Sveitarstjórnarmál - 01.10.1976, Page 27
30. FULLTRÚARÁÐSFUNDUR
SAMBANDSINS
30. fundur fulltrúaráðs Sambands íslenzkra
sveitarfélaga var haldinn í fundarsal borgarstjórnar
Reykjavíkur að Skúlatúni 2 dagana 12. og 13. apríl s.
1. Páll Líndal, formaður sambandsins, setti fundinn
og var kosinn fundarstjóri og Ólafur G. Einarsson,
varaformaður sambandsins, til vara. Fundarritari
var Egill Benediktsson, oddviti Bæjarhrepps, og
honum til aðstoðar við ritun fundargerðar Unnar
Stefánsson, ritstjóri.
Yfirfærsla verkefna —
sjúkratryggingar
Páll Líndal, fjallaði í setningarræðu sinni m. a.
um yfirfaerslu verkefna frá ríki til sveitarfélaga um
seinustu áramót og gerði rækilega grein fyrir af-
skiptum sambandsstjórnar af því máli. Einnig skýrði
hann frá mótmælum sambandsstjórnar gegn þeirri
kvöð, sem lögð var á sveitarfélögin að leggja á og
innheimta sjúkratryggingargjaldið.
Um það sagði formaður m. a. í ræðu sinni:
„Telja verður það lítt skiljanlegt tiltæki og raunar
óafsakanleg mistök að velja þessa leið til að auka
tekjur sjúkrasamlaganna, og hefur hún að vonum
mælzt ákaflega illa fyrir hjá sveitarstjórnum, og er
ekki búið að bíta úr nálinni með það. Þótt inn-
heimtukvöðin sé tímabundin við árið 1976, er ljóst,
að ekki mun nema hluti gjaldanna innheimtast á
þessu álagningarári. Sveitarfélögunum er auk þess
ætlað að innheimta þetta gjald án nokkurrar þókn-
unar, og kemur það sérstaklega harkalega niður
á oddvitunum. Stjórnvöld ríkisins virðast ekki hafa
lært mikið af reynslunni varðandi „viðlagagjaldið“ á
sínum tíma.
Það verður ekki nógsamlega undirstrikað, að
meðferð þeirra mála, sem hér ha/a verið nefnd, þ. e.
verkefnatilfærslunnar og sjúkratryggingargjaldsins,
hefur orðið þeim, sem í raun vilja vinna að bættum
samskiptum ríkis og sveitarfélaga, mikil vonbrigði,
svo að ekki sé meira sagt.“
Einnig fjallaði formaður um leiðir til að auka
þátttöku almennings i stjórn eigin mála, og var sá
kafli setningarræðunnar birtur sem forustugrein í 2.
tbl. Sveitarstjórnarmála þessa árs og kafli um skipan
sveitarstjórnarumdæma var og birtur í 3. tbl. þessa
árs.
Orkumálin stærsti
málaflokkurinn
Gunnar Thoroddsen, félagsmálaráðherra, flutti
ávarp við setningu fundarins. Fjallaði hann m. a. um
verkefnatilfærsluna milli ríkis og sveitarfélaga um
seinustu áramót og verkefni 10 manna nefndarinn-
ar, sem nú kannar hugsanlegar breytingar á verk-
efnaskiptingu ríkis og sveitarfélaga. Síðan vék ráð-
herra að orkumálunum, sem hann taldi stærsta
samskiptavettvang ríkis og sveitarfélaga. Hann
benti á, að sveitarfélögin hefðu alfarið annazt öflun
og dreifingu jarðhitaorkunnar, og hitaveiturnar
legðu þjóðarbúinu til meira en helming af allri inn-
lendri orku. Þær öfluðu meiri orku en öll raforkuver
landsins samanlagt. Kvað hann það skoðun sína, að
við endurskipulagningu orkumálanna ættu sveitar-
félögin að verða stærri aðilar en verið hefði á sviði
rafmagnsmálanna, bæði að því er snertir orkuöflun
og dreifingu rafmagns.
Fasteignaskatturinn
hefur rýrnað
Birgir Isl. Gunnarsson, borgarstjóri, ávarpaði
síðan fundinn og bauð fundargesti velkomna til
starfa í húsakynnum borgarinnar og í höfuðborg- 225
SVEITARSTJÓRNARMÁL