Fréttablaðið - 29.04.2006, Síða 76

29. apríl 2006 LAUGARDAGUR44
Fyrsta gervigreindarhátíðin á Íslandi verður haldin í Borgarleikhúsinu í dag. For-
sprakkar hátíðarinnar eru Krist-
inn Þórisson og bróðir hans Hrafn
Þorri Þórisson ásamt nemendum
úr Gervigreindarsetri Háskólans í
Reykjavík. Kristinn er með dokt-
orsnafnbót í gervigreind frá MIT í
Bandaríkjunum og Hrafn Þorri er
formaður ISIR, Félags Íslands um
gervigreind, sem verður stofnað
formlega á hátíðinni.
„Við höfum reynt að safna
saman fulltrúum allra þeirra sem
eru að vinna í gervigreind á land-
inu,“ segir Kristinn, sem stýrir
gervigreindarsetri HR en þar eru
um fimmtán nemendur að rann-
saka og þróa gervigreind.
Gervigreindin er að ryðja sér
til rúms í hinum ýmsu kimum
mannlífsins og Kristinn segir að
verkefnin séu býsna fjölbreytt.
„Þetta er hálfgerður vísinda-
skáldskapur en það gerir þetta svo
spennandi og með Gervigreindar-
hátíðinni erum við að vekja athygli
á því að „framtíðin er núna“, þótt
hún birtist manni ekki alltaf í
þeirri mynd sem maður hafði
ímyndað sér. Það er nú þegar farið
að selja gervigreind vélmenni inn
á heimili og gervigreindin leynist
í hinum ýmsu heimilistækjum eins
og ljósmyndavélum og þvottavél-
um. Gervigreindin er samt ennþá
talsvert mikið undir húddinu, ef
svo má að orði komast, en húddið
mun opnast á næstu þremur til
fimm árum og fólk fara að sjá
gervigreind á ólíklegustu og meira
áberandi stöðum. Möguleikarnir
eru óþrjótandi og allt miðar þetta
ekki síst að því að gera líf okkar
léttara og þægilegra.“
Kristinn segir Gervigreindar-
setrið einbeita sér að fjórum
áherslusviðum. „Við vinnum með
leiki, rauntímasamskipti við vélar,
sýndarheima og sýndarveruleika
og róbóta og svo vélmenni sem
eru beinlínis vélar í mannslíki.
Þetta eru allt ákaflega spennandi
vaxtarbroddar.“
Forláta vélhundur og róbot
halda til á Gervigreindarsetrinu
og eru þangað komnir frá Japan.
„Japanir smíða fyrirmyndar verk-
færi hvað vélbúnaðinn varðar en
það kemur í okkar hlut að bæta
vitinu við. Oft felur þetta í sér
áhugavert samstarf þeirra sem
hafa unnið mikið með vélbúnað og
svo okkar sem erum í raun að búa
til heilann í tækin.“
Gervigreind kemur oft við sögu
í vísindaskáldskap og kvikmynd-
um og þá oftar en ekki í neikvæðu
ljósi og nægir í því sambandi að
nefna myndirnar um Tortímand-
ann þar sem vélarnar snúast gegn
skapara sínum og reyna að útrýma
mannkyninu. Kristinn hefur þó
takmarkaðar áhyggjur af þessu.
„Línurnar eru alltaf að skýrast
varðandi ógn þekkingar okkar á
þessum sviðum og við erum nú
farin að sjá raunveruleg dæmi um
þessi fyrirbæri úr vísindaskáldsög-
um og bíómyndum. Við þurfum að
hafa það í huga að það er reginmun-
ur á gervigreind og til dæmis líf-
tækni hvað varðar hættur og ógnir.
Munurinn er svipaður og á nagla-
byssu og hundi. Gervigreindin er
eins og naglabyssan en líftæknin
eins og hundurinn sem er með innra
eðli sem við skiljum ekki alltaf og
getur gert ófyrirsjáanlega hluti.
Naglabyssan gerir mjög lítið af
slíku þannig að hér er um eðlismun
að ræða. Óttinn við að gervigreind-
in fari úr böndunum er fyrir hendi
en það er miklu eðlilegra að byrja á
að hafa áhyggjur af líftækninni.
Við förum þó að sjá alls konar tæki
sem munu geta tekið sjálfstæðar
ákvarðanir á næstu árum, sjálf-
stýrandi bíla til dæmis, en það er
okkar hlutverk að upplýsa þjóðfé-
lagið um möguleikana sem felast í
gervigreindinni og þær hættur sem
vissulega eru fyrir hendi þar sem
þetta er öflug tækni. Við vonum því
að sem flestir leggi leið sína í Borg-
arleikhúsið í dag, þar sem dagskrá-
in byrjar klukkan 13.“
Nánari upplýsingar má finna á:
http://ailab.ru.is/events/2006/hatidin.
Gervigreindin verður
í askana látin
KRISTINN R. ÞÓRISSON Lauk fyrstur Íslendinga doktorsprófi í gervigreind og fæst við spenn-
andi verkefni henni tengd ásamt nemendum í Háskólanum í Reykjavík.
BESTI VINUR MANNSINS Þessi gervigreindi
hundur er ekki líklegur til þess að bíta
húsbónda sinn enda álíka hættulegur og
rafmagnstannbursti. Hann verður til sýnis á
gervigreindarhátíðinni í Borgarleikhúsinu.
RÓBÓTINN Er frá Japan en Kristinn og hans
fólk hafa aukið greind hans í gervigreindar-
setrinu.
Gervigreind er stöðugt að ryðja sér til rúms í daglegu lífi og mun verða enn
almennari á næstu árum þegar heimilistæki fara í auknum mæli að taka sjálf-
stæðar ákvarðanir. Hinir ýmsu angar gervigreindarinnar verða kynntir í Borgar-
leikhúsinu í dag. Þórarinn Þórarinsson ræddi við Kristin Þórisson, sem fer fyrir
Gervigreindarsetri Háskólans í Reykjavík.