Skólavarðan - 2017, Blaðsíða 13
10 GÓÐ RÁÐ UM HEGÐUN
OKKAR Á NETINU
1. Komum fram á netinu og samfélagsmiðlum eins og við gerum í vinnunni og
opinberlega. Verum góðar fyrirmyndir.
2. Tjáum okkur af sanngirni og virðingu um vinnuna á netinu og
samfélagsmiðlum. Tölum á jákvæðan og uppbyggilegan hátt um skólann,
samstarfsfólk, nemendur, foreldra/forráðamenn og aðra.
3. Gætum trúnaðar við nemendur og aðstandendur þeirra á samfélagsmiðlum.
Þetta á meðal annars við um félagslegar og efnahagslegar aðstæður, skoðanir,
fatlanir, trúarbrögð, kynhneigð, líðan og heilsufar.
4. Gætum persónuverndar nemenda okkar og samstarfsfólks. Birtum ekki myndir
úr skólastarfi á samfélagsmiðlum eða vitnum í orð nemenda eða samstarfsfólks
án samþykkis hlutaðeigandi.
5. Ræðum notkun samfélagsmiðla við nemendur og foreldra/forráðamenn.
Segjum þeim frá þeim viðmiðum sem við styðjumst við.
6. Gætum þess að mismuna hvorki nemendum né foreldrum/forráðamönnum
þeirra.
7. Hvetjum til þess að í skólanum séu viðmið um notkun tölva, snjalltækja,
tölvupósts og samfélagsmiðla, bæði fyrir starfsfólk og nemendur.
8. Gætum að mörkum einkalífs og vinnu á netinu og í samfélagsmiðlum. Stofnum
hópa fyrir samskipti við nemendur og foreldra/forráðamenn á
samfélagsmiðlum. Gætum þess einnig að koma fram sem einstaklingur en ekki
fulltrúi vinnustaðarins/skólans þegar við tjáum okkar persónulegu skoðanir á
netinu.
9. Sendum ekki persónulegan tölvupóst úr vinnunetfangi. Almennt séð er slíkur
póstur sendur í nafni vinnustaðarins okkar.
10. Munum að það sem einu sinni er farið á netið er erfitt eða ómögulegt að taka
til baka. Ef við höfum miklar skoðanir á frétt eða innleggi á samskiptamiðli
getur verið gott að hvíla málið aðeins áður en við bregðumst við. Ef og þegar
við ákveðum að bregðast við gerum það á uppbyggilegan og málefnalegan hátt.
KENNARASAMBAND ÍSLANDS