Skólavarðan - 2023, Page 12

12 SKÓLAVARÐAN HAUST 2023
VIÐTAL / Formaður FSL
sem gildir fram á næsta vor. Sigurður
segir í mörg horn að líta í komandi
kjarasamningsgerð. Blekið er vart
þornað á nýjum samningi þegar vinna
við þann næsta er hafin. Spurður um
megináherslurnar í komandi viðræðum
segir Sigurður:
„Við höfum í samningaviðræðum
undangenginna ára unnið markvisst
með samninganefnd sveitarfélaganna
að jöfnun launamyndandi þátta við hin
kennarafélögin. Þetta eru þættir sem
snúa að mati á reynslu og menntun
og ánægjulegt að greina frá því að í
síðustu þremur kjaralotum höfum við
náð árangri við að jafna þessa þætti.
Þetta náðist í áföngum og hefur í för
með sér að við eigum nú auðveldara
með að fara í samtal um sameiginlegar
kröfur aðildarfélaga KÍ sem semja við
sveitarfélögin.”
Sigurður segir jafnframt að nú
standi yfir undirbúningur að samtali í
samstarfsnefnd FSL og SNS um stjórn-
unarumfang aðstoðarleikskólastjóra
og hvernig hægt sé að meta fjölbreytta
starfsreynslu stjórnenda.
„Það er afar mikilvægt að nálgast
þetta verkefni af alvöru. Við erum að
viða að okkur upplýsingum með það að
markmiði að greina stöðuna
betur með okkar fólki. Við
munum síðan fara með þessi
gögn inn í samstarfsnefndina.
Verkefni á borði stjórnandans
hafa aukist verulega síðustu
ár en samhliða því hefur ekki
verið gefinn meiri tími til
að sinna verkefnunum. Af
þessari ástæðu hafa FSL og
SNS samþykkt að fara yfir
þessi mál og þau áform koma
fram í yfirlýsingu og verká-
ætlun beggja aðila. Stefnt er
að því að ljúka þessari vinnu
fyrir 1. mars á næsta ári.“
Fleira er í bígerð þegar
horft er til komandi kjaravið-
ræðna.
„Það er rétt, við eigum enn eftir
að ganga frá fyrrgreindum atriðum í
verkáætlun núgildandi samnings. Þá
munum við eiga samræður við önnur
aðildarfélög innan KÍ og ekki síst safna
ábendingum frá félagsfólki. Þegar þetta
er komið á borðið mun samninganefnd
FSL rýna gögnin og í kjölfarið setja
fram samningsmarkmið fyrir komandi
kjaraviðræður – þetta vinnulag er í
samræmi við lög FSL,“ segir Sigurður.
Kjaramálin eru ekki einu verkefni
formanns og stjórnar FSL. Sigurður
segir að nú standi yfir undirbúningur að
fræðsludagskrá sem verði í gangi fram
á næsta vor.
„Við erum í raun að halda áfram
okkar faglega starfi og ætlum að bjóða
upp á örfyrirlestra á netinu þar sem
fjallað verður um fjölbreytt efni sem
skipta okkar félagsfólk máli. Þetta form
hefur reynst vel og þessir viðburðir
jafnan vel sóttir. Þá verður að líkindum
efnt til stærri námskeiða með inn-
lendum sem erlendum aðilum,“ segir
Sigurður og bætir við að dagskráin verði
kynnt innan skamms.
Styttingin víða þung í vöfum
Nú hefur vinna við betri vinnutíma
starfsfólks í leikskólum víða staðið yfir
síðan í byrjun árs 2021. Fregnir hafa
borist um að misjafnlega gangi að koma
verkefninu á legg; sums staðar gangi
þetta vel en annars staðar miður vel.
„Betri vinnutími er verkefni sem
hefur legið þungt á stjórnendum síðustu
tvö árin. Ástæðan fyrir þessu er í raun
einföld; framkvæmdin mátti ekki kosta
krónu og á sama tíma mátti heldur ekki
skerða þjónustu. Við finnum það hjá
okkar félagsfólki að þetta verkefni er
þungt í vöfum, og víða þykir það mun
erfiðara en þau stóru verkefni sem
þurfti að sinna í heimsfaraldrinum –
en þá þurftu stjórnendur oft að hafa
hraðar hendur við að endurskipuleggja
skólastarfið í takt við atburði dagsins,“
segir Sigurður og bætir við að ástandið
kunni að batna á komandi
misserum.
„Fjölmörg sveitarfélög
hafa eða eru að breyta
reglum um dvalartíma barna í
leikskólum. Auk þess er sums
staðar verið að fjölga dögum
yfir árið þar sem leikskólinn
er lokaður. Þessar breytingar
munu án vafa auðvelda
stjórnendum að skipuleggja
og koma betri vinnutíma í
framkvæmd.“
Sigurður bendir
jafnframt á reiknivél sem er
að finna á vef Kennarasam-
bandsins en þar er hægt að
meta mögulegan kostnað við
styttingu vinnuvikunnar. „Það
er líka hægt að skoða hvernig draga
megi úr kostnaði, með tilliti til styttri
dvalar- eða starfstíma.“
Dvalartími barna hefur einmitt
verið töluvert í umræðunni og fram
hefur komið að viðveran sé einna lengst
í íslenskum leikskólum. Þetta kemur
fram í tölum frá OECD.
„Við höfum í mörg ár bent á
þennan vanda. FSL hefur átt aðild að
starfshópum sem vinna að þessum
málaflokki víða um land. Sú vinna
hefur haft í för með sér að við erum
að sjá breytingar hér og þar. Sjálfur
sat ég í starfshópi um skipulag og
starfsumhverfi leikskóla í Kópavogi og
eftir þá vinnu ákvað sveitarfélagið að
breyta gjaldskrá og auka sveigjanleika
í dvalartíma með það að markmiði að
stuðla að aukinni vellíðan barna,“ segir
Sigurður.
Hann segir þessa breytingu til þess
fallna að draga úr álagi í leikskólum
og nú sé útlit fyrir að fleiri sveitarfélög
muni taka skref í þessa átt, svo sem
Akureyri og Garðabær.
„Hvort þetta sé eina leiðin, eða sú
réttasta, veit ég ekki en það er afar gott
að sjá og finna að rekstraraðilar séu að
leita leiða til að auka farsæld og vellíðan
barna og fullorðinna í leikskólum
landsins. Það er auðvitað stóra málið,“
segir Sigurður.
Stytting vinnuviku í samfélaginu
getur einnig verið liður í að stytta
viðveru yngstu barna samfélagsins í
leikskólum. „Við þurfum að horfa á
þessa hluti með augum barnsins og
finna út hvað er því fyrir bestu er kemur
að farsæld og vellíðan. Það má þó segja
að eðlilegasta skrefið gæti verið að
breyta lögum um 40 stunda vinnuviku
– og setja styttingu vinnuvikunnar í lög
þannig að allir launþegar landsins nytu
hennar. Þá mætti fastlega gera ráð fyrir
að slíkt hefði áhrif á lengd skóladagsins
hjá leikskólabörnum.“
Það er afar gott
að sjá og finna að
rekstraraðilar séu að
leita leiða til að auka
farsæld og vellíðan
barna og fullorðinna
í leikskólum
landsins.