Bændablaðið - 20.07.2023, Blaðsíða 40

40 Bændablaðið | Fimmtudagur 20. júlí 2023
Guðmundur Líndal Pálsson vann fyrsta
vinninginn í happdrætti á sumarhátíð
Íslandrover í Árbliki í Dalabyggð um
síðustu helgi, sem var Land Rover frá 1962.
Sjálfur átti Guðmundur Land Rover, mjög
sambærilegan þeim sem hann vann á dögunum,
en seldi fyrir nokkrum árum. Hann hefur séð
eftir þeirri sölu alla tíð og er því himinlifandi
að vera kominn með annan í hendurnar. „Ég
sel þennan bíl ekki frá mér, eins og ég gerði
með hinn,“ segir Guðmundur. Hann er búsettur
nokkra kílómetra frá mótsstaðnum og átti því
auðvelt með að koma fengnum heim.

Keypti 36 miða
„Ég keypti svolítið marga miða – ég skal
viðurkenna það,“ segir Guðmundur, en hann
og fjölskyldan festu kaup á 36 miðum. Hann
gerði sér engar vonir um að hreppa vinninginn,
enda versluðu flestir mótsgestir nokkra miða, og
sumir mjög marga, þar sem verðið var einungis
þúsund krónur. Fólki var frjálst að kaupa eins
marga miða og það vildi. Eina skilyrðið var að
viðkomandi væri á staðnum og tæki strax við
bílnum eftir útdrátt.
„Það er alveg dýrðlegt að keyra þetta –
maður fer svo langt aftur í tímann. Maður sest
inn og það kemur einhver sérstök lykt sem er
alltaf í Land Rover,“ segir Guðmundur. Hljóðið
frá vélinni minnir á gamlar Massey Ferguson
dráttarvélar og ekki kemur til greina að flýta
sér, enda komast bílarnir ekki mikið hraðar en
70–80 kílómetra á klukkustund.„Ég hef gaman
af því að keyra um á svona gömlum bílum.
Það er flott að vera á þessu hérna innan sveitar
og skrölta á þessu í vinnu eða búðina. Það er
alltaf tekið eftir manni,“ segir Guðmundur.
Hann er vélvirki og starfar sem verkstjóri hjá
Vegagerðinni í Búðardal.
Núna telur Land Rover-safn Guðmundar
þrjá bíla, en fyrir á hann Land Rover Discovery
frá 1998 og Range Rover frá 1972. „Nú get ég
valið bíl eftir því í hvernig skapi maður er,“
segir Guðmundur.
Í nokkuð góðu standi
Þótt bifreiðin sé rúmlega sextug, þá er hún
í nokkuð góðu standi, þar sem Land Rover-
feðgarnir frá Akureyri, Óttar Ingason og Hrannar
Ingi Óttarsson, voru búnir að lappa talsvert upp á
hann. Helst má nefna að þeir skiptu um hvalbak
og fóru yfir bremsur og rafkerfi.
Guðmundur vonast því til að geta komið
bílnum í gegnum skoðun fyrir lok sumars.
Það helsta sem þarf að gera er að sjóða í
eða skipta um aftasta hlutann af grindinni,
sem er illa farin af ryði. „Ég myndi allavega
ekki hengja kerru aftan í þetta. Hún myndi
vera fljót að yfirgefa þig,“ segir Guðmundur
og hlær.
Guðmundur hefur ekki getað keyrt bílinn
mikið, þar sem hann glímir við meiðsl á fæti
og á erfitt með að beita þungri kúplingunni.
Hann tók þó smá rúnt við mótsvæðið og
segir Guðmundur bílinn vera afar góðan
og að hann hafi ekki fundið alvarlegt slit í
fljótu bragði.
Guðmundur og sonur hans festu spotta við
bílinn til að koma honum heim, þó hann gæti
keyrt á eigin vélarafli. Ekki var um langan
veg að fara, en Guðmundur og fjölskylda búa
í Efri-Hundadal, sem er skammt frá Árbliki.
Klár fyrir næsta mót
Guðmundur segist ætla að mála bílinn, en
hann glímir við þá togstreitu að þurfa að
velja réttan lit. Upphaflega var bíllinn blár
og það sé ákveðin sjarmi í að gera bílinn eins
upprunalegan og hægt er. Hins vegar finnst
honum dökkgrænn mun flottari. Fjölskyldan
mun þurfa að komast að niðurstöðu fyrr en
síðar, enda hefur Guðmundur sett stefnuna á
að gera bílinn mjög góðan í vetur og keyra á
honum á sumarhátíð Íslandrover á næsta ári.
Guðmundur hefur alla tíð verið mikill
áhugamaður um Land Rover, en hann er
alinn upp á sveitaheimili og kynntist hann
bílategundinni í gegnum foreldra sína.
Hann hefur verið félagi í Íslandrover frá
því nokkrum árum eftir að klúbburinn
var stofnaður fyrir 20 árum. Enn fremur
hefur Guðmundur reynt að mæta á
allar sumarhátíðir Íslandrover, þar sem
félagsskapurinn sé sérlega skemmtilegur.
Guðmundur segir að þetta sé mikið
fjölskyldusport. Foreldrar hans búa á
bæjartorfunni og er hann oft að hjálpa föður
sínum með viðgerðir á gömlum Range Rover-
bílum. „Svo er ég búinn að smita öll börnin,
þau eru orðin vitlaus í þetta – vilja öll fá að
keyra gamla bílinn. Konan var líka furðu
ánægð að ég skuli hafa unnið þetta, þó þetta
kostaði meiri vinnu.“
Auðvelt að fá varahluti
„Ég mæli með því að allir sem eiga svona
bíla upp til sveita reyni að koma þeim á
götuna,“ segir Guðmundur. Það sé óþarfi að
henda þessum bílum þó þeir séu orðnir lélegir,
enda auðvelt að fá varahluti á góðu verði og
þetta þurfi ekki að vera dýrt áhugamál. /ÁL
LÍF&STARF
Vann gamlan Land Rover
– Ætlar að mæta á honum á næstu sumarhátíð Íslandrover
Land Roverinn er í mjög góðu standi miðað við að vera rúmlega sextugur. Hvalbakurinn er til
að mynda laus við ryð. Mynd / ÁL
Guðmundur Líndal Pálsson og Ingibjörg Anna
Björnsdóttir, frá Efri-Hundadal, eru nýir eigendur
gamals Land Rover. Mynd / Ingibjörg Gunnlaugsdóttir
HURÐIR
Tunguháls 10, 110 Reykjavík, sími 567 3440, vagnar@vagnar.is, vagnar.is
• Stuttur afhendingartími
• Hágæða íslensk
framleiðsla
• Val um fjölda lita í
RAL-litakerfinu
• Vindstyrktar hurðir
Bílskúrs- og iðnaðarhurðir
Iðnaðarhurðir
Iðnaðarhurðir með gönguhurð
Bílskúrshurðir
Hurðir í trékarma
Tvískiptar hurðir
Smíðað eftir máli
Fyrsta flokks þjónusta og ráðgjöf
Félagasamtökin Beint frá býli
(BFB) standa fyrir fögnuði þann
20. ágúst næstkomandi í tilefni 15
ára afmælis félagsins.
Afmælishátíð verður haldin á sex
stöðum á landinu með ólíku sniði
eftir aðstæðum. Verkefnisstjóri
þeirra er Oddný Anna Björnsdóttir
framkvæmdastjóri. „Tilgangur
afmælishátíðanna er að vekja athygli
á hugmyndafræði beint frá býli og
þeim heimavinnsluaðilum sem eru
í slíkri starfsemi hér á landi og eru í
félaginu.“ Gestgjafarnir eru Jóhanna
Bergmann Þorvaldsdóttir á Háafelli
í Hvítársíðu fyrir Vesturland,
Halldóra Ragnarsdóttir og Jóhann
Pétur Ágústsson á Brjánslæk á
Barðaströnd fyrir Vestfirði, Sigrún
Helga Indriðadóttir á Stórhóli í
Skagafirði á Norðurlandi vestra,
Arna Mjöll Guðmundsdóttir og
Fjóla Kim Björnsdóttir í Holtaseli
í Eyjafjarðarsveit fyrir Norðurland
eystra, Þorbjörg Ásbjörnsdóttir á
Lynghóli í Skriðdal fyrir Austurland
og Sölvi Arnarsson og Ísak Eyfjörð
í Efstadal II í Bláskógabyggð fyrir
Suðurland.
Gestir kynnast lögbýli þar sem
starfsemi beint frá býli fer fram og
geta notið þess sem þar er boðið
upp á, ásamt ýmsu fleiru í tilefni
dagsins. Félagsmenn landshlutans
munu mæta til að kynna og selja
sínar vörur. Viðburðurinn fer
fram milli kl. 13–17 og er haldinn
í samstarfi við landshlutasamtök
hvers landshluta og markaðsstofu
Vestfjarða. Nánari upplýsingar má
nálgast á vef Beint frá býli og á
samfélagsmiðlum /ghp
Beint frá býli boðar fögnuð