Bændablaðið - 31.10.2013, Blaðsíða 43

43Bændablaðið | Fimmtudagur 31. október 2013
Glæsileg héraðssýning á lambhrútum
á Snæfellsnesi haustið 2013
Snæfellingar eiga sér lengri hefð
með héraðssýningar á hrútum en
bændur í öðrum héruðum. Þar var
fyrsta slík sýning fyrir fullorðna
hrúta haldin haustið 1954 og
þegar sýningarhald á fullorðnum
hrútum var lagt af um síðustu
aldamót breyttu þeir haustið 2006
slíku sýningarhaldi í sýningar á
lambhrútum sem þeir hafa haldið
á hverju ári síðan.
21 lambhrútur sýndur í
Haukatungu syðri II
Vegna varnargirðinga verður
sýningarhaldið að vera tvískipt.
Föstudagskvöldið 18. október komu
bændur sunnan varnarlínunnar
saman með úrval lambhrúta sinna
í Haukatungu syðri II og voru þar
mættir til leiks samtals 21 lambhrútur.
Þar voru valdir þeir fimm lambhrútar
(eða færri) sem kepptu við uppröðun
allra hrúta síðari sýningar dag.
36 lambrútar sýndir að Hömrum
Vestan girðingar var síðan sýning
daginn eftir þann 19. Var hún haldin
að Hömrum í Grundarfirði. Þar voru
samtals 36 lambrútar mættir til leiks.
Sýningarþátttaka hefur stundum
verið meiri og aðallega bændur í
gamla Kolbeinsstaðahreppi sem þar
gætu bætt um betur.
Smella 08-530 í Jörfa efst í
BLUP kynbótamati
Snæfellingar hafa einnig tekið upp
þann góða sið að verðlauna efstu
ær í héraði í BLUP kynbótamati.
Samanburður þar er sá árgangur af
ám, sem hefur skilað upplýsingum
fyrir fjögur fyrstu afurðaárin, sem
liggja að baki þeim útreikningum.
Það voru því að þessu sinni ær
fæddar árið 2008. Toppsætið í þeim
samanburði hreppir ærin Smella
08-530 í Jörfa en hún hefur sýnt
einstaklega mikla frjósemi og skilað
góðum vænleika lamba en hún mun
hafa erft Þokugenið frá formæðrum
sínum.
Annað sætið skipaði ær 08-153
á Bergi í Grundarfirði en hún var
tvílembd gemlingsárið og ætíð síðan
og hefur ætíð skilað mjög vænum og
vel gerðum lömbum að hausti.
Í þriðja sætinu var síðan Læða
08-008 í Hrunsmúla, ákaflega
frjósöm ær og lömb hennar hafa sýnt
góð kjötgæði.
Tíu kollóttir lambhrútar
Lambhrútunum var eins og ætíð
áður skipt í þrjá keppnishópa, sem
eins og áður segir voru allir skipaðir
kostamiklum einstaklingum.
Kollóttu hrútarnir voru fæstir eða
aðeins tíu að þessu sinni. Tvö efstu
sætin í þessum flokki skipuðu
lambhrútar frá Hjarðarfelli. Lamb
223 er gemlingslamb og faðir
þess Sindri 10-759. Hrúturinn er
prýðilega þroskamikill með frábæra
holdfyllingu á baki og í mölum
og lærum með mikla og vel hvíta
ull. Lamb 906 er samanrekinn
holdaköggull en faðir þess er
Strengur 11-768. Mjög stutt að baki
báðum þessum hrútum stendur Magni
06-730, sem mikið hefur mótað hið
öfluga kollótta fé á Hjarðarfelli
síðustu ár.
Algjör stakkaskipti
í flokki mislitra hrúta
Hópur mislitu hrútanna hefur tekið
hér eins og á öðrum svæðum, sem
líkar sýningar eru haldnar fyrir,
algerum stakkaskiptum að gæðum.
Í þessum hópi mættu samtals 13
hrútar til keppni. Þar skipaði efsta
sæti svartbotnuhosóttur hrútur
nr 48 frá Tungu í hinum gamla
Fróðárhreppi. Þetta er rígvænn
tvævetlutvílembingur, sem allur er
frábærlega vel holdfylltur. Faðir
lambsins er Draumur 12-004, sem
er hrútur sem rekur ættir mikið til
gamla Máfahlíðarfjárins.
Annað sætið skipaði svartur hrútur
nr 40 í Hraunsmúla. Þetta er feikilega
vel gert og fallegt lamb með ákaflega
góða holdfyllingu. Þess má geta að
tvílembingsbróðir hans keppti í flokki
hvítra hrúta, hyrndra og líktust þeir
bræður mjög um flest annað en lit.
Þessir bræður eru synir Drífanda
11-895.
Mestur fjöldi í flokki hyrndra
hvítra hrúta
Eins og áður var langmestur fjöldi
gripa í flokki hyrndra, hvítra hrúta
eða samtals 36. Ekki var aðeins
að fjöldi þeirra væri mestur heldur
einnig gæði.
Efsta sætið í þessum flokki skipaði
lamb 430 frá Hjarðarfelli, sem er
einstakt djásn að allri gerð. Hann er
feikilega þroskamikill, gríðarlega
bollangur með einstaka holdfyllingu
og sérstaklega eru bakátak og
lærahold frábær. Hrútur þessi er sonur
Klaka 11-772, sem var glæsilegur
sonur Frosta 07-843, sem því miður
misfórst áður en hann komst til
notkunar á stöð. Móðurfaðir hrútsins
er Laufi 08-848 og má geta þess að
árið 2012, gemlingsárið, var móðir
hans tvílembd og skilaði þá 55,5 kg
af kjöti. Lengra að baki honum standa
margir öflugir einstaklingar úr hinni
landsfrægu ræktun á Hjarðarfelli.
Annað sætið í þessum flokki féll í
hlut hrúts nr 865 frá Máfahlíð. Þetta
er gríðarlega vænt gemlingslamb með
fádæmum breiðvaxið, brjóstkassinn
einstaklega vel hvelfdur, bakvöðvi
þykkur og vel lagaður og malir
ákaflega breiðar og holdfylltar. Faðir
hans er Bliki 12-001, sem er sonur
Gosa 08-850 en móðir hrútsins er
dóttir Kveiks 05-965.
Búið á Hjarðarfelli
fékk verðlaunaskjöldur
Búnaðarsamtaka Vesturlands
Hinn glæsilegi verðlaunaskjöldur
Búnaðarsamtaka Vesturlands féll í
hlut búsins á Hjarðarfelli fyrir lamb
nr 430 og verður skjöldurinn þar því
vel varðveittur til næstu sýningar.
Sýning þessi var glæsileg
staðfesting þess að framfarir eru
miklar í fjárræktinni á Snæfellnesi
og ekki síst ástæða til að benda á
ungan aldur foreldra nánast allra
toppgripanna í því sambandi.
Það vakti athygli í samanburði
við sambærilegar sýningar fyrri ára
hve hlutfall lamba tilkomið beint við
sæðingar var lægra en áður. Að baki
langflestum lambanna á sýningunni
standa hins vegar margir af topp-
hrútum sæðinganna á undangengn-
um árum og hrútar sem vakið hafa
verðskuldaða athygli á hliðstæðum
sýningum á síðustu árum.
Glæsilegt framtak
Öll framkvæmd þessa sýningahalds
var eins og áður einstaklega vel af
hendi leyst en þessar sýningar eru
glæsilegt framtak fjárræktarfélaganna
á Snæfellsnesi.
/Jón Viðar Jónmundsson
Harpa Jónsdóttir og Gunnar Guðbjartsson með verðlaunahrútinn í flokki
hyrndra og besta hrút Snæfellinga. Mynd / Guðlaug Sigurðardóttir
Verðlaun fyrir hyrnda: Guðbjartur
Gunnarsson 1. sæti, Herdís Leifsdóttir
2. sæti og Högni Bæringsson tekur við
verðlaunum fyrir Hermann Guðmunds-
son 3. sæti. Mynd / Herdís Leifsdóttir
Harpa og Guðbjartur með
Héraðsskjöldinn fyrir besta hrút
Snæfellinga. Mynd / Herdís Leifsdóttir
Fyrstu verðlaun í flokki hyrndra.
Mynd / Guðlaug Sigurðardóttir
Fyrstu verðlaun í flokki mislitra.
Mynd / Guðlaug Sigurðardóttir
Verðlaun fyrir kollótta: Guðbjartur
Gunnarsson 1. sæti, Harpa Jónsdóttir
2. sæti og Ólafur Tryggvason 3. sæti.
Mynd / Herdís Leifsdóttir
Umsóknir um lán eða
styrki úr Stofnverndarsjóði
íslenska hestakynsins
Fagráð í hrossarækt starfar samkvæmt 15 gr. búnaðarlaga
nr. 70/1998. Fagráð fer, meðal annarra verkefna, með stjórn
Stofnverndarsjóðs sem starfræktur er samkvæmt ákvæðum
í sömu lögum og reglugerð nr. 470/1999 um sama efni.
Verkefni sjóðsins eru:
Að veita fé til þróunarverkefna í hrossarækt sem nýtast til
styrktar íslenska hrossastofninum.
Að veita lán og styrki til kaupa á sérstökum úrvalskynbóta-
kosti. Hér væri um að ræða gripi sem gætu haft úrslitaáhrif
á erfðabreytileika í stofninum s.s. litafjölbreytni, eða byggju
íslenskan hest.
Fagráð tekur ákvörðun um styrkveitingar í desember 2013.
Nánari upplýsingar fást hjá Guðlaugi V. Antonssyni hjá Ráð-
gjafarmiðstöð landbúnaðarins á Hvanneyri.
Frestur til að skila inn umsóknum er til 1. desember 2013
og skal umsóknum skilað til Fagráðs í hrossarækt, Hvann-
eyrargötu 3, Hvanneyri, 311 Borgarnesi.
Hvanneyri 31. október 2013
Fagráð í hrossarækt
Ráðstefnan
Hrossarækt 2013
Ráðstefnan Hrossarækt 2013 verður haldin í Sunnusal Hótels
Sögu laugardaginn 16. nóvember og hefst kl. 13:00. Ráð-
stefnan er öllum opin sem láta sig íslenska hrossarækt varða
jafnt fagfólki sem áhugamönnum.
Ráðstefnustjóri: Víkingur Gunnarsson.
Dagskrá:
13:00 Setning - Kristinn Guðnason formaður Fagráðs í
hrossarækt
13:05 Hrossaræktarárið 2013 – Niðurstöður kynbótamats
- Guðlaugur V. Antonsson, hrossaræktarráðunautur
RML
13:30 Heiðursverðlaunahryssur með afkvæmum 2013
13:45 Verðlaun, hæsta aðaleinkunn ársins (aldursleiðrétt)
(án áverka)
14:00 Erindi um markaðsmál
14:50 Tilnefningar og verðlaun fyrir ræktunarmann/menn
ársins 2013
15:40 Umræður um ræktunarmál almennt
17:00 Ráðstefnuslit
Fagráð í hrossarækt