Morgunblaðið - 11.03.2004, Blaðsíða 4
FRÉTTIR
4 FIMMTUDAGUR 11. MARS 2004 MORGUNBLAÐIÐ
ÚTLIT er fyrir að umhverfismat
Sundabrautar verði afgreitt hjá
Skipulagsstofnun á næstu vikum,
jafnvel dögum, að sögn Steinunnar
Valdísar Óskarsdóttur, formanns
skipulags- og byggingarnefndar
Reykjavíkurborgar.
Eins og fram hefur komið er
ekki samstaða milli Vegagerðar-
innar og borgarinnar um hvar
brautin skuli liggja. Borgaryfir-
völd hafa lagt áherslu á svokallaða
ytri leið sem yrði lögð í hábrú eða
botngöng og tæki land austan við
núverandi húsnæði IKEA, færi yf-
ir Kleppsvík og kæmi á land við
Gufuneshöfða. Áætlaður kostnað-
ur við þessa leið er á bilinu 10,5–
14,5 milljarðar en Vegagerðin vill
að valin verði svokölluð landmót-
unarleið eða innri leið sem muni
kosta um 7,5–9,5 milljarða. Sam-
kvæmt henni yrði tekið land við
Gelgjutanga, farið yfir ósa Elliða-
áa og aftur að landi í Gufunes-
höfða.
Óvíst hvenær framkvæmdir
geta hafist
Ekki hefur verið tekin ákvörðun
um hvenær hafist verður handa við
framkvæmdir. Formaður skipu-
lags- og byggingarnefndar hefur
lýst því yfir að hún vilji flýta fram-
kvæmdinni og að hún verði unnin í
einum áfanga í stað þriggja. Sam-
gönguráðherra hefur lýst því yfir
að ákvörðun um fyrstu skrefin
verði tekin í haust en að næstu
áfangar séu lengra inn í framtíð-
ina. Aðstandendur sameinaðs
hafnarfyrirtækis, Reykjavíkur-
hafnar, Akraneshafnar, Borgar-
neshafnar og Grundartangahafn-
ar, alls tíu sveitarfélög, vilja að
lagningu Sundabrautar verði flýtt.
Afgreiðsla á umhverfismati Sundabrautar hjá Skipulagsstofnun
Niðurstaða á
næstu dögum
eða vikum
Hér sést svokölluð innri leið, nær ósum Elliðaáa, og ytri leið sem er
fjær, þ.e. útfærsla með hábrú, ekki botngöngum.
ÁRNI Þór Sigurðsson, forseti
borgarstjórnar, segir að engin
ákvörðun hafi verið tekin um það
hvort grjótnámi verði hætt í
Geldinganesi, nú þegar liggur
fyrir að þar verði ekki höfn í
framtíðinni, eins og áður stóð til,
heldur blönduð byggð. Hann seg-
ir að það verði þó skoðað í skipu-
lagsvinnu fyrir svæðið hvort
menn vilji hætta grjótnáminu, en
áframhaldandi grjótnám myndi
ekki útiloka að á Nesinu verði
hægt að skipuleggja byggð.
Engin önnur grjótnáma
í höfuðborginni
Í borgarráði á þriðjudag skor-
uðu sjálfstæðismenn á borgaryf-
irvöld að hætta grjótnámi í Geld-
inganesi þegar í stað, þar sem
hætt hefur verið við gerð hafnar
á svæðinu. Árni Þór segir að
borgin hafi á sínum tíma fengið
heimild fyrir grjótnámi um millj-
ón rúmmetra á svæðinu, hann
hafi ekki nákvæmar upplýsingar
um hversu mikið af grjóti hafi
verið tekið til þessa.
„Menn halda að þetta grjót-
nám sé bara fyrir höfnina, en því
fer víðsfjarri. Borgin þarf auðvit-
að grjót í alls konar verkefni,
malbik og annað slíkt og það er
svo sem engin önnur grjótnáma í
höfuðborginni eins og er,“ segir
hann. Skipulags- og byggingar-
nefnd hefur verið falið að hefja
undirbúning á breytingu á að-
alskipulagi og segir Árni Þór að
ekki sé tímabært að ræða hvern-
ig grjótnámið og byggð muni
fara saman.
„Grjótnámið hefur í sjálfu sér
ekki bara snúist um höfnina eða
hafnarsvæðið þarna. Borgin þarf
auðvitað grjót í ýmsu sambandi
og hvar á að taka það? Það verð-
ur þá að vera hægt að svara því.“
Hann segir að áframhaldandi
grjótnám þýði alls ekki að ekki
verði hægt að skipuleggja bland-
aða byggð á svæðinu.
„Það er fullt af grjótnámi í
borginni sem maður kannski átt-
ar sig ekki á. Austurbæjarskóli
stendur í grjótnámi og það er
grjótnám í Skipholtinu fyrir neð-
an Stýrimannaskólann. Það er
byggð komin á þessa staði, menn
gleyma því náttúrlega fljótt. Það
er ekkert sjálfgefið, en auðvitað
kemur það til skoðunar í skipu-
lagsvinnu hvort menn vilji hætta
grjótnáminu og nota námuna í
eitthvað tiltekið, sem hluta af
skipulaginu eða hvað,“ segir Árni
Þór.
Ekki búið að ákveða hvort
grjótnámi verði hætt
Morgunblaðið/Golli
Stórvirkar vinnuvélar voru við grjótnám í Geldinganesi í gær.
HÆSTIRÉTTUR hefur vísað úrskurði Hér-
aðsdóms Reykjavíkur um að lögreglu beri
ekki að afhenda lögmanni Tomas Malakaus-
kas heim í hérað á ný, ómerkir fyrri úrskurð
héraðsdóms á þeim forsendum að hann sé
órökstuddur. Hæstiréttur staðfesti einnig
úrskurð Héraðsdóms um að Malakauskas
sæti gæsluvarðhaldi til 24. mars nk.
Lögmaður Malakauskas fór fram á að fá
afhent endurrit af öllum gögnum er málið
varða frá lögreglu, en héraðsdómur hafnaði
því. Í úrskurði dómsins segir m.a. að fulltrúi
ríkislögreglustjóra hafi lýst því yfir að nauð-
synlegt sé að fara fram á skýrslutökur af sak-
borningi og vitnum fyrir dómi áður en rann-
sóknargögn verði afhent og því þyki rétt á
þessu stigi að hafna kröfu verjanda um af-
hendingu rannsóknargagna. Reiknað er með
að skýrslur verði teknar fyrir dómi af mönn-
unum þremur í dag eða næstu daga.
Afhendingu frestað vegna skýrslutöku
Helgi M. Gunnarsson, löglærður fulltrúi
hjá Ríkislögreglustjóra, segir að lögum sam-
kvæmt megi lögreglan halda gögnum frá
verjendum í viku eftir að þau verða til. Ef
farið er fram á skýrslutöku fyrir dómi, sem
oftast er gert þegar aðilar hafa játað aðild að
máli, má seinka því um þrjár vikur til við-
bótar að afhenda verjendum gögnin.
Helgi segir lögin samt í raun meingölluð,
þar sem þau geri ekki ráð fyrir breytilegum
tímafresti í málum. Hann segir það ljóst að
meiri tíma þurfi til að rannsaka stórt mál á
borð við það sem nú um ræðir og því þyrfti að
vera leyfilegt að halda gögnum frá verjend-
um í lengri tíma en viku í stórum málum.
Deilt um afhendingu gagna
í líkfundarmálinu
Skýrslutökur
fyrir dómi
fyrirhugaðar
ÁFRAM er gert ráð fyrir
stífri suðaustanátt, 18–23
m/s og rigningu með köfl-
um sunnan- og suðvest-
anlands í dag en hægari
vindátt og minni úrkomu
annars staðar.
Innanlandsflug lá niðri
framan af degi í gær vegna
veðurhamsins en sam-
kvæmt upplýsingum frá
Flugfélagi Íslands var flog-
ið til Akureyrar, Egilsstaða
og Hafnar upp úr miðjum
degi. Flugi til Bíldudals,
Ísafjarðar og Vest-
mannaeyja var aflýst og
hefur flug til Ísafjarðar og
Vestmannaeyja því legið
niðri í tæpa þrjá sólarhringa.
Ár eru víða vatnsmiklar en held-
ur hefur dregið úr vatnavöxtum.
Sem dæmi um vatnsmagnið í
einstökum ám var rennsli við
Stekk í Norðurá tuttugufalt það
sem eðlilegt telst eða yfir 450 rúm-
metrar á sekúndu þegar mest lét á
mánudag. Meðalrennsli árinnar á
þessum slóðum er hins vegar 23
rúmmetrar á sekúndu. Um
800 hektarar af ræktuðu
landi í Hrunamannahreppi,
sem fóru undir vatn fyrr í
vikunni þegar Hvítá flæddi
yfir bakka sína, voru að
mestu komnir undan vatni
í gærmorgun, að sögn
bónda í Auðsholti. Eftir er
að kanna hugsanlegt land-
brot og skemmdir á girð-
ingum.
Ekki hafa hlotist af telj-
andi vandræði á vegum
vegna leysinga.
Lítil aurskriða féll hins
vegar úr Eyrarfjalli, ofan
við Urðarveg á Ísafirði, í
fyrrinótt og stíflaði ræsi.
Leysingaveður á Vestfjörðum að
undanförnu hefur valdið því að
mikinn snjó, sem kominn var í
byggð, hefur tekið upp á skömm-
um tíma.
Morgunblaðið/Ásdís
Áfram stíf suðaustanátt
Dregið hefur úr vatnavöxtum
JARÐNESKAR leifar Vaidas Jucevicius
voru fluttar af stað áleiðis til Litháen í gær.
Lík hans var brennt hér á landi og flutt í
duftkeri til móður hans í Litháen.
Í dag er mánuður síðan lík Jucevicius
fannst fyrir tilviljun í höfninni á Neskaup-
stað. Enn hefur banamein hans ekki verið
staðfest af lögreglu. Þrír menn sitja enn í
gæsluvarðhaldi grunaðir um aðild að láti
hans.
Morgunblaðið/Jim Smart
Jarðneskar leifar
Vaidas fluttar heim