Morgunblaðið - 10.01.2003, Blaðsíða 19
SUÐURNES
MORGUNBLAÐIÐ FÖSTUDAGUR 10. JANÚAR 2003 19
HAGKAUP hafa ákveðið að hætta
rekstri verslunar sinnar í Njarð-
vík. Ekki hefur verið sagt hvenær.
Öllu starfsfólki, um 35 manns,
verður sagt upp störfum en reynt
að bjóða þeim störf í öðrum Hag-
kaupsverslunum. Til tals hefur
komið að opna Bónusverslun í
Reykjanesbæ en engin ákvörðun
verið tekin um það.
Stjórnendur Hagkaupa til-
kynntu í gærmorgun starfsfólki
verslunarinnar í Njarðvík þá
ákvörðun að loka versluninni. Í
fréttatilkynningu frá fyrirtækinu
kemur fram að lokun hennar er
liður í framkvæmd stefnumörkun-
ar Hagkaupa til framtíðar. Vísað
er til þess að rúmt ár sé liðið frá
því Hagkaup opnaði stærstu versl-
un landsins í Smáralind og hafi
hún tekið mið af framtíðarstefnu-
mörkun fyrirtækisins þar sem
aukin áhersla sé á gott vöruúrval
og betri verslanir fyrir viðskipta-
vini. Ákvörðunin um lokun versl-
unar Hagkaupa í Njarðvík sé tekin
vegna þess að hún falli orðið illa að
stefnumörkuninni, með tilliti til
stærðar og vöruúrvals.
Í versluninni er bæði matvara
og sérvara og segir Finnur Árna-
son, framkvæmdastjóri Hagkaupa,
ekki unnt að bjóða þar það vöruúr-
val sem Hagkaup vilji hafa í versl-
unum sínum. Stjórnendur fyrir-
tækisins hafi staðið frammi fyrir
þeim valkostum að fjárfesta veru-
lega í versluninni til að gera hana
sambærilega öðrum Hagkaups-
verslunum eða að loka. Fram-
kvæmdastjórn Hagkaupa ákvað að
hætta rekstrinum.
Aðspurður tekur Finnur fram að
viðskipti hafi heldur dregist saman
í versluninni í Njarðvík en það sé
ekki ástæðan fyrir lokun hennar.
Ekki hefur verið upplýst hve-
nær versluninni verður lokað, það
verður tilkynnt á síðari stigum.
Finnur lítur svo á að Suðurnesin
og höfuðborgarsvæðið séu á sama
markaðssvæði og býður viðskipta-
vini fyrirtækisins á Suðurnesjum
velkomna í Hagkaupsbúðir á höf-
uðborgarsvæðinu, til dæmis í
Smáralind.
„Eins og köld vatnsgusa
framan í starfsfólkið“
Um 35 starfsmenn vinna hjá
Hagkaupum í Njarðvík. Finnur
segir að ganga þurfi frá starfs-
lokum við fólkið en reynt verði eft-
ir fremsta megni að leysa mál
þess. Þannig verði reynt að bjóða
starfsfólkinu störf í öðrum versl-
unum Hagkaupa en þær eru á höf-
uðborgarsvæðinu.
„Við erum harmi slegnir. Það fá
væntanlega 35 starfsmenn upp-
sagnarbréf. Tilkynningin kom eins
og köld vatnsgusa framan í þá,“
segir Guðbrandur Einarsson, for-
maður Verslunarmannafélags Suð-
urnesja. Hann segir þetta alvar-
legt mál fyrir svæðið þar sem
atvinnuleysi hafi verið mikið, ekki
síst meðal kvenna. Hagkaup séu
stór kvennavinnustaður og því
komi þessi ákvörðun sér einkar
illa.
Í nóvember voru 177 konur at-
vinnulausar og svaraði það til 5%
af vinnuafli á svæðinu og var það
hið mesta á landinu. Síðan hefur
konum fjölgað á atvinnuleysisskrá
og þær voru orðnar 224 í gær.
Guðbrandur segir að í ljósi
þessa séu takmarkaðir vinnumögu-
leikar í bili fyrir það fólk sem
missir vinnuna hjá Hagkaupum.
Hann bindur þó vonir við að ein-
hverjir kunni að fá vinnu hjá Bón-
usi ef ákveðið verður að setja upp
Bónusverslun í húsnæðinu sem
Hagkaup yfirgefa. Það verði hins
vegar ekki margir starfsmenn.
Ekki náðist í Guðmund Mar-
teinsson, framkvæmdastjóra Bón-
uss, til að spyrja um áform þess
fyrirtækis. Á fréttavef Víkurfrétta
er haft eftir honum að málið sé í
skoðun en engin ákvörðun hafi
verið tekin.
Húsnæði Hagkaupa er í eigu
Fasteignafélagsins Stoða hf. þar
sem Baugur hf., móðurfyrirtæki
Hagkaupa, Bónuss og fleiri fyr-
irtækja, er stærsti hluthafinn.
Ákveðið að loka
verslun Hagkaupa
Njarðvík
Ljósmynd/Hilmar Bragi
Verslun Hagkaupa er á Fitjum, við innkomuna í Reykjanesbæ.
Litlir atvinnu-
möguleikar á
svæðinu fyrir þá
35 starfsmenn sem
sagt verður upp
HREPPSNEFND Vatnsleysustrand-
arhrepps telur að Vatnsleysustrand-
arvegur beri ekki þann 90 kílómetra
hraða sem þar er leyfður og hefur
skorað á Vegagerðina að lækka há-
markshraðann niður í 70 kílómetra.
Vatnsleysustrandarvegur, þjóð-
vegur númer 420, liggur frá þorp-
inu í Vogum með ströndinni og inn á
Reykjanesbraut við Kúagerði. Við
Voga var nýlega sett upp skilti sem
sýndi að hámarkshraði væri 90 kíló-
metrar.
Birgir Þórarinsson, varaoddviti
Vatnsleysustrandarhrepps og íbúi í
Minna-Knarrarnesi, varð hissa á
þessu og vakti athygli Umferð-
arráðs og Vegagerðarinnar á mál-
inu og tók það auk þess upp í
hreppsnefnd.
Í orðsendingunni kemur fram að
hann ekur eftir þessum vegi á hverj-
um degi, stundum oft á dag, og viti
að vegurinn beri þennan hraða eng-
an veginn. Bendir Birgir á að veg-
urinn sé mjór og víkja þurfi vel út í
kant þegar bíl sé mætt auk þess sem
hættulega krappar beygjur séu á
honum og blindhæð. Hámarkshrað-
inn sé eigi að síður sá sami og á
Reykjanesbrautinni.
Fram kemur í svari Vegagerð-
arinnar að 90 kílómetra hámarks-
hraði sé á þessum vegi. Nýtilkomið
hraðamerki er skýrt með því að í
haust hafi verið tekin upp sú vinnu-
regla að merkja hámarkshraða út
úr þéttbýli. Áður hafi merki um að
þéttbýli væri lokið verið látið duga.
Hreppsnefndin hefur nú skorað á
Vegagerðina að láta lækka há-
markshraða á þessari leið niður í 70
km. Endanleg ákvörðun er hins veg-
ar í höndum dómsmálaráðuneytis
sem ákveður leyfilegan hámarks-
hraða á þjóðvegum utan þéttbýlis.
Morgunblaðið/Helgi Bjarnason
Gefið er til kynna að óhætt sé að aka á 90 kílómetra hraða þegar komið er
út úr þéttbýlinu í Vogum en vegurinn er þó ekki talinn bera hraðann.
Óska eftir að hámarks-
hraði verði lækkaður
Vatnsleysuströnd
NOKKRIR íbúar í Reykjanesbæ
sem þurfa á læknisþjónustu að
halda standa í dag fyrir mótmæl-
um gegn læknisleysi á heilsu-
gæslustöð Heilbrigðisstofnunar
Suðurnesja í Keflavík.
Helga Valdimarsdóttir, öryrki í
Njarðvík, segir að ástandið í
heilsugæslumálum sé óviðunandi.
Fólk þurfi á læknisþjónustu að
halda, ekki síst fólk með börn,
aldraðir, öryrkjar og aðrir sjúk-
lingar.
„Við fáum ekkert að vita hvað er
verið að gera. Ef fólk vissi það
yrði það hugsanlega rólegra,“ seg-
ir Helga. Hún segir að um tíu
manna hópur standi fyrir þessum
mótmælum sem hefjast á heilsu-
gæslustöðinni klukkan þrjú í dag.
Þau muni skiptast á um að sitja
þar þangað til einhver svör fáist
og vonast til að fleiri leggi þeim
lið.
Tveir læknar starfa nú á heilsu-
gæslustöðinni auk unglæknis sem
er þar fram að helgi. Fram hefur
komið að von er á þriðja lækninum
til starfa um næstu mánaðamót.
Mótmæli á heilsu-
gæslustöðinni í dag
Keflavík
ATVINNA
mbl.is