SunnudagsMogginn - 11.09.2011, Blaðsíða 29

11. september 2011 29
Skar og skarkali | 5
Þorgrímur Kári Snævarr
ekki verið hlutverk rektors að segja að þar
hafi einn rétt fyrir sér og annar ekki.“
En er ekki oft ætlast til þess að þú gerir
það?
„Stundum er ætlast til þess. Mitt svar við
því er þetta: Fólk hefur tjáningarfrelsi. Há-
skólamenn hafa verið hvattir til að taka
þátt í þjóðfélagsumræðunni og gera það í
eigin nafni. Ef einhver er ósammála er um
að gera að koma sjónarmiðum sínum á
framfæri. Þannig geta farið fram eðlileg
skoðanaskipti.“
Sterk bein og vinnuþrek
Háskólinn útskrifar fjölda doktora á
hverju ári. Er of auðvelt að verða doktor á
Íslandi og er Háskólinn hugsanlega að
fjöldaframleiða doktora?
„Nei þvert á móti er það erfitt. Bæði inn-
lendar og erlendar úttektir sýna að miðað
við stærð skólans sem rannsóknarháskóla
er fjöldi útskrifaðra doktorsnema lítill.
Lönd í kringum okkur eru hlutfallslega að
útskrifa miklu fleiri doktora vegna þess að
atvinnulífið kallar eftir starfsfólki með
slíka þjálfun. Af Norðurlandaþjóðunum
útskrifa Svíþjóð og Finnland flesta doktora
og Danmörk og Noregur hafa sett sér
markmið um að ná hlutfallslega sama
fjölda. Háskóli Íslands er ennþá langt á eft-
ir en doktorsnemum hefur fjölgað mikið á
undanförnum árum. Við gerum strangar
kröfur um það hvernig nemandi í dokt-
orsnámi hefur staðið sig í fyrra námi,
miklar kröfur til leiðbeinanda og til þess
hverjir eru andmælendur við doktors-
varnir. Mikið er í húfi að við stöndum vörð
um gæði til að tryggja að doktorsgráða frá
Háskóla Íslands njóti virðingar hvarvetna
og standist alþjóðlegan samanburð um
gæði.“
Heldurðu að það skipti máli að rektor
Háskólans er kona?
„Að konur séu kosnar til rektors, deild-
arforseta eða annarra trúnaðarstarfa gefur
til kynna að þær njóti virðingar fyrir störf
sín, og er því ákveðinn mælikvarði á jafn-
réttisviðhorf. Fyrir skólann sjálfan er mik-
ilvægast að sá sem gegnir rektorsembætti
sé víðsýnn, hafi skilning á mikilvægi
ólíkra fræðigreina og haldi sig við skýr
markmið, sem samþykkt hafa verið af há-
skólasamfélaginu. Sterk bein og vinnu-
þrek hafa líka mikið að segja. Þessa eig-
inleika geta bæði konur og karlar haft, en
það sem mestu skiptir er að bæði kyn
komi að verkefnum og vinni vel saman.“
Er starf háskólarektors eins og þú bjóst
við þegar þú tókst við því?
„Þetta er miklu víðfeðmara starf en ég
bjóst við, og í raun mun erfiðara, ekki síst
eftir kreppuna. Skólinn hefur stækkað
mikið á þessum árum og nemendum hefur
fjölgað mikið. Við viljum styrkja tengsl við
atvinnulífið, skólakerfið og almenning í
landinu, auk þess sem við höfum styrkt
alþjóðleg tengsl verulega. Ég hef lært mik-
ið eftir að vera kosin í stjórn Samtaka evr-
ópskra háskóla og það styrkir mig óneit-
anlega í mínu starfi. Starfið er gífurlega
áhugavert og lærdómsríkt en því fylgir
mikil ábyrgð, því hér eru 14.000 nem-
endur og 2.000 starfsmenn. Við finnum öll
fyrir auknu álagi og ég er tilbúin að vinna
eins og þarf meðan ég er í þessu starfi.“
Hvað ætlarðu að vera lengi í þessu
starfi?
„Rektor má lengst sitja tvö kjörtímabil.
Ég má því vera fjögur ár í viðbót.“
Ertu farin að hugsa um hvað þú ætlar
svo að gera?
„Já, ég hugsa oft um það. Ég á mér mörg
hugðarefni og margt sem mig langar til að
gera þegar þessu starfi lýkur. Ég vona að
ég haldi þeirri starfsorku sem ég hef í dag
því mig langar til að vinna að uppbygg-
ingu á ýmsum sviðum. Mig langar líka til
að skrifa um lyfjafræðileg málefni,
menntamál og fleira og hef mikinn áhuga
á að geta ræktað matjurtir og aðrar nytja-
plöntur. Ég er sannfærð um að við Íslend-
ingar getum ræktað miklu fleiri tegundir
en við gerum í dag, bæði í gróðurhúsum
og undir berum himni. Ég sé því framtíð-
ina með plóg og penna í Þverárhlíð í Borg-
arfirði.“
Kristín Ingólfsdóttir: Að konur séu
kosnar til rektors, deildarforseta
eða annarra trúnaðarstarfa, gefur
til kynna að þær njóti virðingar
fyrir störf sín, og er því ákveðinn
mælikvarði á jafnréttisviðhorf.
Morgunblaðið/Kristinn