Borgfirðingabók - 01.12.2010, Blaðsíða 159

159Borgfirðingabók 2010
vettvangur myndi henta mér vel. Þegar til kom fannst mér eitthvað
vanta á að starfið væri nógu líflegt þannig að ég fór á stúfana aftur.
Í þetta sinn valdi ég opinbera stjórnsýslu og lauk MPA gráðu frá
Háskóla Íslands haustið 2005.
Námið gerði mér mjög gott, því ég var satt besta að segja orðin
stöðnuð eftir þennan langa tíma í kennslu þar sem yfirvinna var
fremur regla en undantekning. Ég naut þess fullkomlega að vera
nemandi.
Öðruvísi bóndi
Þegar ég lauk MPA náminu haustið 2005 þurfti ég að velja mér fram-
tíðarstað. Ég var þá búin að festa kaup á jörðinni Kúludalsá og hafði
haldið utan um rekstur hennar frá því pabbi féll frá árið 1996. Ég
treysti mér ekki til að eiga heima á tveimur stöðum, þannig að valið
stóð um að búa og starfa í Reykjavík eða halda til heimahaganna og
hasla sér völl þar.
Ég hafði gengið með hugmynd að einskonar skólabæ í maganum
í mörg ár. Mér var það ljóst að ég hefði ekki endalausan tíma til að
hugsa mig um. Tækifærið var þarna og ég stökk á það, ákvað sem sagt
að reyna að gera þennan gamla draum um skólabæ að veruleika og
nota býlið Kúludalsá til kennslu. Það eru svo margir möguleikar þar.
Mig langaði að bjóða upp á annars konar kennslu en hinn hefðbundni
grunnskóli gerir án þess þó að fara í samkeppni við hann. Markmiðið
var að kennslan yrði stuðningur við nám barna í grunnskóla og færi að
mestu leyti fram úti við. Áherslan yrði á náttúrufræði með tengingu
við landafræði, sögu og lífsleikni. Hestar myndu gegna lykilhlutverki
í kennslunni þar sem þeir væru heppilegir til að vekja áhuga nemenda
og veita þeim gleði sem er einkar hagstæður grundvöllur náms. Það að
kynnast hestum og læra um lífsafkoma þeirra gæti svo leitt nemendur
áfram að öðrum fyrirbærum náttúrunnar. Í kennslunni yrðið byggt á
þemum og stefnt að heildstæðu námi.
Námskeið um hesta og hestamennsku
Hvers vegna að tengja hesta við útikennslu? Þessi hugmynd byggir
að hluta til á eigin reynslu af hrossum og þá fyrst og fremst sem
vinum og gleðigjöfum og ég vildi gjarnan deila þessari reynslu með