Morgunblaðið - 25.09.2003, Blaðsíða 10
FRÉTTIR
10 FIMMTUDAGUR 25. SEPTEMBER 2003 MORGUNBLAÐIÐ
HUGMYND Ívars Arnar Guð-
mundssonar arkitekts um viðbygg-
ingu við Sundhöllina við Barónsstíg,
sem greint var frá á forsíðu Morg-
unblaðsins á þriðjudag, fær misjöfn
viðbrögð þeirra arkitekta sem rætt
var við en borgarstjóri og formaður
skipulags- og byggingarnefndar
bregðast vel við. Er hugmyndin með-
al nokkurra annarra sem kynntar
eru á yfirlitssýningu í Bankastræti á
vegum Aflvaka um uppbyggingu í
miðborg Reykjavíkur.
Pétur H. Ármannsson, arkitekt og
deildarstjóri byggingarlistardeildar
Listasafns Reykjavíkur, sem jafn-
framt á sæti í húsafriðunarnefnd rík-
isins, gerir engar alvarlegar athuga-
semdir við hugmynd Ívars Arnar. Þó
að Sundhöllin hafi nýlega verið frið-
uð, ásamt sex öðrum byggingum
Guðjóns Samúelssonar, séu mörg
fordæmi fyrir viðbyggingum við frið-
aðar byggingar með farsælum hætti,
samanber Alþingishúsið. Virðing
gagnvart Guðjóni þurfi samt ekki
endilega að felast í því að „apa“ bók-
staflega eftir honum. „Mér finnst
stærðarhlutföllin í þessari viðbygg-
ingu, og eðli þeirra tenginga sem
þarna eru settar fram, vera þess eðlis
að þetta er hugmynd sem alveg er
hægt að skoða, auk þess sem ný-
byggingin snertir gamla húsið á frek-
ar hógværan hátt. Hins vegar er
álitamál hvort nýbyggingin á að elta
stílinn á gömlu byggingunni jafnbók-
staflega og gert er í þessari tillögu.
Mér finnst að hún gæti alveg eins
verið fullgildur nútímaarkitektúr á
sama hátt og til dæmis viðbygging
Alþingishússins,“ segir Pétur.
Fjölföldun ekki metnaðarfull
Pétur telur að frá sjónarhóli hús-
verndar sé það ekki fráleit hugmynd
að byggja við Sundhöllina. Slíkar
hugmyndir hafi komið upp áður.
„Ein besta leiðin til að tryggja varð-
veislu húsa er að þau séu notuð og
þjóni einhverju markverðu hlutverki
í því samfélagi sem þau tilheyra.“
Jóhannes Þórðarson, arkitekt og
einn eigenda Glámu-Kím, segir að sé
það raunin að það vanti meira vatn í
miðbæinn þá sé hugmyndin um úti-
sundlaug í nábýli við Sundhöllina
góð. Sú hugmynd sé ekki ný af nál-
inni samanber meðfylgjandi tillögu
Sigurðar Guðmundssonar og Eiríks
Einarssonar frá fimmta áratug síð-
ustu aldar. „Virðing
fyrir góðu verki Guð-
jóns Samúelssonar
felst hins vegar ekki í
að endurtaka það sem
fyrir er. Að fjölfalda
gluggasetningu í
tæknikjallara Sund-
hallarinnar er ekki
metnaðarfullt verk,“
segir Jóhannes.
Halldór Gíslason,
arkitekt og deildarfor-
seti hönnunardeildar
Listaháskóla Íslands,
segist ekki sjá mikil
vandkvæði á að reisa
byggingu eftir hug-
mynd Ívars Arnar þó
að sjálf Sundhöllin sé friðuð. Hug-
myndin sé í anda Guðjóns Sam-
úelssonar.
„Hann er ekki með einhvern brjál-
æðisgang eins og sumir kollegar okk-
ar vilja. Stundum heppnast þetta vel
eins og viðbyggingar við Alþingi og
Þjóðminjasafnið. Ívar gerir líka ráð
fyrir líkamsræktarstöð undir sund-
lauginni, sem er áhugavert. Friðaði
hluti Sundhallarinnar stendur nokk-
urn veginn sjálfstæður og hann yf-
irkeyrir ekki bygginguna þó að land-
ið í kring sé yfirkeyrt. Þetta er ein
leið til að auka þjónusturýmið í borg-
inni,“ segir Halldór.
Hið minnsta fimm ár
í framkvæmdir
Þórólfur Árnason borgarstjóri og
Steinunn Valdís Óskarsdóttir, for-
maður skipulags- og byggingar-
nefndar Reykjavíkur, taka bæði vel í
hugmynd Ívars Arnar og telja hana
skemmtilega og spennandi. Þó sé að-
eins um hugmynd að ræða sem að
auki sé fyrir utan gildandi deiliskipu-
lag á svæðinu. Samkvæmt fram-
kvæmdaáætlun geti verið nokkur ár í
að byggt verði við Sundhöllina, eða
eins og Steinunn segir: „Ég lít meira
á þetta sem framtíðarmúsík.“ Benda
þau á þær miklu framkvæmdir sem
eru við Laugardalslaugina, auk þess
sem ákveðið hafi verið að endurbæta
Vesturbæjarlaugina. Telur borgar-
stjóri að hið minnsta fimm ár geti
verið í framkvæmdir við Sundhöllina.
Þórólfur segist hafa séð hugmynd-
ina áður innan borgarkerfisins, eins
og flestar aðrar tillögur á yfirlitssýn-
ingunni í Bankastræti. Þær séu flest-
ar skemmtilegar og áhugaverðar og
sýni mikinn sköpunarkraft meðal
arkitekta. Þeir sjái mikla möguleika í
deiliskipulagi víða um borgina og það
sé hið besta mál.
„Mér líst vel á að stækka Sundhöll-
ina og gera þar útiaðstöðu. Þegar
hafa verið settir upp pottar, sem ég
hef sannreynt að er mjög gott að
vera í, en síðan yrði ekki verra að
geta fengið sér líka sundsprett utan-
húss. Mannvirkið liggur vel við sólu,“
segir borgarstjóri.
Frumkvæðinu fagnað
Steinunn Valdís segir hugmyndina
sýna að hægt sé að gera hluti við
Sundhöllina sem bæta hana verulega
og koma til með að auka aðsóknina.
„Þau viðbrögð sem ég hef fengið eru
bara mjög jákvæð,“ sagði Steinunn
og telur að ekkert gerist í þessu á
næstu þremur árum miðað við fjár-
hagsáætlun borgarinnar. „Við mun-
um ráðast í endurgerð og viðbætur á
Sundhöllinni. Þetta er bara spurning
um hvenær það gerist. Með fjölgun
íbúa á þessu svæði þarf að huga að
ýmsum stoðþáttum sem tengjast af-
þreyingu og frítíma fólks. Ég fagna
því þegar fólk sýnir áhuga og frum-
kvæði að því að gera svona lagað á
miðborgarsvæðinu. Einkaaðilar hafa
greinilega trú á miðborginni og telja
að hún eigi möguleika í framtíðinni.“
Viðbygging Ívars Arnar séð að framanverðu frá Barónsstíg, þar sem ekki virðist fara mikið fyrir henni við hlið spennistöðvar Orkuveitunnar og Heilsuverndarstöðvarinnar.
Borgarstjóri bregst vel við
en arkitektar ósammála
Ekki verður þörf á að fjarlægja nærliggjandi byggingar því allstór gras-
bali er nú sunnan við Sundhöllina.
Hugmynd um viðbyggingu Sundhallarinnar sögð í anda
Guðjóns Samúelssonar, of mikið að mati sumra arkitekta
Þórólfur Árnason:
„Skemmtileg
hugmynd.“
Steinunn Valdís
Óskarsdóttir:
„Framtíðarmúsík.“
Halldór Gíslason:
„Enginn brjál-
æðisgangur.“
Jóhannes Þórðarson:
„Endurtekning.“
Pétur H. Ármannsson:
„Eltir stíl Guðjóns.“
Tölvumyndir/Ívar Örn Guðmundsson
ÞETTA er ekki í fyrsta sinn sem fram koma
hugmyndir um viðbyggingu við Sundhöllina.
Morgunblaðið birtir hér uppdrátt af nærri 60
ára gamalli hugmynd arkitektanna Sigurðar
Guðmundssonar og Eiríks Einarssonar, sem
þeir unnu á árunum 1940 til 1944. Ekkert varð
þó af þeim áformum en samanburðurinn er
engu að síður skemmtilegur. Sjálf Sundhöllin
var tekin í notkun 1937 og hönnuð af Guðjóni
Samúelssyni, þáv. húsameistara ríkisins, á ár-
unum 1929 til 1937.
Pétur H. Ármannsson arkitekt segir að Sig-
urður og Eiríkur hafi gert ráð fyrir stórri úti-
sundlaug og baðstað við hlið Sundhallarinnar
en þetta hafi verið áður en sjónum var beint að
sundlaug í Laugardal, sem síðar reis, og áður
en Spennistöð Orkuveitu Reykjavíkur og
Heilsuverndarstöðin risu við Barónsstíg.
Sextíu ára
gömul tillaga
Teikning/Sigurður Guðmundsson og Eiríkur Einarsson