Morgunblaðið - 25.09.2003, Blaðsíða 4

FRÉTTIR
4 FIMMTUDAGUR 25. SEPTEMBER 2003 MORGUNBLAÐIÐ
SAMKEPPNI meðal sveitarfélaga
um rafrænt samfélag lauk í gær er
Valgerður Sverrisdóttir, iðnaðar- og
viðskiptaráðherra, tilkynnti hvaða
sveitarfélög hefðu verið valin til þátt-
töku í þessu þróunarverkefni til
næstu þriggja ára. Tveir hópar sex
sveitarfélaga voru valdir; annars
vegar eru það Árborg, Hveragerði
og Ölfus undir heitinu „Sunnan 3“ og
hins vegar Húsavík, Aðaldælahrepp-
ur og Þingeyjarsveit er nefna verk-
efni sitt „Virkjum alla“.
Valgerður upplýsti m.a. að fram-
lag ríkisins til þessara verkefna yrði
120 milljónir sem ættu að fara til
framkvæmda á þriggja ára tímabili.
Framlag sveitarfélaganna yrði
nokkru hærra, eða um 180 milljónir,
þannig að verðmæti verkefnanna
væri um 300 milljónir króna í heild.
Valgerður sagði að í ljósi kannana,
sem hefðu sýnt að notkun upplýs-
ingatækni á landsbyggðinni væri
talsvert á eftir höfuðborgarsvæðinu,
hefði verið lagt til við gerð byggða-
áætlunar að ráðast í þetta verkefni.
Í upphafi þessa árs tóku 13 byggð-
arlög þátt í forvali og síðan voru fjög-
ur þeirra valin til þátttöku í sam-
keppninni. Fékk hvert þeirra 1,6
milljónir til að fullvinna hugmyndir
sínar. Sérstök valnefnd fór yfir verk-
efnin og valdi þau tvö sem áfram
hljóta stuðning. Hin tvö voru Snæ-
fellsbær og Grundarfjörður.
Verkefnið „Sunnan 3“ skiptist í
fjögur undirverkefni sem ná til allra
íbúa sveitarfélaganna þriggja, sem
eru um 10 þúsund talsins. Í fyrsta
lagi er um að ræða rafrænt þjónustu-
torg fyrir íbúana. Í öðru lagi á að
stuðla að rafrænu atvinnulífi þar
sem m.a. verður byggt upp svonefnt
„skrifstofuhótel“ til að koma til móts
við þarfir íbúa svæðisins sem starfa
t.d. á höfuðborgarsvæðinu en vilja
vinna nokkra daga í viku í heima-
byggð. Í þriðja lagi á að vinna að skil-
virkari stjórnsýslu með aukinni sam-
vinnu sveitarfélaganna og loks er
markmiðið hjá „Sunnan 3“ að auka
samkennd meðal barna og unglinga
á svæðinu og styrkja forvarnarstarf
með rafrænum lausnum.
Samkvæmt viðskiptaáætlun er
fylgdi umsókn Árborgar, Hvera-
gerðis og Ölfuss er talið að heildar-
ábati verkefnisins geti numið um 223
milljónum króna þegar til lengri
tíma er litið.
Aðdragandi sameiningar
í S-Þingeyjarsýslu?
Sveitarfélögin Aðaldælahreppur,
Húsavíkurbær og Þingeyjarsveit
ákváðu að vinna í sameiningu að
uppbyggingu á rafrænu samfélagi og
stuðla þannig að eflingu þekkingar
og menntunar sem lið í atvinnuþróun
og bættum lífsgæðum. Reinhard
Reynisson, bæjarstjóri á Húsavík,
útilokaði ekki á blaðamannafundi í
gær, aðspurður, að verkefnið gæti
verið „ágætur aðdragandi“ að því að
skoða sameiningu þessara sveitarfé-
laga á næstu árum.
Þingeyingar ætla að setja upp raf-
ræn samfélagstorg með því að efla
þjónustuveitur sveitarfélaganna,
koma á fræðsluveitu fyrir skólana,
þjónustuveitur heilsugæslu með t.d.
fjarlækningum og útgáfu rafrænna
lyfseðla, verkefninu er ætlað að brúa
kynslóðabilið og koma á af stað sjálf-
stæðum lykilverkefnum.
Rafrænt samfélag í
sex sveitarfélögum
Morgunblaðið/Jim Smart
Fulltrúar sigurvegaranna, Reinhard Reynisson, bæjarstjóri Húsavíkur, og
Orri Hlöðversson, bæjarstjóri Hveragerðis, hlýða ásamt Valgerði Sverris-
dóttur á umsögn Sveins Þorgrímssonar, formanns valnefndar.
TENGLAR
.....................................................
www.vidskiptaraduneyti.is
www.husavik.is
SVEITARFÉLÖGIN í S-Þingeyj-
arsýslu sameinuðust í verkefninu
„Virkjum alla“ en þau hafa jafn-
framt ákveðið að gefa hinu rafræna
samfélagi nafnið „Skjálfandi í
faðmi þekkingar“.
Er það jafnt vísun til svæðisins
sem liggur að Skjálfandaflóa, í
þekkinguna sem verður lykilþáttur
fyrir samfélagið og myndræn vísun
í faðminn, „þá umhyggju sem verk-
efnið mun fá hjá íbúum og sveit-
arstjórnum byggðarlagsins“, eins
og segir í umsókn Þingeyinga til
verkefnisstjórnar hins rafræna
samfélags.
„Skjálfandi í faðmi þekkingar“
„VILTU gera svo vel að tala hægar,“ var fyrsta setn-
ingin sem Saul Isac Gutierrez frá Nikaragva lærði þeg-
ar hann kom til landsins fyrir rúmu ári. Hann segir það
hafa verið þýðingarmikið að biðja fólk um að tala skýrt
svo hann gæti bæði skilið það og lært íslensku í dag-
legum samskiptum. Eftir að hafa farið á íslensku-
námskeið hitti hann Brodda Sigurðsson, upplýsinga-
fulltrúa Alþjóðahússins, og skiptust þeir á að tala á
móðurmáli sínu við hvor annan; Saul kenndi Brodda
spænsku og Broddi kenndi Saul íslensku.
Í dag ætlar Alþjóðahúsið að opna formlega verkefnið
tungumálaskipti. Fólk sem vill læra nýtt tungumál
skráir sig hjá Alþjóðahúsinu eða á heimasíðunni ahus.is
og tilgreinir hvaða tungumál það hefur áhuga á. Al-
þjóðahúsið leiðir svo fólk saman, því að kostn-
aðarlausu. Þá geta Íslendingar kennt útlendingum ís-
lensku um leið og þeir æfa sig í að tala erlent mál. Í
kvöld verður fyrsta tungumálaskiptakvöldið á Kaffi
Kúltúre á Hverfisgötu 18. Þá geta áhugasamir mætt og
reynt að finna æfingafélaga eða mælt sér mót við þá
sem þeir hafa þegar rætt við.
Broddi segir þessa aðferð gefast mjög vel og hann
hafi sjálfur lært mikið í spænsku á fundum sínum með
Saul. Fólk kvarti oft yfir því að fá ekki næga æfingu í
að tala íslensku og þetta sé líka gott tækifæri fyrir það
að hitta Íslendinga og spjalla. Þessi aðferð hafi marga
kosti og getur rofið einangrun sumra. Það skipti líka
sáralitlu máli hversu vel fólk kunni tungumálið sem
það vill læra.
Ýmsar aðferðir við málanámið
Það er undir fólkinu sjálfu komið hvernig þessir
fundir fara fram segir Broddi. Sumir kjósa að taka með
sér kennslubækur, aðrir lesa saman yfir erlendar frétt-
ir eða þá bara æfa sig í daglegum samskiptum.
Saul talaði enga ensku þegar hann kom hingað til
lands og segir það hafa verið erfitt að fara á íslensku-
námskeið þar sem kennarinn talaði bara ensku og ís-
lensku. Hann hafi lært mest af því að tala við Íslend-
inga og sérstaklega krakka þegar hann vann hjá
Íþrótta- og tómstundaráði Reykjavíkur. Hann segir að
Íslendingar eigi ekki að vera feimnir við að tala móð-
urmál sitt við útlendinga og hann er þakklátur þegar
honum er leiðbeint svo hann geti talað réttar.
Broddi segist hafa fræðst mikið um Nikaragva á
meðan hann æfði sig í að tala spænsku við Saul.
Morgunblaðið/Kristinn
Broddi Sigurðsson og Saul Isac Gutierrez segja tungumálaskipti bjóða upp á marga möguleika.
Tungumálapörun í Alþjóðahúsinu
Tilraun með óhefðbundna aðferð við málanám
ÆSKILEGT er að tekið verði upp
mismunandi gjald á leikskólum í
Reykjavík eftir aldri þeirra enda er
dvalarkostnaður yngri barna hærri
en eldri barna og því sækist nokkur
hópur foreldra barna á einkareknum
leikskólum eftir því af fjárhagsleg-
um ástæðum fremur en faglegum að
koma börnum sínum að á Leikskól-
um Reykjavíkur en þar er gjaldskrá-
in lægri. Þá er eðlilegt að fella niður
sérstakt námsmannagjald, þ.e. nið-
urgreitt gjald, á leikskólum í þeim
tilvikum þar sem annað foreldrið er í
námi enda ekki fullnægjandi rök fyr-
ir því að þessi hópur sé í brýnni þörf
fyrir meiri niðurgreiðslu en til að
mynda hjón í láglaunastörfum.
Þetta er meðal þess sem fram
kemur í skýrslu starfshóps um end-
urskoðun gjaldskrár Leikskóla
Reykjavíkur, styrki til einkarekinna
leikskóla og niðurgreiðslur vegna
daggæslu í heimahúsum.
Gjaldskrárflokkum verði
fækkað úr ellefu í fjóra
Starfshópurinn telur brýnt að
sjónarmið á bak við gjaldskrá Leik-
skóla Reykjavíkur séu skýr og að
hún sé tengd raunkostnaði við vistun
barna. Þá telur starfshópurinn nauð-
synlegt að fækka verulega gjald-
skrárflokkum og leggur til að fæð-
isgjald verði lagt á sérstaklega.
Lagðar voru fram fjórar mismun-
andi tillögur sem allar fela í sér sömu
grundvallarbreytingarnar.
Í öllum tillögum er gert ráð fyrir
niðurfellingu á námsmannagjaldi
þar sem aðeins annað foreldrið er í
námi og næði sú breyting til tæplega
500 barna námsmanna og hefði í för
með sér verulega hækkun gjalda.
Í annan stað er gengið út frá því að
gjaldflokkum verði fækkað frá því
sem nú er eða úr ellefu í fjóra, þ.e. að
foreldrar geti valið um fjögurra, sex,
átta eða níu stunda vistun.
Í þriðja lagi er svo gert ráð fyrir
að gjaldskrá verði sundurliðuð með
tilliti til kennslu og fæðis en þannig
má að mati starfshópsins gera kostn-
að við kennslu sýnilegri og auðveld-
ara verður að bregðast við breyting-
um á fæðiskostnaði án þess að þurfa
að hnika til gjaldskránni sjálfri.
Í fjórða lagi er gert ráð fyrir að að
foreldrar með fötluð börn (1. flokk-
ur) fái ekki lengur sömu niður-
greiðslur og einstæðir foreldrar en
ástæðan er sú að umönnunarbætur
frá Tryggingastofnun skerðast ekki
lengur ef börn njóta þjónustu á borð
við leikskóla.
Endurskoðun gjaldskrár leikskóla
Mismunandi
gjald eftir
aldri barna
Morgunblaðið/Ómar
JÓN Kristjánsson, heilbrigðis-
og tryggingamálaráðherra,
segist hafa átt góðan fund með
forsvarsmönnum Geðhjálpar í
gær, en þar var m.a. rætt um
það hvernig ráðuneytið gæti
stutt við starfsemi Geðhjálpar.
Eins og fram kom í Morgun-
blaðinu í gær lýstu forráða-
menn Geðhjálpar yfir von-
brigðum með þá ákvörðun
ráðuneytisins að endurnýja
ekki þjónustusamning ráðu-
neytisins og Geðhjálpar vegna
tveggja stöðugilda iðjuþjálfa.
Jón Kristjánsson segir í sam-
tali við Morgunblaðið að sá
þjónustusamningur hafi átt við
um iðjuþjálfa og segir ráðu-
neytið hins vegar tilbúið til að
veita Geðhjálp fjárhagslegan
stuðning með öðrum hætti.
Stefnt er að því að forsvars-
menn Geðhjálpar hitti embætt-
ismenn ráðuneytisins í dag til
að fara betur yfir þau mál.
Þverfaglegt teymi
í undirbúningi
Jón segir ennfremur að á
fundinum hafi verið farið yfir
önnur verkefni sem ráðuneytið
standi að á þessum vettvangi.
Jón kveðst m.a. hafa gert for-
svarsmönnum Geðhjálpar
grein fyrir því að ráðuneytið
væri að undirbúa stækkun
Barna- og unglingageðdeildar
LSH. Þá væri verið að koma af
stað þverfaglegu teymi, sem
hefði það verkefni að aðstoða
fólk sem væri að útskrifast af
geðdeildum.
Áfram
stutt við
Geðhjálp