Fréttablaðið - 23.09.2006, Síða 18

23. september 2006 LAUGARDAGUR18
Knattspyrnukonan Ásthildur
Helgadóttir er maður vikunnar
að þessu sinni, en Ásthildur leik-
ur knattspyrnu með Malmö FF í
Svíþjóð við góðan orðstír. Ásthild-
ur skoraði tvö mörk fyrir Malmö
FF um síðustu helgi og er marka-
hæst í sænsku deildinni með
sautján mörk á þessari leiktíð.
Ásthildur ætti að vera flestum
landsmönnum að góðu kunn en
hún hefur leikið í mörg ár með
íslenska landsliðinu í knattspyrnu
og er án efa ein besta knatt-
spyrnukona sem Ísland hefur
alið. Hún á að baki 63 landsleiki
fyrir Íslands hönd og hefur skor-
að í þeim 22 mörk. Hún hefur í
mörg ár verið eins konar andlit
íslenskrar kvennaknattspyrnu út
á við og hún er einmitt núverandi
fyrirliði landsliðsins. Ung að aldri
vakti Ásthildur athygli vegna
getu sinnar á knattspyrnuvellin-
um og fljótlega var ljóst að þessi
hávaxna ljóshærða stúlka ætti
eftir að ná langt á þeim vettvangi.
Ásthildur hefur þrisvar verið
valin knattspyrnukona ársins,
íþróttamaður Kópavogs árið 1996,
íþróttamaður Reykjavíkur árið
2002 og hefur tvisvar lent í þriðja
sæti í kjöri íþróttamanns ársins,
árin 2003 og 2005. Auk þess hefur
Ásthildur níu sinnum orðið
Íslandsmeistari með Breiðablik
og KR.
Ásthildur er verkfræðingur að
mennt, en þá menntun fékk hún
frá Vanderbilt-háskóla í Nashville
í Tennessee í Bandaríkjunum.
Ásamt námi þar stundaði hún
knattspyrnu með skólaliðinu. Þó
að Ásthildur spili
nú knattspyrnu í
Svíþjóð býr hún í
Kópavogi og starfar
á verkfræðistofunni
Línuhönnun auk
þess að vera í bæjar-
stjórn Kópavogs-
bæjar fyrir hönd
sjálfstæðismanna.
Ásthildur er í
nautsmerkinu, fædd
9. maí 1976 í Reykja-
vík. Snemma fluttist
hún þó út til Svíþjóð-
ar þar sem hún bjó
til fimm ára aldurs
en þá flutti hún í
Kópavoginn. Það er
því kannski hægt að
segja að fljótt hafi
orðið ljóst hvað yrði,
því það er sama við
hvern er talað, allir
segja að Ásthildur
sé á eilífu flakki og
upp á síðkastið
hefur það flakk
einmitt aðallega
verið á milli Sví-
þjóðar og Íslands.
Ásthildur er mjög
ákveðin mann-
eskja og ef hún
setur sér einhver
markmið helgar
hún sig þeim
markmiðum algjör-
lega. Gott dæmi
um það er þegar
Ásthildur lenti í
erfiðum meiðslum
á sínum knatt-
spyrnuferli en þá
var hún ákveðin í
því að ná sér að
fullu aftur. Hún
æfði grimmt, oftast
ein, og passaði sig á
því að leggjast ekki
í neitt þunglyndi
þótt á móti blési.
Ásthildur er
mjög virk stelpa og
hefur alltaf verið. Á
hennar yngri árum
þurfti að fara ófáar
ferðirnar með hana
og systur hennar,
Þóru B. Helgadótt-
ur, á slysadeildina
vegna beinbrota og
annara áverka enda
léku þær systur sér
í fótbolta frá morgni
til kvölds. Ásthildur
er fimm árum eldri
en Þóra, en var þó
dugleg að taka litlu
systur sína með á
fótboltavöllinn. Þær
systur eru bestu
vinkonur og mjög
nánar.
Það er sama
við hvern er talað,
allir sem til Ást-
hildar þekkja
segja hana vera
mjög klára og
metnaðarfulla,
enda segir það sig
sjálft að maður
hristir ekki verk-
fræðimenntun fram
úr erminni. Kunn-
ugir segja að stundum finnist
þeim hún taka sér of mikið fyrir
hendur, en hún klárar samt ávallt
það sem hún ætlar sér.
Fyrrverandi þjálfari Ásthild-
ar segir að hún sé mikill leiðtogi,
bæði inni á knattspyrnuvellinum
og einnig utan hans, sem sést
kannski best á því að hún er fyr-
irliði nánast hvar sem hún spilar
og dregur liðið áfram þegar á
reynir. Einnig þykir hún frábær
félagi sem kann að slá á létta
strengi, tekur sig ekki of hátíð-
lega, hefur mjög mikinn metnað
og þar að auki óbilandi trú á
sjálfri sér. Ásthildur er hrókur
alls fagnaðar á mannamótum og
hún á það m.a. til að stjórna hóps-
öng þó hún sé ekkert sérstaklega
lagviss sjálf.
Vinkonur Ásthildar segja að
hún sé fyrst og fremst valkyrja
og mjög sjálfstæð manneskja og
að hún njóti mikillar virðingar
hvar sem hún kemur. Ásthildur á
mjög góða fjölskyldu og fær mik-
inn stuðning frá henni. Ásthildur
er ekki í sambúð og vinkonurnar
segja að Ásthildur hafi ávallt
verið róleg í strákamálum, enda
beri hún mikla virðingu fyrir
sjálfri sér og oft á tíðum ekki haft
mikinn tíma fyrir skemmtanalíf
vegna anna í fótboltanum og
öðru. Þegar spurt er um helstu
galla Ásthildar verður fátt um
svör en þó helst hvað hún er allt-
af upptekin. Enda ekki nema von
að nóg sé að gera hjá stelpu sem
spilar fótbolta í Svíþjóð, starfar á
verkfræðiskrifstofu í Reykjavík
og situr í bæjarstjórn Kópavogs.
MAÐUR VIKUNNAR
Metnaðarfull og dugleg valkyrja
ÁSTHILDUR HELGADÓTTIR
KNATTSPYRNUKONA
SÍÐASTI
DAGUR -
KOMDU O
G GERÐU
FRÁBÆR
KAUP!