Morgunblaðið - 19.09.2002, Blaðsíða 21
NEYTENDUR
MORGUNBLAÐIÐ FIMMTUDAGUR 19. SEPTEMBER 2002 21
Glæný línuýsa
Glæsilegt úrval
fiskrétta
Tilboð dagsins
Stórlúða 890 kr. kg
Gnoðarvogi 44, sími 588 8686
ÁTAKSVERKEFNIÐ Áform efndi á
dögunum til ráðstefnu undir yfir-
skriftinni Sjálfbært Ísland, þar sem
fjallað var um mikilvægi framleiðslu
afurða á sjálfbæran hátt í sátt við um-
hverfið.
Meðal gesta á ráðstefnunni var
fulltrúi Whole Foods-keðjunnar, sem
samanstendur af 160 verslunum í
Bandaríkjunum, en verslunin hefur
selt íslenskar afurðir, meðal annars
lax, ferska og reykta bleikju, vatn og
lambakjöt. Einnig fluttu erindi for-
stjóri og aðaleigandi Legal Sea
Foods, keðju 23 veitingastaða, sem
leggja mikla áherslu á sjálfbærar
veiðar og meðferð sjávarafurða, og
forstjóri Coleman Natural Beef í
Colorado, eins stærsta framleiðanda
lamba- og nautakjöts með sjálfbær-
um hætti í Bandaríkjunum.
Mel Coleman, forstjóri Coleman
Natural Beef, kveðst þeirrar skoðun-
ar að með breyttu hugarfari getum
við breytt efnahagsstefnu samfélaga
þar sem sjálfbær landbúnaður fram-
leiði mat, sem við þörfnumst, á nátt-
úrlegan og lífrænan hátt.
„Við eigum að afla okkur matar
með sjálfbærum veiðum, beita skepn-
um á graslendi og styðja bændur sem
stunda víxlræktun og gæta þess að
næringarefni í jarðveginum gangi
ekki til þurrðar.
Ísland er auðugt af graslendi, svo
dæmi sé tekið, og gras er náttúruleg
auðlind sem hægt er að nýta til þess
að framleiða próteinríka matvöru.
Að mínu mati gætu Íslendingar
auðveldlega verið í broddi fylkingar
og mætt bæði lífrænum og efnahags-
legum sjónarmiðum þar sem hagnað-
ur væri bæði af starfsemi bænda og
seljenda,“ segir hann.
Upplýstir velja íslenskt lamb
Aðspurður hvaða möguleika ís-
lenskar afurðir eigi á markaði fyrir
lífræna framleiðslu vestanhafs segir
Mel Coleman, að íslenskt lambakjöt
sé að hans mati ein vinsælasta mat-
vara í Bandaríkjunum, einkum á aust-
urströndinni frá Boston til Wash-
ington.
Laurie Rock, markaðsstjóri einnar
verslunar Whole Foods í New York,
segir kaupendur að íslensku lamba-
kjöti upplýsta viðskiptavini sem fylg-
ist með umræðu um kjöt og kjötfram-
leiðslu og vilji vita hvaða efni séu í
kjötvörum sem þeir neyta. „Neytend-
ur af því tagi finnast um öll Bandarík-
in þótt flestir þeirra séu enn sem
komið er á austurströndinni. Ég tel að
sá hópur gæti stækkað til muna,“ seg-
ir hún.
Roger Berkowich, forstjóri og aðal-
eigandi veitingahúsakeðjunnar Legal
Sea Foods, notar líkingu um vín og
víndrykkju þegar spurt er hverjir
borði íslenskt lambakjöt. „Fjölmargir
neyta víns en aðeins hluti fólks kýs að
drekka hágæða vín. Íslenskt lamba-
kjöt passar að mínu mati þeim sem
þykir lamb gott en vilja kjöt af skepn-
um sem aldar eru í náttúrulegu um-
hverfi og fóðraðar á grasi.“
Mel Coleman segir íslenskt lamba-
kjöt mjög ofarlega hvað bragðgæði
varðar og að íslenskt umhverfi sé
ákjósanlegt til markaðssetningar.
„Fyrst er að fá neytandann til þess að
smakka. Ef bragðið líkar vill hann
vita meira um vöruna.
Að mínu mati eru bragðgæði
stærsti þátturinn í því að ná aftur til
viðskiptavinar. Í hefðbundnum stór-
verslunum eru gjarnan tilboð á borð
við „kauptu eitt fáðu annað frítt“ og
afsláttarmiðar, en ef varan er ekki
bragðgóð duga þau skammt. Íslend-
ingar eiga mikla möguleika, ekki síst
fyrir tilstilli markaðssetningar á um-
hverfinu sjálfu. Um leið og neytandi
er búinn að smakka tiltekna vöru og
mynda samband við hana er hægt að
fræða hann um hvernig og hvar hún
er upprunnin og framleidd. Þá er ekki
einasta verið að venja hann við bragð-
ið og upplifunina við að neyta vörunn-
ar heldur jafnframt að upplýsa um
hvað það er við framleiðsluna sem
gerir vöruna einstaka. Með því má
byggja upp langtímasamband við við-
skiptavininn,“ segir hann.
Laurie Rock tekur undir þetta og
segir meirihluta neytenda gera mat-
arinnkaup fyrst út frá bragðgæðum
og vilja fá upplýsingar um vöruna síð-
ar. „Aðeins lítið brot kaupenda leitar
sér upplýsinga fyrst og leitar síðan að
vörunni,“ segir hún.
Roger Berkowich segir mikilvægt
að kynna íslenskt lambakjöt í veit-
ingahúsum þar sem hæfileikaríkir
matreiðslumenn geti varpað sem
bestu ljósi á eiginleika þess. „Góður
lambakjötsréttur á veitingahúsi getur
leitt til þess að matargestur vilji
kaupa hráefnið sjálfur.“
Meiri bragðmunur
á lambakjöti en þorski
Berkowich segir ennfremur að
markaður fyrir kjötafurðir sé mun
stærri en fyrir sjávarfang og að mun
fleiri átti sig á bragðmuninum á ís-
lensku lambakjöti og öðru lambakjöti
en á íslenskum þorski eða þorski
veiddum í Norður-Atlantshafi. „Bragð-
munurinn er einfaldlega ekki það mik-
ill. Öðru máli gegnir um íslenska
bleikju sem náði strax miklum vin-
sældum þegar hún var sett á matseðil
hjá okkur.“
Viðmælendurnir segja að síðustu,
að erindi fyrirlesara og ráðstefnan
hafi verið upplýsandi. „Við getum
ekki annað en stutt land þar sem
frammámönnum er umhugað um að
gera landið sjálfbært. Við eigum langt
í land með það í Bandaríkjunum þótt
þau bandarísku fyrirtæki sem áttu
fulltrúa hér á ráðstefnunni vilji leggja
sitt af mörkum til þess að gera það
mögulegt,“ segir Laurie Rock.
Roger Berkowich kveðst hafa
dáðst að Íslandi um langt skeið og
segist hafa orðið var við fagmennsku
hérlendis í þessum efnum sem hann
hafi ekki alltaf orðið var við í heima-
landinu. „Ég tel að við getum lært
margt af ykkur og ef farið yrði út í út-
flutning myndu þeir sem hér sitja svo
sannarlega vilja taka þátt í því,“ segir
hann.
Mel Coleman segir fæð þeirra, sem
stunda vilja sjálfbæra starfsemi, slíka
að ráðstefna á borð við þessa sé ákjós-
anleg til þess að mynda tengsl, ekki
bara við Íslendinga heldur banda-
ríska aðila líka. „Nú gerum við okkur
bæði betri grein fyrir því hvað Ísland
hefur upp á að bjóða og hvað við í
Bandaríkjunum getum gert. Svona
ráðstefna eykur því á styrk okkar og
heilindi í því sem við erum að reyna að
áorka,“ segir Mel Coleman að end-
ingu.
Íslensk bleikja og lamb
vinsæl í Bandaríkjunum
AUGLÝSINGADEILD
netfang: augl@mbl.is eða sími 569 1111