Skessuhorn - 11.05.2022, Blaðsíða 40

MIÐVIKUDAGUR 11. MAÍ 202240
Pennagrein
Pennagrein
Pennagrein
Það fer víst ekki fram hjá mörg-
um að sveitastjórnarkosningar
standa fyrir dyrum. Þar verða ein-
hverjir kallaðir en nokkrir útvaldir.
Að undanförnu hef ég rekist á þó
nokkrar greinar í blöðum um lélega
frammistöðu okkar sveitarstjórnar.
Að ekki sé nú minnst á Facebook.
Yfirleitt eru þetta sömu aðilarnir
sem skrifa þetta og virðast vita bet-
ur, kunna betur og geta betur en
sveitarstjórn og aðrir sem að mál-
um hafa komið. Eftirvænting mín
var því mikil þegar framboðin hófu
að senda inn kynningarbæklinga
um sína frambjóðendur og áhersl-
ur þeirra. Þarna birtust væntan-
lega framarlega eða fremst á fram-
boðslistum nöfn þessara manna
sem látið hafa ljós sitt skína um
afleita frammistöðu sveitarstjórnar
Borgar byggðar. Vonbrigðin urðu
því mikil þegar enginn þeirra hafði
séð ástæðu til að leyfa okkur íbúun-
um að njóta gáfna sinna, skipulags-
hæfileika, sérþekkingar á fjármálum
sem og öðru sem sveitarstjórnar mál
varðar.
Vilja þeir bara standa á hliðar-
línunni og hrópa líkt og óstýrilát-
ir áhorfendur á kappleik sem telja
sig vita betur um leikkerfi, leik-
menn og vitlausa dómara? Neikvæð
umræða innan samfélagsins er okk-
ar versti óvinur og elur á sundr-
ungu sem við þurfum síst á að halda
en að auki getur slík umræða dreg-
ið úr löngun fólks sem annars vildi
flytja hingað og byggja með okkur
gott samfélag til framtíðar. Við ætt-
um ekki að tala sveitarfélagið okk-
ar niður, það bitnar fyrst og síðast á
okkur sjálfum.
Ég hef reyndar heyrt af slíkri
umræðu í öðrum sveitarfélögum
svo þetta er ekki sérstakt fyrirbæri
hjá okkur en hins vegar ekki til eft-
irbreytni.
Borgarbyggð er ekki fjölmennt
sveitarfélag miðað við landstærð.
Því geta sjónarmið íbúanna og
áherslur verið með ólíku móti. Þá
er okkur nauðsynlegt að haldast
í hendur og sammælast um sterka
þjónustukjarna í Borgarnesi sem og
í öðru þéttbýli á svæðinu. Ekki má
gleyma strjálbýlum sveitum held-
ur en þær halda utan um þéttbýl-
ið. Sterkar sveitir stuðla að sterku
þéttbýli og öfugt. Við eigum gnótt
af náttúruperlum, laxveiðiám, fall-
egum fjöllum, jarðhitasvæðum,
heiðarlöndum, jöklum, falleg-
um fjörum, klettóttri strönd og
fl. Marga af þessum kostum hafa
framsýnir menn og konur nýtt sér
og sínum sem og sveitarfélaginu
til framdráttar. Sumarhúsalóð-
ir, jarðvarmaböð, sögustaðir og fl.
Þá má ekki gleyma skólunum okk-
ar. Grunnskólar, menntaskóli, tveir
háskólar.
Hvað vantar? Við búum í góðu
sveitarfélagi þar sem mörg tækifæri
leynast.
Þakkir til þess fólks sem vill leiða
samfélagið okkar áfram.
Nokkuð hefur borið á því að fólk
sem hefur áhuga á stjórnmálum,
veigri sér við að bjóða fram krafta
sína vegna neikvæðrar umræðu.
Ég hef heyrt að þetta eigi einnig
við í öðrum sveitarfélögum. Það er
afleitt.
Það er gott að búa á Íslandi. Það
er gott að búa í Borgarbyggð. Ver-
um þakklát og samstillt.
Þorvaldur Jónsson, Brekkukoti
Borgarbyggð.
Hvað nú Borgarbyggð?
Eitt mikilvægasta stefnumál Sam-
fylkingarinnar og Viðreisnar í
Borgarbyggð fyrir komandi sveitar-
stjórnarkosningar eru gjaldfrjálsir
leikskólar.
Menntastofnanir eru mikilvæg-
ustu grunnstoðir samfélagsins og
okkar öflugasta verkfæri þegar
kemur að auknum jöfnuði. Þar eiga
öll börn að hafa jöfn tækifæri til
náms og fá að njóta sín á eigin verð-
leikum í samfélagi við aðra.
Leikskólinn er fyrsta skólastig-
ið lögum samkvæmt. Þrátt fyrir að
ekki sé skólaskylda á leikskólastigi
þá skýtur það skökku við að leik-
skólar séu ekki gjaldfrjálsir líkt og
grunnskólarnir.
Tryggjum félagslegt
réttlæti fyrir börn
Við mannfólkið fæðumst ekki með
jöfn tækifæri í lífinu. Strax við
fæðingu er okkur mismunað eft-
ir búsetu, fjárhagsstöðu og öðrum
aðstæðum foreldra. Talið er að nú
búi um 10.000 börn við fátækt á
Íslandi.
Þetta eru börnin sem fara svöng
að sofa. Þetta eru börnin sem fara
ekki í afmæli hjá skólafélögum því
það er ekki til peningur til að gefa
gjöf eða á aðrar skemmtanir sem
kosta. Og þetta eru börnin sem
eru ólíklegri en önnur börn til að
fara í leikskóla og missa þar með af
dýrmætu tækifæri til að umgangast
jafnaldra og efla þannig tengsl og
félagsþroska. Auk annars náms sem
fram fer í faglegu starfi leikskól-
anna á hverjum degi.
Mennta- og velferðarkerfið eru
helstu tæki jöfnunar og félagslegs
réttlætis fyrir börn. Að gefa öllum
börnum tækifæri til að sækja leik-
skóla er því stórt skref í átt að aukn-
um jöfnuði.
Það þarf heilt þorp til
að ala upp barn
Fólk á barneignaraldri er oft á þeim
stað í lífinu að þau eru að koma sér
þaki yfir höfuðið og að byrja að fóta
sig í atvinnulífinu. Auk þess er þetta
oft á tíðum sá hópur sem hefur
lægstar tekjur. Á sama tíma er þetta
sá tími í lífi barna þegar gæðastund-
ir með foreldrum eru hvað mikil-
vægastar. Að samfélagið taki hönd-
um saman og styðji við barnafjöl-
skyldur með því að minnka þenn-
an útgjaldalið mun skapa svigrúm
til aukinnar samveru foreldra og
barna. Það mun skila sér margfalt
til baka til samfélagsins þegar fram
líða stundir.
Setjum börnin efst
í forgangsröðina
Eins og áður sagði er það stefna
okkar að hafa gjaldfrjálsa leikskóla í
Borgarbyggð og er stefnt að því að
gera það í áföngum. Ætlunin er að
taka fyrsta skrefið í átt að því mark-
miði með því að fella niður leik-
skólagjöld fyrir fjögurra klukku-
stunda dvöl, frá og með 1. janúar
2024.
Í dag eru hlutur foreldra um 68
– 70 milljónir á ári. Vel er hægt að
standa undir þessum kostnaði með
fyrirsjáanlegum hækkunum á tekju-
liðum Borgarbyggðar, sem og með
forgangsröðum verkefna sem sátt
mun ríkja um. Þar ættu málefni
barna að vera efst í forgangsröð-
inni.
Setjum X við A
Það er ekki nóg að innleiða stefn-
ur sem líta vel út á pappír. Með því
að setja X við A í komandi sveitar-
stjórnarkosningum er tekið stórt
skref í málefnum barna.
Það er okkar markmið að
Borgar byggð verði framarlega í
flokki þegar kemur að fjölskyldu-
vænu samfélagi, ekki bara í orði
heldur líka á borði.
Bjarney Bjarnadóttir
Höf. er oddviti sameiginlegs fram-
boðs Samfylkingarinnar og Viðreisnar
í Borgarbyggð
Gjaldfrjálsir leikskólar – aukinn jöfnuður
Það hefur verið fróðlegt og
skemmtilegt að taka þátt í kosn-
ingabaráttu fyrir sveitarstjórnar-
kosningar fyrir ungan mann sem
er að flytja heim í Borgarbyggð eft-
ir nokkuð langa útilegu í útlöndum
og Reykjavík. Ég hef farið með öðr-
um frambjóðendum Vinstri grænna
víða um sveitarfélagið og átt sam-
töl við fjölda fólks. Þó sum vanda-
mál séu gömul, og jafnvel uppsöfn-
uð, kveður við nýjan og jákvæð-
an tón á mörgum sviðum í samfé-
laginu. Mér finnst við vera að fær-
ast nær hvoru öðru, og Borgar-
byggð er smátt og smátt að verða að
raunverulega sameinuðu sveitarfé-
lagi. Til að mynda var haldin sam-
eiginleg árshátíð allra starfsmanna
sveitarfélagsins um nýliðna helgi
(mér var ekki boðið, en kannski
næst!), en það er gott dæmi um
framtak sem hristir fólk saman af
ólíkum svæðum í þessu víðfeðma
sveitarfélagi. Stjórnendur sveitar-
félagsins eiga að hamra járnið á
meðan það er heitt og viðhalda
þessari jákvæðu þróun með því að
tengja saman ólík byggðarlög inn-
an sveitarfélagsins með viðburðum
og samkomum. Það er lykilatriði í
jákvæðum byggðarbrag að í hugum
íbúanna sé sveitarfélagið ein heild
og samgangur sem mestur.
Liður í þessari þróun er líka auk-
inn samgangur milli nemenda í
grunnskólunum í sveitarfélaginu.
Það er mikilvægt að krakkarn-
ir kynnist betur og ég tel kjörið
að við næstu endurskoðun skóla-
stefnu Borgarbyggðar verði það
gert að sérstöku markmiði. Ýms-
ar leiðir eru færar til þess og hægt
að byggja á þeim grunni sem þegar
hefur verið byggður í gegnum
tómstundir og íþróttastarf. Til að
mynda er tómstundarúta sveitar-
félagsins frábært framtak sem hef-
ur verið vel nýtt, og kjörið að efla
umgjörðina í kringum hana með
aukinn samgang grunnskólanema
í huga á næsta kjörtímabili. Það er
ekki bara uppbyggilegt og þrosk-
andi fyrir krakkana sem einstak-
linga að kynnast jafnöldrum í öðr-
um skólum í héraðinu heldur hefur
samfélagið í heild sinni hag af því
að það skapist einhvers konar sam-
eiginleg sjálfsmynd í hugum okkar
um „Borgar byggð“, óháð gömlum
hreppamörkum, þar sem við þekkj-
umst öll innbyrðis og tengjumst
böndum. Þannig byggjum við upp
jákvæðan byggðabrag.
Það á því að halda áfram í því
að auka samgang barna og ung-
menna í sveitarfélaginu eins og
kostur er, ekki síst þar sem stór
hluti þessara krakka munu síð-
an mætast í Menntaskóla Borgar-
fjarðar. Menntaskóli Borgarfjarð-
ar hefur nú verið starfandi í 15 ár
og sannað sig sem ein af grunn-
stoðum samfélagsins. Framsækni
hefur frá upphafi verið aðalsmerki
Menntaskólans. Þótt ótrúlegt megi
virðast í dag, þegar tölvunotkun er
orðin almenn og sjálfsögð á öll-
um sviðum, var MB fyrsti skólinn
til að gera fartölvuna að sjálfsögðu
vinnu- og námstæki inni í skólastof-
unni. Nú er skólinn að endurskoða
námsframboð sitt byggt á vinnu
starfshóps um „Menntun fyrir störf
framtíðarinnar“. Stefnan er að
koma upp svokölluðu Framtíðar-
veri í skólanum þar sem nemend-
um gefst færi á að tvinna bóknám-
ið við verklegar greinar og skap-
andi hugsun, eftir áhugasviði hvers
og eins. Þessi nýbreytni mun auka
sérstöðu Menntaskólans og vekja
á honum mikla athygli, og eflaust
gera hann að aðlaðandi kosti fyrir
verðandi framhaldsskólanema víð-
ar að af landinu. En þá þarf skólinn
að vera reiðubúinn að taka á móti
auknum fjölda nemenda.
Menntaskólinn hefur verið
vítamín-sprauta inn í samfélagið,
en það sem hefur skort í gegnum
tíðina er framtíðarlausn um fyrir-
komulag nemendagarða. Á næsta
kjörtímabili þarf sveitarstjórn að
setjast niður með stjórnendum
Menntaskólans og finna fjárhags-
lega sjálfbæra leið til þess að reisa
slíkt úrræði. Með því að reisa nem-
endagarða í nýju og vel búnu hús-
næði, væri stutt betur við nem-
endur í uppsveitum og sömuleið-
is yrði MB að raunverulegum val-
kosti fyrir aðra nemendur víða af
landinu. Það er auðvelt að tína
saman tölulegar staðreyndir um
hækkað menntunar stig og ávinning
af því fyrir svæðið, en sveitarfélagið
er einfaldlega líflegra og skemmti-
legra þegar það er fleira ungt fólk
á svæðinu. Þá yrðu vel hannað-
ir nemendagarðar á góðum stað í
Borgarnesi til mikillar prýði, svo
það er allt að vinna.
Ég, sem og aðrir frambjóðend-
ur Vinstri grænna, er til þjónustu
reiðubúinn við að bæta samfélagið
okkar. Alls eru fjórir listar í fram-
boði í Borgarbyggð, og þó ég vissu-
lega hvetji alla til að setja X við V,
þá er mikilvægast að sem allra flest-
ir mæti og nýti atkvæðisréttinn. Ég
hlakka til þess að starfa að málefn-
um sveitarfélagsins með fulltrú-
um hinna framboðanna á komandi
kjörtímabili, fáum við í VG til þess
umboð.
Bjarki Þór Grönfeldt Gunnarsson
Höf. er í 5. sæti á lista Vinstri
grænna í Borgarbyggð
Byggjum upp jákvæðan
byggðarbrag í Borgarbyggð