Morgunblaðið - 08.10.2003, Blaðsíða 25

LISTIR
MORGUNBLAÐIÐ MIÐVIKUDAGUR 8. OKTÓBER 2003 25
FYRSTU tónleikar Stórsveitar
Reykjavíkur á þessu starfsári fara
fram á Kaffi Reykjavík í kvöld kl.
21. Þá stýrir sveitinni einn af
fremstu djasstrompetleikurum
heimsins, Tim Hagans frá New
York. Hann mun stjórna sveitinni í
eigin verkum auk þess að leika á
trompet.
Hagans hefur leikið með stór-
sveitum Stan Kenton, Woody Her-
man, Thad Jones og Ernie Wilkins,
svo einhverjir séu nefndir. Hann
hefur einnig leikið í minni hljóm-
sveitum með þekktustu nöfnum
djasstónlistar nútímans, s.s. saxó-
fónleikaranum Joe Lovano. Hagans
er listrænn stjórnandi Norrbotten-
stórsveitarinnar í Svíþjóð, en hún
er önnur tveggja atvinnustórsveita
þar í landi. Tim Hagans er fyrrum
prófessor við Berklee Collega of
music í Boston.
Tónlist Tim Hagans er sögð nú-
tímastórsveitadjass í hæsta gæða-
flokki. Þess má geta að geisladiskar
hans eru gefnir út af Blue Note-
útgáfunni í New York. Hagans hef-
ur verið tilnefndur til Grammy-
verðlaunanna fyrir tónlist sína.
Tim Hagans með Stórsveitinni
Morgunblaðið/Sverrir
Trompetleikarinn Tim Hagans á æfingu með Stórsveit Reykjavíkur fyrir tónleikana á Kaffi Reykjavík í kvöld.
NÝ HEIMASÍÐA fræðsludeildar
Þjóðleikhússins var opnuð í gær á
Smíðaverkstæðinu af Önnu Flosa-
dóttur sem kennir leiklist í Hlíða-
skóla og Benedikt Gröndal, nem-
anda í Kvennaskólanum.
Að sögn Vigdísar Jakobsdóttur,
deildarstjóra fræðsludeildarinnar,
er þetta fyrsti alhliða gagnabankinn
um leiklist sem kennurum og öðrum
áhugasömum um leiklist stendur til
boða.
„Fræðsludeild Þjóðleikhússins
var stofnuð fyrir tæpum tveimur
árum með stuðningi Menningar-
sjóðs Íslandsbanka. Fræðsludeildin
hefur frá upphafi lagt kapp á að
eiga gott samstarf við kennara bæði
á grunn- og framhaldsskólastigi,
með það að markmiði að efla leik-
listarstarf í íslenskum skólum.
Heimasíðunni, www.fd.leikhusid.is,
er ætlað að efla enn frekar þessi
góðu samskipti við kennara. En al-
menningur ætti ekki síður að njóta
góðs af, því heimasíðan er hafsjór
upplýsinga um allt sem gerist bak-
við tjöldin í leikhúsinu, og veitir að-
gang að miklu efni um leiklist úr
ýmsum áttum,“ segir Vigdís. Til að
gera heimsókn á heimasíðuna enn
skemmtilegri þá er það leikhúsálf-
urinn sem leiðbeinir gestum um
efni síðunnar.
Opna bakdyrnar upp á gátt
„Með heimasíðunni stígur
fræðsludeildin mjög ákveðið skref í
að gera leikhúsið og leiklistina að-
gengilega, og þar með að því að
uppfylla markmið sín. Þar er m.a.
að finna lýsingar á störfum bak-
sviðs, upplýsingar um sögu Þjóð-
leikhússins, leiklistaræfingar og
leiki, skjámyndir og skemmtiefni,
viðtöl við leikara, ítarefni og
fræðsluefni tengt sýningum í hús-
inu, svo fátt eitt sé nefnt.“
Vigdís kveðst þess fullviss að
leiðin fram á við fyrir leikhúsið sé
að opna bakdyrnar upp á gátt. „Al-
menningur og ungt fólk hefur mik-
inn áhuga á því sem fer fram bak-
sviðs og öllu starfinu í leikhúsinu og
ég tel að áhuginn eflist með því að
auka upplýsingarnar. Á heimasíð-
unni munum við því leggja áherslu
á viðtöl við leikara í þeim sýningum
sem eru í gangi, alls kyns ítarefni
tengt sýningunum og upplýsingar
um starfið sem unnið er að tjalda-
baki. Dagbók aðstoðarleikstjóra í
leikritinu Pabbastrák er t.d. þegar
komið á heimasíðuna og fleira slíkt
efni mun bætast við og endurnýjast
jafnóðum og starfinu fleygir fram.“
Vigdís segir hlutverk fræðslu-
deildarinnar vera að búa til efni fyr-
ir kennara, halda námskeið og
flytja inn leiðbeinendur til að halda
námskeið um leiklist í skólum og
leiklist sem kennsluaðferð.
Mikill áhugi meðal kennara
Vigdís segir að í samanburði við
aðrar listgreinar sé þáttur leiklist-
arinnar rýr í íslenskum skólum.
„Þrátt fyrir þetta er mikill áhugi
hjá kennurum, skólastjórnendum
og ekki síst nemendunum sjálfum
fyrir því að nota leiklist, bæði sem
kennslutæki og sem listform.
Þennan áhuga vill fræðsludeild
Þjóðleikhússins virkja. Þetta hefur
meðal annars verið gert með því að
standa fyrir reglulegum námskeið-
um fyrir kennara og leikhúslista-
fólk sem sinnir kennslu.
Í fyrravetur héldum við ein 5–6
námskeið fyrir kennara í grunn- og
framhaldsskólum sem öll voru mjög
vel sótt. Í vetur höldum við áfram
með slík námskeið og bætum einnig
við leiksmiðjum fyrir framhalds-
skólanema og leikritunarnámskeið-
um fyrir kennara sem er ætlað sem
eins konar undirbúningur fyrir ör-
leikritasamkeppni framhaldsskóla-
nemanna. Skólarnir hafa svo mikið
sjálfsákvörðunarvald og geta mótað
námið að talsverðu leyti eftir eigin
höfði. Við getum boðið fagþekk-
inguna og miðlað kunnáttunni til að
gera kennurunum kleift að kenna
þetta og hrinda áhuga sínum í fram-
kvæmd í skólunum.“
„Heimasíðan er hafsjór
upplýsinga um leiklist“
Morgunblaðið/Jim Smart
Vigdís Jakobsdóttir, deildarstjóri fræðsludeildar, og leikhúsálfurinn
(Brynhildur Guðjónsdóttir) bregða á leik við opnun heimasíðunnar í gær.