Skólavarðan - 2018, Blaðsíða 56

56 SKÓLAVARÐAN VOR 2018
Sveinlaug Sigurðardóttir tekur brátt sæti í
stjórn Félags leikskólakennara. Hún hefur
átt sæti í skólamálanefnd FL um árabil.
Sveinlaug segir starf sitt sem leikskóla­
kennari alveg dásamlega skemmtilegt.
HVER: Ég er 36 ára leikskólakennari og
starfa eingöngu við útikennslu. Hef verið í
Skólamálanefnd FL undanfarin ár en mun
setjast í stjórn FL núna í vor.
Hver eru helstu verkefnin fram undan í
málefnum leikskólans? FL verður með
aðalfund í maí 2018 og undirbúningur undir
þann fund er í fullum gangi þessa dagana.
Þar verður lögð áhersla á umræður um
frjálsa leikinn og mikilvægi hans í leikskóla­
starfi. Þar mun ný stjórn FL taka við og
verða verkefnin fram undan bæði ögrandi
og skemmtileg. Það sem borið hefur hæst í
umræðum um leikskólamál undanfarið eru
starfsaðstæður í leikskólum og það er ærið
verkefni að vinna að breytingum til hins
betra í þeim málum.
Hvað hefur borið hæst í þínu starfi í
vetur? Starfið mitt sem leikskólakennari
við útikennslu er alltaf svo dásamlega
skemmtilegt að það er erfitt að velja úr.
En ætli standi ekki upp úr sú frábæra til­
finning að sjá börnin sökkva sér í frjálsan
leik úti í náttúrunni, skoða, rannsaka og
læra í gegnum leikinn.
Hvernig leggst sumarið í þig? Sumarið
leggst mjög vel í mig, eins og alltaf. Ég
elska bjartar íslenskar sumarnætur og get
ekki beðið eftir að njóta þeirra.
Ætlarðu að ganga á fjall eða liggja á
strönd í sumar? Ég stunda ströndina og
sjóinn í Nauthólsvík allan ársins hring
og mun halda því áfram í sumar eins og
alltaf. En fjöll eru í miklu uppáhaldi líka
svo ætli ég geri ekki sitt lítið af hvoru.
Ertu í klúbbi? Nei...eða hvað...er í vin­
konuhópum...Eru það ekki nokkurs konar
klúbbar?
Hvaða bók er á náttborðinu? Ég er að lesa
Himnaríki og helvíti – þríleikinn eftir Jón
Kalman.
Hvert var uppáhaldsfagið þitt í grunn-
skóla? Samfélagsfræði minnir mig.
Draumagestir í kvöldverðarboði? Æsku­
vinirnir.
Hvað gerirðu á laugardagsmorgnum? Sef.
Og kúri uppi í rúmi.
Hvaða sjónvarpsþáttur hefur heillað þig
í vetur? Call the midwife – algjörlega
dásamlegir þættir sem ná öllum tilfinn­
ingaskalanum. Hef bæði hlegið og grátið
yfir þeim.
Ef þú mættir taka íslensku þjóðina í
kennslustund hvað myndirðu kenna? Nú­
vitund. Og nægjusemi. Úti í náttúrunni.
Hvað er best í heimi? Ástmaðurinn minn.
Facebook eða Twitter? Twitter er
hnyttnara en ég nota Facebook miklu
meira.
FÉLAGINN SVEINLAUG SIGURÐARDÓTTIR, 36 ÁRA LEIKSKÓLAKENNARI Í ÚTIKENNSLU
ELSKAR BJARTAR ÍSLENSKAR
SUMARNÆTUR