Skólavarðan - 2023, Blaðsíða 27

HAUST 2023 SKÓLAVARÐAN 27
Hringferð / KENNARASAMBANDIÐ
Múlaþing
L eikskólinn Hádeg-
ishöfði í Fellabæ er
fallegur og nútíma-
legur. Bæjarstæðið
er tignarlegt og náttúran allt
umlykjandi á leiksvæði barnanna.
Við heimsóttum Hádegishöfða
daginn sem sendinefnd KÍ efndi til
Hringferðarfundar á Egilsstöðum.
Það var sannarlega upplifun að
koma inn í svo stílhreina og fallega
byggingu. Eftir skoðunarferð um
skólann tókum við Önnu Heiðdal
Þórhallsdóttur sérkennslustjóra í
viðtal.
„Ég kann mjög vel við mig í
starfinu og það er gott að vinna hér
á Hádegishöfða. Skólinn er hæfilega
lítill eða stór, eftir því hvernig maður
lítur á það, og hér er samkennd
og samvinna eins og best verður á
kosið,“ segir Anna.
Um 20 manns starfa að jafnaði í
skólanum og börnin eru á milli 60 og
70 talsins. Á Hádegishöfða er starfað
í anda hugmyndafræði Reggio
Emilia sem felur meðal annars í
sér að áhersla er lögð á lýðræði í
vinnubrögðum og takmarkalaust
traust auk virðingar fyrir börnunum
og því að þau geti aflað sér þekkingar
og reynslu á eigin forsendum.
„Ég hef alltaf verið mjög hrifin
af þessari hugmyndafræði og mætti
segja að ég væri með svolítið Reggio-
hjarta. Ég kynntist þessari hug-
myndafræði snemma á mínum ferli,
eða þegar ég vann í leikskóla áður en
ég hóf kennaranámið. Mér finnst svo
falleg sýn á barnið í Reggio, þessi trú
á getu þeirra og hvernig við fylgjum
eftir þeirra áhuga, höfum allt svolítið
opið svo ímyndunarafl þeirra verði
leiðandi i starfinu.“
Anna gegnir nú starfi sér-
kennslustjóra en hún er langt komin
með að ljúka diplómanámi í sér-
kennslu við Háskólann á Akureyri.
„Þetta skiptist þannig hjá mér að um
60% vinnutímans fer í sérkennslu og
40% starfa ég sem leikskólakennari.
Þetta finnst mér gott fyrirkomulag
því ég vil gjarna halda tengslum við
kennsluna.“
Betra úthald í fallegu rými
Við sem erum gestir á Hádegis-
höfða velkjumst ekki í vafa um að
vinnuaðstaða kennara og barna
er upp á það besta í skólanum.
Hljóðvistin er líka afar góð. En
hvaða þýðingu hefur þetta fyrir
daglegt starf?
„Vinnuumhverfið skiptir miklu
máli og í okkar huga er leikrýmið
þriðji kennarinn. Hér höfum við
gott pláss, góða birtu og hljóðvist.
Það auðveldar okkur störfin til
muna og við finnum að það er gott
að starfa í fallegu og vel hönnuðu
húsi. Ekki það að við mannfólkið
getum aðlagast flestu, eins og við
gerðum til dæmis í gamla leik-
skólanum. En að vera í góðu húsi
auðveldar okkur að vera meira til
staðar og úthaldið er meira, bæði
hjá okkur kennurum og ekki síður
hjá börnunum,“ segir Anna.
Talið berst að útisvæðinu sem
vekur strax athygli fyrir að vera nátt-
úrulegt en um leið með skipulögð
svæði fyrir börnin að leika sér. „Ég
gæti ekki verið glaðari með útisvæðið
og ég er svo þakklát arkitektunum að
hafa skilið eftir svona mikla ósnortna
náttúru. Móinn, sem hefur alltaf
verið hér, fær að halda sér. Börnin
geta tínt ber hér á lóðinni á haustin.
Svo er útsýnið náttúrulega einstakt,“
segir Anna Heiðdal Þórhallsdóttir,
kennari og sérkennslustjóri.
Leikrýmið er þriðji kennarinn
Um Hádegishöfða
Leikskólinn hóf starfsemi í október 1987. Nafnið dregur
skólinn af samnefndum klettahöfða sunnan við eldra húsnæði
skólans við Lagarfell.
Leikskólinn er mjög vel staðsettur með grunnskólann,
tónlistarskólann, íþróttaaðstöðuna í fjölnotasalnum og
gervigrasvöllinn í næsta nágrenni. Gott samstarf er við allar
þessar stofnanir.
Einkunnarorð Hádegishöfða „Menntun hugans án menntun­
ar hjartans er alls engin menntun” eru sótt í smiðju heim-
spekingsins Aristótelesar og vísa til mikilvægis heildstæðrar
nálgunar á menntun, svo sem í gegnum mannkostamenntun
þar sem meginmarkmiðið er að styðja einstaklinga í að
þroska mannkosti sína (siðferðilega, félagslega, vitsmunalega
og tæknilega) sjálfum sér og samfélaginu til heilla.
Varðandi hlutverk menntunar er skilgreining Kristjáns
Kristjánssonar prófessors höfð að leiðarljósi en samkvæmt
henni er hlutverk menntunar að „… gefa sem flestum kost
á að ná sem mestum þroska, að verða sem best eintök af
tegundinni maður, miðað við þá möguleika sem búa í hverjum
og einum. Slíkt sé kjarni hins góða lífs.“ 
Anna Heiðdal Þórhallsdóttir stendur á leiksvæðinu á Hádegishöfða. Leiksvæðið er afar náttúrulegt, móinn sem
var fær að halda sér. Svo er útsýnið fagurt.