyrirtæki sem fær verðlaunin í ár
er Hótel Laugarbakki.
Það er ekkert lítið verkefni
sem þau Hildur Ýr og Örn réðust
í þegar þau ákváðu að breyta gamla
héraðsskólanum á Laugarbakka
í heilsárshótel. Vel tókst til með
breytingar. Hótelið er hið stærsta á
Norðurlandi vestra og með opnun
þess opnuðust nýir möguleikar
bæði fyrir ferðafólk og þá sem
starfa í ferðaþjónustu í nágrenninu.
Mikilvægt þykir fyrir fjórðunginn
að hafa þennan valmöguleika í
gistingu á svæðinu og skemmir
ekki fyrir hve auðvelt er að halda
alls kyns viðburði og ráðstefnu á
hótelinu. Veitingastaðurinn Bakki
setur svo punktinn yfir i-ið.
Svanhildur og störf í þágu
ferðaþjónustu á Norðurlandi
Viðurkenninguna fyrir Störf í
þágu ferðaþjónustu á Norðurlandi
fær einstaklingur sem hefur
haft góð áhrif á ferðaþjónustu
á Norðurlandi í heild sinni og
hefur starfað beint eða óbeint
fyrir ferðaþjónustu á svæðinu.
Í ár var það Skagfirðingurinn
Svanhildur Pálsdóttir sem hlaut
þá viðurkenningu.
Svanhildur hefur starfað í
ferðaþjónustu í meira en áratug,
en hún ásamt öðrum keypti Hótel
Varmahlíð árið 2006 og gerðist
hótelstjóri eftir að hafa starfað sem
kennari. Svanhildur hefur um árin
sinnt samstarfi ferðaþjónustuaðila
vel og var lengi í stjórn
Markaðsstofu Norðurlands, þar
af formaður í nokkur ár. Auk þess
var hún ein af stofnendum Félags
ferðaþjónustunnar í Skagafirði og
gegndi einnig formennsku þar til
langs tíma. Auk þess hefur hún
setið í stjórnum Ferðamálasamtaka
Íslands og Ferðamálasamtaka
Norðurlands vestra.
Hótel Varmahlíð var selt til
nýrra eigenda í fyrra og nú er
veruleiki Svanhildar ekki bundinn
við raunheima, því hún hóf nýlega
störf hjá 1238 Battle of Iceland á
Sauðárkróki. Sýndarveruleiki er
þar nýttur til þess að leyfa gestum
að upplifa Örlygsstaðabardaga og
það er því ljóst að ferðaþjónusta í
Skagafirði og á Norðurlandi öllu
mun áfram njóta góðs af reynslu
og kröftum Svanhildar. /MÞÞ
LÍF&STARF

Samningaviðræður standa enn yfir
Nú hafa viðræður samninganefnda
ríkis og bænda um endurskoðun
á Samningi um starfsskilyrði
sauðfjárræktar staðið yfir frá
því 20. ágúst. Fljótlega eftir að
samningaviðræður hófust var
boðað að samningum um aðgerðir
fyrir haustið yrði ekki lokið fyrir
sláturtíð.
Samningaviðræður standa enn
yfir og ljóst er að tími til að klára
samningaviðræður fyrir áramót
er skammur. Áherslur LS eru
óbreyttar, við höfum m.a. talað
fyrir endurskoðun á niðurtröppun
beingreiðslna og að tekið verði á
þeim aðstæðum sem nú eru uppi
þannig að kjör bænda batni sem
fyrst. Við hefðum sannarlega þurft
að ná í gegn aðgerðum fyrir sláturtíð
sem hefðu stuðlað að kjarabót fyrir
bændur næsta haust. Nú verðum
við að sjá hvaða staða verður uppi
þegar sláturtölur liggja fyrir og
upplýsingar um ásetning. Það lítur
út fyrir einhverja fækkun, en hversu
mikla er erfitt að segja að svo stöddu.
Staðan í haust er ekki svo ólík því
sem hún var haustið 2017. Það urðu
nær engar breytingar á afurðaverði
milli ára. Hins vegar voru birgðir af
lambakjöti mun minni í lok ágúst, eða
um 700 tonn. Þær voru 1.100 tonn á
sama tíma í fyrra.
Við teljum vera til staðar ákveðnar
forsendur fyrir hærra afurðaverði
vegna bættrar birgðastöðu. Hins
vegar var þróun á gengi og mörkuðum
erlendis fyrstu 6 mánuði ársins ekki
þannig að það gæfi tilefni til mikillar
bjartsýni.
Það er ljóst að veiking krónunnar,
undanfarna vikur, mun hafa áhrif ef
hún helst svona áfram. Ef að skilaverð
fyrir útflutning væri 5 evrur/kg þá þýðir
veiking krónunnar, þannig að gengi
evru fari úr 120 í 135, verðhækkun í
íslenskum krónum úr 600 kr/kg upp í
675 kr/kg. Þá hefur heimsmarkaðsverð
verið að þokast upp á við.
Heimsmarkaðsverð á ný sjálensku
lambakjöti var um 3,0 evrur í janúar
2017 en var núna í september um 4,5
evrur. Þetta gefur okkur vísbendingu
um styrkingu á heimsmarkaðsverði
til lengri tíma. Hins vegar þurfum
við að halda áfram að vinna af
krafti við að sækja fram á erlendum
mörkuðum í gegnum hið öfluga
markaðsstarf Icelandic Lamb – Með
áherslu á sérstöðu og gæði íslenska
lambakjötsins. Þar er greinanlegur
árangur á skömmum tíma.
Mörg áhugaverð tækifæri eru í
sjónmáli, en vert að hafa í huga að
þessi vinna mun taka tíma, en hún
mun líka styrkja framtíðarafkomu
sauðfjárræktar á Íslandi.
Það hefur nær allur tími og orka
LS síðustu mánuði farið í það að
taka á stöðu sauðfjárræktarinnar.
Við hefðum gjarnan viljað sjá meiri
árangur og vissulega gremst okkur
það hversu hægt hefur miðað. Er
það eðlilegt að við þurftum að
bíða í nær 5 mánuði frá því að við
héldum aðalfund LS í byrjun apríl
þar til samninganefndir ríkis og
bænda hófu samtalið í lok ágúst?
Þann tíma hefði mátt nýta betur.
Því verður ekki breytt úr þessu. Við
þurfum að tryggja árangur í þeim
samningaviðræðum sem nú standa
yfir. Við þurfum að bæta afkomu
bænda og tryggja stöðugleika í
starfsumhverfinu m.a. með því að
efla þau verkfæri sem eru tiltæk
til að takast á við síbreytilegar
forsendur í starfsumhverfinu
Breytingar á tollaumhverfi
og ekki síður sá möguleiki að
hingað verði flutt inn ófrosið kjöt
felur í sér gífurlegar áskoranir
fyrir íslenskan landbúnað.
Vissulega felast tækifæri í tvíhliða
tollasamningum en sú staðreynd
að Bretland mun standa utan við
Evrópusambandið breytir miklu í
þessu samhengi. Það má eiginlega
segja að útganga Breta úr EU sé
ákveðinn forsendubrestur á þessum
tvíhliða tollasamningi.
Hvað sem öllu líður þá er ljóst
að sauðfjárræktin þarf að takast á
við breytt landslag þegar kemur
að erlendri samkeppni. Henni
mætum við best með því að efla
okkur sem framleiðendur út alla
virðiskeðjuna. Auka hagkvæmni
og tryggja hreinleika og gæði. Við
þurfum í meira mæli að horfa til
þess að styrkja innviði greinarinnar.
Tryggja að hér sé stundað öflugt
rannsóknarstarf og stuðla að því
að áfram sé sótt fram af krafti við
að efla leiðbeiningarstarfið.
Við þurfum að eiga virkara
samtal við neytendur. Fylgja
straumum og stefnum og vera
framsýnni þegar kemur að
vöruþróun.
Íslendingar vilja að hér á landi
sé stundaður öflugur landbúnaður,
eins og glögglega kom í ljós í
þeirri gífurlegu aðsókn sem var
að Landbúnaðarsýningunni nú í
haust. Við þurfum að skapa fleiri
slík tækifæri. Sauðfjárbændur buðu
til kjötsúpu á Skólavörðustígnum
síðasta vetrardag, eins og þeir hafa
gert í 14 ár í samstarfi við íbúa og
söluaðila á svæðinu. Þarna myndast
alltaf sama jákvæða stemningin
og er gott dæmi um hvernig má
efla samtalið og tengslin á milli
neytenda og bænda.
Unnsteinn Snorri Snorrason,
framkvæmdastjóri
Landssamtaka sauðfjárbænda
Uppskeruhátíð ferðaþjónustunnar á Norðurlandi:
Natur, Laugarbakki og Svanhildur hlutu viðurkenningar
Stefán Tryggvason hjá Hotel Natur ásamt þeim Hjalta Páli Þórarinssyni og Halldóri Óla Kjartanssyni, starfsmönnum
Markaðsskrifstofunnar, og Unni Valborgu Hilmarsdóttur, stjórnarformanni Markaðsskrifstofunnar, við afhendingu
viðurkenninga fyrir fyrirtæki ársins.
Örn og Hildur Ýr hjá Hótel Laugarbakka hlutu viðurkeninguna Sproti ársins.
Hér eru þau með Hjalta, Halldóri og Unni Valborgu.
Magnús Ásgeir Elíasson, bóndi á
Stóru Ásgeirsá, tók lagið fyrir gesti.
Svanhildur Pálsdóttir, sem áður rak Hótel Varmahlíð, hlaut viðurkenningu fyrir
störf í þágu ferðaþjónustu á Norðurlandi. Með henni á myndinni eru Hjalti og
Halldór frá Markaðsskrifstofunni og Unnur Valborg, stjórnarformaður hennar.
Unnsteinn Snorri Snorrason.