Morgunblaðið - 26.11.1985, Blaðsíða 21

MORGUNBLAÐIÐ, ÞRIÐJUDAGUR 26. NÓVEMBER1985
21
Fyrsta yélmennið sem notað
er við húsgagnaiðnað á íslandi
Kristján Siggeirsson hf. flytur í nýtt húsnæði
Kristján Siggeirsson hf. hefur tekið í notkun nýja lökkunarvél, sem er tölvu-
stýrð, og er að sögn forsvarsmanna fyrirtækisins fyrsta vélmenni sem notað
er við húsgagnaframleiðslu á íslandi. Eftir að viðurinn hefur verið lakkaður
fer hann inn í ofn og kemur út úr honum að nokkrum mínútum liðnum
snertiþurr.
Tómas Sigurbjörnsson, framleiðslustjóri, Hjalti Geir Kristjánsson, forstjóri,
Hannes Guðmundsson, formaður stjórnar Kristjáns Siggeirssonar, og Bjarni
Ragnarsson, verksmiðjustjóri, í nýju versluninni á Hesthálsi, en þar er
einnig til húsa verksmiðja fyrirtækisins.
INNLENDIR húsgagnaframleiðend-
ur hafa á undanförnum árum átt í
vök að verjast í samkeppninni við
erlenda framleiðendur. Þeir hafa
flestir ekki verið í stakk búnir að
mæta samkeppni við innflutt hús-
gögn og það sem valdið hefur þeim
mestum erfiðleikum í framleiðslunni
er lökkun húsgagna, sem hefur verið
„flöskuháls". Þessir erfiðleikar ættu
að vera að baki hjá Kristjáni Sig-
geirssyni hf., en fyrirtækið hefur
tekið í notkun nýja tölvustýrða lökk-
unarvél, sem eykur gæði og afköst
húsgagnaverksmiðjunnar, sem er I
nýju húsnæði að Hesthálsi 2-4 í
Reykjavík.
Framleiðsla í nýja húsnæðinu
hófst 12. ágúst síðastliðinn, en
bygging þess tók 14 mánuði. Arki-
tekt húsins er Helgi Hjálmarsson.
Húsið er allt um 5.800 fermetrar
og hefur verksmiðjan til umráða
4.000 fermetra. Hjalti Geir Krist-
jánsson, forstjóri Kristjáns Sig-
geirssonar hf., sagði að þetta væri
mikil breyting frá aðstöðunni í
Lágmúla (2.500 fermetrar), þar
sem verksmiðjan var áður. Nú er
verksmiðjan öll á einni hæð, sem
hefur mikla hagræðingu í för með
sér. Starfsmenn eru 35 og hjá
fyrirtækinu vinna alls 55-60
starfsmenn.
Hjalti Geir sagði að framleiðni
verksmiðjunnar hefði aukist um
25%, fyrst og fremst vegna nýju
lakkvélarinnar, en þar kemur
fleira til: „Allur flutningur innan
verksmiðjunnar fer fram á færi-
böndum, þannig að burður er nán-
ast úr sögunni. Þá hefur fram-
leiðslurásin verið skipulögð þannig
að hráefnið kemur inn um annan
enda hússins og fer fullbúin út um
hinn endann."
Eins og áður segir er lakkvélin
tölvustýrð og er að sögn forsvars-
manna Kristjáns Siggeirssonar hf.
fyrsta vélmennið (minirobot), sem
notað er í húsgagnaiðnaði á ís-
landi. Með tilkomu vélarinnar þarf
maðurinn ekki lengur að vinna
óþrifalegustu og óheilbrigðustu
verkin. Nú fer öll lakk- og málning-
arvinna fram í lokuðum skáp, þar
sem loftið er hreinsað áður en því
er sleppt í andrúmsloftið. Og
sterka lakklyktin, sem hefur verið
fylgifiskur lakkherbergja, er horf-
in. Tómas Sigurbjörnsson, fram-
leiðslustjóri, sagði að auk þess sem
afköst hefðu aukist hefðu gæði
framleiðslunnar gert það einnig:
„Áður þurfti að handsprauta alla
efnishluta, sem var erfið og vanda-
söm vinna og ekki auðvelt að ná
jafnri áferð, en það vandamál er
úr sögunni með tilkomu þessarar
vélar.“ Og í vélinni er hægt að
lakka, lita og bæsa og eru eingöngu
notuð íslensk lökk.
Húsbúnaðarframleiðsla
Á síðustu árum hefur Kristján
Siggeirsson hf. lagt megináherslu
á framleiðslu skrifstofuhúsgagna,
en verið er að vinna að hönnun
húsbúnaðar. Það er Þórdís Zoéga,
húsgagnaarkitekt, sem er hönnuð-
urinn í samvinnu við starfsmenn
fyrirtækisins og Hjalti Geir sagði
að vinnan væri á lokastigi. Starfs-
bróðir hennar, Gunnar Magnús-
son, hefur hannað skrifstofuhús-
gögnin að mestu. Samkvæmt upp-
lýsingum Hjalta Geirs er hlutur
fyrirtækisins í sölu skrifstofuhús-
gagna á íslandi um 50%. Jafn-
framt þessu eru framleidd hótel-
húsgögn og má nefna sem dæmi
að öll herbergi á Hótel Holti og
óðinsvéum eru innréttuð með
framleiðslu Kristjáns Siggeirsson-
ar.
Hjalti Geir Kristjánsson sagði
einnig: „Frá upphafi höfum við
lagt mikla áherslu á hönnun og
vöruþróun. f verksmiðjunni er sér-
stakt þróunarverkstæði, sem gegn-
ir því hlutverki að þróa nýjar
gerðir húsgagna auk sérsmíða sem
við tökum að okkur. Samstarf við
hönnuði hefur verið með ágætum
og stöðugt eru nýir hlutir í mótun.“
Stofnað 1919
Kristján Siggeirsson, húsgagna-
smíðameistari, stofnaði húsgagna-
verslun að Laugavegi 13 árið 1919.
í upphafi var fyrst og fremst um
innflutning að ræða, en fljótlega
voru keyptar vélar og hafin eigin
framleiðsla. Níu árum síðar var
reist steinhús við hlið hornhússins
að Laugavegi 13 og má geta þess
að á þessum árum seldi fyrirtækið
um 3.000 stóla á ári. Aftur liðu níu
ár og var þá byggt sérstakt hús
yfir framleiðsluna, við Smiðjustíg
6. Þar var framleiðslan til húsa
fram til ársins 1964, en 1954 var
hornhúsið að Laugavegi, sem var
timburhús, fjarlægt og byggt
steinhús. Frá árinu 1964 var hús-
gagnaframleiðslan til húsa í Lág-
múla 7 uns flutt var að Hesthálsi
í ágústmánuði síðastliðnum. Að
Hesthálsi er öll framleiðsla Krist-
ján Siggeirssonar þar verða skrif-
stofur fyrirtækisins og verslun.
Að Laugavegi 13 verður húsgagna-
verslun, gjafavöruverslun, Habitat
og Mothercare, en fyrirtækið hefur
umboð fyrir þessar alþjóðlegu
verslunarkeðjur á í slandi.
AÐALSTRÆTI 4 /^\
BANKASTRÆTI 7
15005
29122