Uppeldi og menntun - 01.01.2013, Side 121

Uppeldi og menntUn/icelandic JoUrnal of edUcation 22(1) 2013 121
h a fs t e i n n K a r l s so n
veginn og setur fram tillögur um umbætur, þróunarstarf og frekari rannsóknir. Hér er
höfðað til löggjafans og skólayfirvalda en ekki síst skólanna sjálfra.
Uppbygging bókarinnar er einstaklega góð. Kaflafyrirsagnir eru skýrar og lýsandi
og flýta mjög fyrir leit að ákveðnum þáttum. Í kaflanum um baksvið rannsóknarinnar
eru ályktanir höfundar dregnar skýrt fram að lokinni umfjöllun um einstök atriði. Hið
sama gildir um meginniðurstöður þeirra kafla sem lýsa árunum sem til umfjöllunar
eru hverju fyrir sig. Bókin er vel skrifuð og á góðu og fjölbreyttu máli sem gerir hana
þægilega aflestrar. Textar í römmum draga fram áhugaverðar myndir úr skólastarf-
inu og einnig viðhorf nokkurra kennara og nemenda sem tóku þátt í rannsókninni.
Nokkrar töflur eru í bókinni og eru þær skýrar og einfaldar. Frágangur er allur til
fyrirmyndar.
Þessi bók hefur mikið gildi sem fræðirit um skólamál og ekki síður sem handbók
fyrir kennara, skólastjórnendur og alla þá sem vinna að skólamálum. Rannsóknir á
starfsháttum í íslenskum skólum eru af skornum skammti. Það þarf mikinn tíma og
þolinmæði til að vinna slíkar rannsóknir enda krefjast þær þess að rannsakendur sitji
í kennslustundum og fylgist með því sem þar er verið að fást við. Til þess að fá góða
mynd þarf að verja í þetta ærnum tíma. Þó svo að viðfangsefni bókarinnar eigi við um
skil skólastiga og þá fjóra árganga sem þar mætast er skírskotun hennar miklu víð-
tækari. Hún gagnast öllum kennurum á skólastigunum þremur. Því er oft haldið fram
að kennarar og skólastjórnendur nýti sér ekki rannsóknir á skólastarfi til að þróa og
bæta starf sitt. Það má til sanns vegar færa en bók Gerðar getur svo sannarlega nýst
til að bæta þar úr.
Gerður G. Óskarsdóttir er í hópi framsæknasta skólafólks á Íslandi. Hún hefur
verið í fararbroddi í skólaþróun um árabil og lagt margt merkilegt til málanna. Þessi
bók er enn eitt framlag þessarar merku skólakonu til skólaþróunar á Íslandi.
UM HÖfUnDinn
Hafsteinn Karlsson (hafsteinn@salaskoli.is) er skólastjóri Salaskóla í Kópavogi. Hann
lauk BA-prófi í íslensku árið 1981 og prófi til kennsluréttinda árið 1984 frá Háskóla
Íslands. Hann brautskráðist með meistarapróf í stjórnun frá Kennaraháskóla Íslands
árið 2007. Fagleg áhugamál Hafsteins beinast einkum að þróun starfshátta og notkun
upplýsingatækni í skólastarfi.