Morgunblaðið - 27.10.2001, Blaðsíða 18

SUÐURNES
18 LAUGARDAGUR 27. OKTÓBER 2001 MORGUNBLAÐIÐ
UMHVERFISRÁÐHERRA, Siv
Friðleifsdóttir, hvetur sveitarfélög á
Suðurnesjum til að taka þátt í um-
hverfisverkefninu Staðardagskrá 21
en nú er aðeins Reykjanesbær þátt-
takandi. Lét hún þess getið á fundi
með fulltrúum sveitarfélaganna að
Reykjanesbær væri í hópi þeirra
sveitarfélaga sem lengst væru komin í
verkefninu.
Fulltrúar sveitarfélaganna fimm
sem mynda Samband sveitarfélaga á
Suðurnesjum (SSS) sitja aðalfund í
Fjölbrautaskóla Suðurnesja í Kefla-
vík en fundurinn stendur í tvo daga. Í
gær var flutt skýrsla stjórnar og
reikningar samþykktir og lagðar
fram tillögur sem fjallað verður um á
fundinum í dag. Þá ávarpaði Siv Frið-
leifsdóttir umhverfisráðherra fundar-
menn en umhverfismál eru þema
fundarins.
Enn vantar fjármagn í D-álmu
Skúli Þ. Skúlason, formaður SSS,
sagði frá þeim málum sem stjórnin
hefur unnið að á árinu. Hann sagði
meðal annars frá gangi mála vegna D-
álmu Heilbrigðisstofnunar Suður-
nesja en framkvæmdir við hana eru á
lokastigi. Sveitarfélögin komu að
framkvæmdinni með flýtifjármögnun.
Skúli sagði að nú hefði fengist
heimild til að hefja rekstur á neðstu
hæð hússins en þar verður sjúkra-
þjálfun og tengd starfsemi. Starfsemi
legudeildar fyrir sjúka aldraða verður
á annarri hæð og þar á starfsemi að
hefjast 1. júní á næsta ári. Skúli gat
þess að samkvæmt drögum að
skýrslu um framtíðarhlutverk Heil-
brigðisstofnunar Suðurnesja og D-
álmu vantaði enn 130 milljónir til að
ljúka endanlega framkvæmdum við
álmuna. Þar væri um að ræða búnað,
frágang í risi, þjálfunarlaug og fram-
kvæmdir við lóð.
Fram kom hjá Skúla að kostnaður
við 3.000 fermetra viðbyggingu sem
talin er nauðsynleg við Fjölbrauta-
skóla Suðurnesja sé lauslega áætlað-
ur 440 milljónir kr. og 90 milljónir kr.
að auki vegna tengdra breytinga á
eldra húsnæðinu. Sveitarfélögin
þyrftu að greiða 193 milljónir af þess-
um kostnaði, samkvæmt núgildandi
kostnaðarskiptingu. Hins vegar kom
fram hjá Vilhjálmi Þ. Vilhjálmssyni,
formanni Sambands íslenskra sveit-
arfélaga, að forystumenn sveitarfé-
laganna vildu að þessari kostnaðar-
skiptingu yrði breytt þannig að ríkið
greiddi alfarið stofnkostnað fram-
haldsskóla.
Vilhjálmur sagði að sveitarfélögin í
landinu yrðu af mörg hundruð millj-
ónum kr. í fasteignasköttum vegna
skattfrelsis opinberra bygginga, svo
sem sjúkrahúsa, heilsugæslustöðva,
skóla og meira að segja Rafmagns-
veitna ríkisins. Taldi hann rétt að af-
nema þessi fríðindi sem allra mest til
að tryggja sveitarfélögunum auknar
tekjur og gera kostnað við opinberan
rekstur sýnilegri.
Reykjanesbær framarlega
Siv Friðleifsdóttir umhverfisráð-
herra sagði meðal annars að mikil og
góð samvinna væri milli ráðuneytis-
ins og sveitarfélaganna um Staðar-
dagskrá 21. Þrjátíu sveitarfélög
tækju þátt í verkefninu, þar af eitt á
Suðurnesjum, en það er Reykjanes-
bær. Lét hún þess getið að Reykja-
nesbær væri eitt af þeim sveitarfélög-
um sem væru komin lengst í þessu
verkefni.
Hvatti ráðherra önnur sveitarfélög
til að bætast í hópinn, það væri enn
hægt. Með því væri unnt að efla sam-
starf sveitarfélaganna og þau gætu
nýtt betur fjármuni sína, auk þess að
standa sig betur í umhverfismálum.
Þá greindi hún frá því að búið væri
að framlengja samstarf Sambands ís-
lenskra sveitarfélaga og umhverfis-
ráðuneytisins um verkefnisstjóra
Staðardagskrár 21.
Umhverfismálin aðalefni aðalfundar Samtaka sveitarfélaga á Suðurnesjum
Hvattir til að taka þátt
í Staðardagskrá 21
Morgunblaðið/Helgi Bjarnason
Þrír fulltrúar úr Reykjanesbæ á fundinum, Kristján Gunnarsson, Ellert
Eiríksson bæjarstjóri og Jónína A. Sanders, formaður bæjarráðs.
UMHVERFISRÁÐHERRA vonast
til að geta úrskurðað í kærum
vegna umhverfismats Kára-
hnúkavirkjunar um 15. desember.
Siv Friðleifsdóttir var spurð um
það á aðalfundi SSS í gær hvenær
mætti búast við úrskurði um Kára-
hnúkavirkjun en fyrir fundinum
liggur ályktun frá stjórnar sam-
bandsins þar sem lýst er yfir
stuðningi við nýtingu orkulinda til
atvinnuuppbyggingar á Austur-
landi. Siv sagði ljóst að ekki næð-
ist að kveða upp úrskurðinn innan
þess tíma sem lög kveða á um.
Málið væri gríðarlega umfangs-
mikið auk þess sem framkvæmd-
araðilinn hefði sent inn ný gögn.
Ráðuneytið hefur fengið inn-
lenda og erlenda sérfræðinga til
að fara yfir ýmsa þætti málsins.
Kvaðst hún vona að það tækist að
ljúka málinu um miðjan desem-
ber.
Von á úrskurði um
miðjan desember
TILLAGA um að tryggja betur lög-
gæslu á Suðurnesjum var meðal
ályktunartillagna sem lagðar voru
fram á aðalfundi Sambands sveitar-
félaga á Suðurnesjum í gær. Fram
komu áhyggjur sveitarstjórnar-
manna af ástandinu.
Í tillögu stjórnar SSS er hvatt til
þess að dómsmálaráðherra tryggi
sýslumannsembættinu í Keflavík
nægilegt fjármagn og skilyrði til að
lögreglan geti sinnt sívaxandi álagi
og mikilvægri grenndarþjónustu.
Fram kom í máli Sigurðar Jóns-
sonar, sveitarstjóra í Garði, að
stjórnin hefði miklar áhyggjur af
löggæslumálum, ekki síst þegar
fréttir bærust af fækkun í lög-
regluliðinu. Fram kom hjá Hjálmari
Árnasyni alþingismanni að fækkað
hefði um fimm stöðugildi hjá sýslu-
manninum í Keflavík. Lét hann þess
getið að löggæslumálin hefðu brunn-
ið mjög á sveitarstjórnarmönnum í
yfirreið þingmanna Reykjanes-
kjördæmis um Suðurnesin í vikunni.
Hafa áhyggjur af löggæslu
GUÐJÓN Viktor Guðmundsson í
Grindavík á kind sem bar nú á dög-
unum. Þetta væri kannski ekki frétt
nema vegna þess að dagsetningin
var 2. október sem lambið kom í
heiminn.
Ærin Grána er tveggja vetra,
hún lét lömbum í vor en betur gekk
núna. Guðjón hugsar vel um ána og
lambið og segir að þeim sé gefið
tvisvar á dag. Fóðrið er fjölbreytt
en auk þess að gefa kindunum hey
gefur hann þeim brauð og gras-
köggla.
Morgunblaðið/Garðar Páll Vignisson
Guðjón Viktor Guðmundsson með haustlambið.
Haustlamb í heiminn borið
Grindavík
Reykjanes
UNGLINGAMÓTTAKA verður
opnuð í Reykjanesbæ næstkom-
andi mánudag. Þar getur ungt fólk
leitað ráða um ýmis málefni, heilsu
og þroska. Mótttakan er opin í
klukkutíma á hverjum einasta
mánudegi.
Heilsugæslusvið Heilbrigðis-
stofnunar Suðurnesja stendur fyr-
ir opnun unglingamótttökunnar en
Reykjanesbær tekur þátt í rekstri
hennar og leggur til húsnæðið.
Móttakan er í Hafnargötu 15, ann-
arri hæð, á milli verslunarinnar
Kóda og veitingastaðarins Olsen,
Olsen. Unglingamóttakan er opin
alla mánudaga frá klukkan 16.30
til 17.30. Sif Gunnarsdóttir skóla-
hjúkrunarfræðingur og læknar
heilsugæslusviðs annast þjón-
ustuna.
Án endurgjalds
Móttakan er ætluð ungu fólki, á
aldrinum 14 til 20 ára. Þar verður
hægt að leita ráða hjá hjúkrunar-
fræðingi eða lækni um allt sem
snertir málefni og þroska ungs
fólks. Þjónustan er veitt án endur-
gjalds. Í fréttatilkynningu er
nefnd fræðsla og ráðgjöf um getn-
aðarvarnir, kynsjúkdóma, sam-
skipti, félagsleg vandamál af ýmsu
tagi, almennt heilsufar (þó ekki
umgangspestir), húðvandamál, líð-
an og fleira.
Unglinga-
móttaka
opnuð á
mánudag
Reykjanesbær
VARNARLIÐIÐ hyggst
bjóða út rakaraþjónustu á
varnarsvæðinu á Keflavíkur-
flugvelli.
Utanríkisráðuneytið hefur
óskað eftir aðilum til að taka
þátt í forvali vegna útboðs
hárskeraþjónustunnar.
Einungis íslenskum lögaðil-
um er gefinn kostur á þátt-
töku. Gerður verður samning-
ur til eins árs en möguleikar á
framlengingu fjórum sinnum.
Bjóða út
rakara-
þjónustu
Keflavíkurflugvöllur