Eimreiðin - 01.09.1971, Síða 7

ÞRJÚ LJÓÐ
71
SLÁTTUR OG SÚT
Heimskir góna búðargluggarnir út í sumarið.
Ég brosi vandlega við kunningjum
og geri mér dælt við götuna.
Alltaf jafn sjálfumglaður.
í hagstæðum jakka og burstuðum skóm
með slangur af bröndurum upp á vasann.
Þá brýt ég sjálfan mig á þér
eins og blindskeri í götunni.
Þú kemur mér í opna skjöldu
og sakleysisleg augu þín svíða
mín leyndustu hugarfylgsn.
Eitt andartak; þú
og ég er allt í einu álappalegur njóli.
Svo kinka ég flóttalega kolli
og flýti mér niður asnalega götuna.
JANÚAR
Stormsveipar snýta sér
með bældu korri
utan í bíla og kvefað fólk.
Ólundarlegur janúar
hristir hárlubbann
og fölin hrynur
eins og flasa yfir húsin.
Skítugur snjór og skafrenningur
skakklappast um bláa fótleggi
vatnsbólgna skó
bleikar hendur
heimakær handtök.