Bændablaðið - 02.08.2018, Blaðsíða 8

Bændablaðið | Fimmtudagur 2. ágúst 20188
FRÉTTIR
Fóðurverksmiðjan Laxá framleiðir fiskeldisfóður:
Framleiðslan hefur aukist úr
fimm þúsund tonnum í tíu
– Gert ráð fyrir að afkastagetan verði fullnýtt í náinni framtíð
„Við eigum von á að landeldi á
Íslandi muni vaxa á næstu árum
og sjáum fram á að fullnýta
afkastagetu verksmiðjunnar, sem
er um 20 þúsund tonn á næstu 5
til 10 árum,“ segir Gunnar Örn
Kristjánsson, framkvæmdastjóri
Fóðurverksmiðjunnar Laxár,
sem staðsett er við Krossanes á
Akureyri.
Undanfarin ár hefur verksmiðjan
framleitt um 10 þúsund tonn af
fiskafóðri, en áhersla er lögð
á fóður fyrir bleikju, lax, Sole
flatfisk og seiðaeldi sem alið er
í landeldisstöðvum, auk þess
sem í verksmiðjunni er framleitt
fiskafóður fyrir regnbogasilung
í sjóeldi. Öll framleiðslan fer á
innanlandsmarkað og lögð er rík
áhersla á gæði vörunnar.
Jákvæð áhrif á byggðalögin
Gunnar Örn segir að mikil umskipti
hafi orðið á liðnum áratug, en fyrir 10
árum var framleiðsla verksmiðjunnar
helmingi minni en nú hin síðari ár,
um 5 þúsund tonn. „Það hefur mikil
uppbygging átt sér stað í fiskeldinu,
einkum á svæðum þar sem tækifæri
til annarrar atvinnuuppbyggingar eru
af skornum skammti. Það hefur haft
mjög jákvæð áhrif á byggðalögin,
þar er nú kraftmikið atvinnulíf eins
og á suðurfjörðum Vestfjarða og
á sunnanverðum Austfjörðum þar
sem mikil umskipti hafa orðið.
Þessi vöxtur gerir svo að verkum
að meira er um að vera hjá okkur,“
segir Gunnar Örn, en alls starfa
9 manns hjá Laxá og nam velta
félagsins tæpum 2 milljörðum króna.
Starfsemi er í gangi í verksmiðjunni
í 12 tíma yfir veturinn en þegar
framleiðslan er mest síðsumars
og fram á haust er hún keyrð á
tveimur 8 tíma vöktum á sólarhring.
Síldarvinnslan í Neskaupstað á
stærstan hluta í Laxá, eða 67%,
Akureyrarbær 21% og Tækifæri og
fleiri aðilar eiga 12%.
Sjáum hver þróunin í greininni
verður
„Reksturinn hefur gengið vel
undanfarin ár og helst þar í hendur
við hraða uppbyggingu í fiskeldi hér
á landi. Við framleiðum helmingi
meira magn núna en við gerðum
fyrir 10 árum og sjáum fram á að
á næsta áratug munum við fullnýta
alla okkar framleiðslugetu, fara
upp í um 20 þúsund tonn á ári,“
segir Gunnar Örn. Verkmiðjan sé
vissulega komin til ára sinna, en
tæki og búnaður góð og standi fyrir
sínu. Engin áform séu á þessu stigi
um fjárfrekar framkvæmdir við að
reisa nýja verksmiðju, staðan er
sú að með núverandi tækjabúnaði
verksmiðjunnar er einungis hægt
að framleiða fiskeldisfóður fyrir
landeldið, ekki hið fituríka fóður
sem þarf fyrir laxeldi í sjókvíum.
Til að framleiða fituríkt fóður
fyrir laxeldi í sjó þyrfi að ráðast
í 400 milljón króna fjárfestingu í
verksmiðjunni. Gunnar segir að
laus afkastageta hennar yrði lengi
að greiða þá fjárfestingu niður.
„Við stöndum á hliðarlínunni ef
svo má segja, ætlum að sjá hverju
fram vindur, hver þróunin verður
og að meiri stöðugleiki skapist í
atvinnugreininni áður en við tökum
ákvörðun um miklar fjárfestingar í
nýrri verksmiðju,“ segir hann.
Aukin repjuræktun spennandi
möguleiki
Öll framleiðsla Laxár fer á
innanlandsmarkaði, í samkeppni við
Fóðurblönduna sem framleiðir um 2
þúsund tonn og innflutt fiskafóður
sem er um 18 þúsund tonn. „Hjá
okkur er rík áhersla lögð á gæðin,
við nýtum einungis gæðahráefni í
okkar fóður sem eru náttúruleg og
án erfðabreytinga. Yfir helmingur
af hráefninu er innlent fiskimjöl og
lýsi, en í okkar framleiðslu er mun
hærra hlutfall af bæði fiskimjöli og
lýsi en í innfluttu fóðri. Með því að
nýta innlent hráefni er kolefnissporið
einnig minna. Við sjáum mjög
spennandi möguleika vera að skapast
með aukinni repjuræktun hér á landi
sem vel nýtist í fiskafóður á móti lýsi
og að hluta á móti fiskimjöli, þannig
að það er margt áhugavert að gerast
í þessum geira atvinnulífsins,“ segir
Gunnar Örn.
/MÞÞ
Fjölgun ferðamanna:
Aukin þörf fyrir
menntaða leiðsögumenn
Út er komin greinargerð um
menntun og starfsundirbúning
leiðsögumanna. Í greinargerðinni
segir meðal annars að fjölgun
ferðamanna á Íslandi auki þörfina
fyrir sérmenntað og hæft starfsfólk
til að annast móttöku og þjónustu
við ferðamenn. Greinargerðin er
unnin af starfshópi Leiðsagnar –
félagi leiðsögumanna.
Fram kemur í greinargerðinni að
leiðsögumenn sinna fjölbreyttum
verkefnum, allt frá almennri
leiðsögn í hópferðabílum, á
viðkomustöðum ferðamanna og í
gönguferðum, yfir í margvíslega
afþreyingarleiðsögn, svo sem
við flúðasiglingar, hvalaskoðun,
jöklaferðir og siglingar á sjó og
vötnum, svo eitthvað sé nefnt. Þá
hefur sívaxandi áhersla á ferðir yfir
vetrartímann sett sitt mark á starfið.
Samkvæmt því sem segir í
skýrslunni er meginmarkmið
náms og kennslu í leiðsögn að
gera nemendur hæfa til að sinna
starfi leiðsögumanns og þjálfa
verklega færni sem nýtist þeim
í starfi. Námið þarf að standast
þær kröfur sem ferðaþjónustan og
þjóðfélagið allt gerir á hverjum
tíma til starfs leiðsögumanna,
ekki síst í ljósi hraðfara breytinga
í starfsgreininni, og að fagmennska
sé þar ætíð í fyrirrúmi.
Í ályktun í lok greinargerðarinnar
er meðal annars lagt til að hafnar
verði viðræður hið fyrsta við
Samtök ferðaþjónustunnar um
þær kröfur sem gera á um störf og
starfsundirbúning þeirra sem starfa
við leiðsögn ferðamanna hér á landi
og hvernig þær birtist í gæðakerfinu
Vakanum. /VH
Gunnar Örn Kristjánsson, fram-
kvæmdastjóri Fóðurverksmiðjunnar
Laxár.
Fóðurverksmiðjan Laxá er staðsett á athafnasvæðinu við Krossanes á
Akureyri.
Myndir / Laxá
Jarðræktarmiðstöð LbhÍ flutt að Hvanneyri:
Starfsemin verður efld
Jarðræktarmiðstöð Land bún-
aðar háskóla Íslands hefur verið
formlega opnuð á Hvanneyri.
Jarð ræktar miðstöðin var áður
staðsett á Korpu í Reykjavík en
í sumar var starfsemin flutt að
Hvanneyri. Til stendur að efla
starfsemi miðstöðvarinnar með
flutningunum.
Sæmundur Sveinsson, rektor á
Hvanneyri, segir færslu Jarð ræktar-
mið stöðvarinnar að Hvanneyri
jákvæða. „Atvinnudeild Háskólans
sem var undanfari RALA fékk 18
hektara land úr jörðinni Korpúlfs-
stöðum í Mosfellssveit árið 1960
og þar hafa því verið stundaðar
jarðræktartilraunir í tæp 60 ár.
Jarðræktarmiðstöðin er komin
með nýjan tækjakost, tilrauna- eða
reitasláttuvél, sem þarf meira rými
til að gagnast sem skyldi og það er
nóg af landi á Hvanneyri.
Aðrir kostir sem fylgja því að
flytja miðstöðina að Hvanneyri
eru meiri tengsl við nemendur og
skólann og svo ýmis samlegðaráhrif
af Jarðræktarmiðstöðinni og
Hvanneyrarbúinu,“ segir Sæmundur.
Ýmsar tilraunir í gangi
Meðal tilrauna sem nú eru stundaðar
hjá Jarðræktarmiðstöðinni að
Hvanneyri eru yrkjaprófanir í
kornrækt og yrkjaprófanir með grös.
Einnig er sláttutímatilraun með
vallarfoxgras og tilraunir með ræktun
á grænfóðri.
Tilraunasáðvél
Sæmundur segir að til standi að efla
starfsemi Jarðræktarmiðstöðvarinnar í
framhaldi á flutningnum. „Hugmyndin
er að kaupa tilraunasáðvél fljótlega
og hefja í framhaldi af því auknar
tilraunir með sáningar.
Allt þetta þýðir að hin víðfeðmu
landsvæði Hvanneyrar verða í
stórauknum mæli notuð undir
tilraunir.“
Hugsanlega útivistarsvæði við
Korpu
Að sögn Sæmundar er ekki
enn búið að taka ákvörðun um
hvernig Korpulandið verði nytjað í
framtíðinni eða hvort því verði skilað.
„Ríkið á stærsta hluta landsins og
hugsanlega Reykjavíkurborg hluta
þess. Ég veit að það er búið að
skipuleggja áframhald á Korputorgi
á hluta landsins en einnig eru uppi
hugmyndir um grænt svæði með
golfvelli og laxveiðiá á öðrum hluta
þess,“ segir Sæmundur Sveinsson,
rektor Landbúnaðarháskóla Íslands.
/VH
Mynd / Jarðræktarrannsóknir LbhÍ.
Sæmundur Sveinsson, rektor LbhÍ.