Tímarit lögfræðinga - 20.12.1990, Síða 67

Stjórn félagsins hefur fengið til umsagnar frá Markúsi Sigurbjörnssyni pró-
fessor og borgarfógeta tvö lagafrumvörp, frumvarp til laga um gjaldþrotaskipti
og frumvarp til laga um skipti á dánarbúum o.fl.
Þá hefur dómsmálaráðuneytið sent félaginu til umsagnar frumvarp til laga um
meðferð opinberra mála.
Stjórnin hefur ekki unnið skipulega að því að semja umsagnir um frumvörp
þessi. Ástæðan er sú að strax kom til tals að taka þau til umfjöllunar á
dómaraþinginu eins og raunin hefur orðið og fresta því að gefa umsögn um þau
þar til þeirri umfjöllun væri lokið. Koma umsagnirnar því til kasta næstu
stjórnar.
XIII. Skíðaferð
Stjórnir Dómarafélags íslands og Lögmannafélags íslands ákváðu að efna
sameiginlega til skíðaferðar í Kerlingarfjöll 6.-9. júlí s.l. Sjö félagsmenn okkar
mættu með fríðu föruneyti og samtals tóku þátt í þessari ferð um 30 manns á
vegum félaganna. Ferðin heppnaðist vel í alla staði þótt þátttaka yrði ef til vill
minni en vonir stóðu til í upphafi. Þó er óvíst hvort framhald verður á þessari
nýbreytni í starfi félagsins.
XIV. Dómaraheimsókn
Næsta heimsókn Dómarafélags íslands hefur lítillega verið til umræðu hjá
stjórninni, en ekki hefur verið hafist handa við undirbúning að neinu gagni.
Helst hefur verið hallast að því að heimsækja Evrópudómstólinn í Luxemburg
og þá jafnframt dómstóla í Luxemburg. Kemur væntanlega í hlut næstu stjórnar
að taka ákvörðun um þetta og annast undirbúning.
XV. Dómhús
Á fundi stjórnar félagsins 12. janúar var gerð eftirfarandi samþykkt:
„Fundur í stjórn Dómarafélags íslands haldinn 12. janúar 1990 beinir þeim
eindregnu tilmælum til dómsmálaráðherra og fjármálaráðherra að húsnæðis-
vandi þeirra dómstóla sem sitja í Reykjavík verði leystur með því að byggja
dómhús á þeirri lóð sem borgaryfirvöld hafa til reiðu í því skyni.
Teljist slíkt útilokað telur stjórn Dómarafélags íslands að helst komi til greina
að héraðsdómstólnum í Reykjavík, sem tekur til starfa um mitt ár 1992, verði
ætlað Útvegsbankahúsið en Hæstarétti Safnahúsið.“
Samþykkt þessi var send þeim ráðherrum sem í henni eru greindir. í framhaldi
af því ræddi formaður félagsins við þá báða. Ekki er ljóst þegar skýrsla þessi er
rituð hver niðurstaða í dómhúsmálum í Reykjavík verður.
265