Morgunblaðið - Sunnudagur - 21.04.2013, Blaðsíða 8

8 MORGUNBLAÐIÐ SUNNUDAGUR 21.4. 2013
Ég fékk það ónotalega á tifinninguna þegarkröfum kínversks auðmanns, sem vildifesta kaup á víðfeðmu landi á Grímsstöðum
á Fjöllum, var endanlega vísað frá undir lok síð-
asta árs, að hann ætlaði að bíða átekta. Enda kom
það á daginn að hann sagði að málið yrði tekið upp
að nýju með vorinu. Hann þurfti ekki að botna
hugsun sína með því að minna á að þá hefðu kosn-
ingar farið fram á Íslandi og óskandi að ný stjórn
væri tekin við, alla vega nýr innanríkisráðherra.
Til voru þeir sem mislíkaði stórlega þegar ég
sem innanríkisráðherra neitaði að verða við ósk-
um hans um að fá undanþágu frá lögum um er-
lenda fjárfestingu og heimila kaup á Grímsstöðum
á Fjöllum. Í kjölfarið var þá reynt að finna göt í
löggjöfinni til að smjúga inn um. Allt kom hins
vegar fyrir ekki og var málaleitan kínversku fjár-
festingasamsteypunnar hafnað.
En nú bregður nýrra við. Fréttir herma að
sömu aðilar ásamt íslenskum samverkamönnum
séu aftur að fara á kreik. Það er ekkert undarlegt.
Kosningar eftir viku og skoðanakannanir spá inn-
anríkisráðherranum falli í hans kjördæmi.
En vill almenningur selja stórt landsvæði á
borð við Grímsstaði á Fjöllum út fyrir landstein-
ana? Ég tel svo ekki vera. Ég held að þjóðin al-
mennt vilji að eignarhald á landi haldist innan
landsteina Íslands. Ég held líka að ríkur vilji sé til
þess í landinu að halda eignarhaldi þjóðarinnar
allrar yfir auðlindunum, sjávarauðlindinni, jarð-
varmanum, fallvötnunum og vatninu.
Það er ekki síst fyrir þær sakir að eignarhald á
grunnvatni er – illu heilli – tengt einkaeignarrétti
að það skiptir miklu máli hver á landið. Það skiptir
máli innan hvaða samfélags sá réttur hvílir. Okkar
samfélagi en ekki austur í Kína, í Bandaríkjunum
eða Evrópusambandinu.
Er þetta þjóðernistal? Þetta tal snýr að sam-
félagshagsmunum og einnig að nálægð eign-
arhaldsins. Hvað fyrra atriðið snertir er merg-
urinn málsins vitanlega sá hvort eignarhaldið
verði háð duttlungum markaðs- og samkeppn-
ishagsmuna annars vegar eða háð hagsmunum
samfélagsins hins vegar. En það er líka munur á
því hvort þú eignast land sem er hluti af tilveru
þinni eða fjárfesting á fjarlægri slóð, hvort landið
sé þeirra sem á því dvelja eða í eigu fjárfesta úti í
heimi.
Ég hef stundum vísað til þess að á máli Græn-
lendinga ber land þeirra heitið Kalaallit Numat,
sem þýðir land þeirrar þjóðar sem landið byggir.
Mennirnir með seðlabúntin og stórveldin sem
hugsa samkvæmt langtímaáformum, renna nú
hýru auga til þessa auðæfaríka lands. Ég á Græn-
lendingum þá ósk til handa að þeir gleymi aldrei
hvað land þeirra heitir og þar með að landið og
auðæfin eru fyrir samfélagið og eiga að þjóna því
en ekki peningavaldinu og stórveldahagsmunum,
hvort sem er í Peking, Moskvu, Brussel eða
Washington.
Að sama skapi þurfum við að vera vakin og sof-
in yfir því að gæta að hagsmunum lands og þjóðar.
Það er nefnilega auðvelt í landi sem byggt er fá-
mennri þjóð að missa tökin ef peningaauður fær
að ráða för. Boðinn var milljarður í þrjú hundruð
ferkílómetra á Grímsstöðum á Fjöllum. Og marg-
ir vildu selt hafa. Hvað hefðu þeir hinir sömu þurft
að fá fyrir Mývatnssveitina? Eða Ísland allt? Nú-
bóa þessa heims er víða að finna.
Það þarf að gæta Íslands.
Beðið eftir nýjum innanríkisráðherra?
ÚR ÓLÍKUM ÁTTUM
Ögmundur Jónasson
ogmundur@althingi.is
Facebook er þessa dagana í gíslingu
pólitískra stöðuuppfærslna en inn á
milli leynast þó skemmtilegheit af
ýmsu tagi.
Logi Berg-
mann sló á létta
strengi í vikunni og
bað Facebook-vini
sína að íhuga hver
væri munurinn á
honum sjálfum og Hilmi Snæ. Með
Loga orðum; „Hilmir Snær versus
ég. Ræðið:“ Vinir hans lögðu hon-
um lið í þessum samanburði og
Guðfinnur Sigurvinsson útvarps-
maður var þeirra fyndnastur er
hann skrifaði „
Hvorugur, þið er-
uð báðir sooooo
last season!“
Nokkru síðar kom
eftirfarandi í ljós:
Saga Garðarsdóttir kom í þátt
Loga, Spurningabombuna, laum-
aðist í iPadinn hans og skrifaði
þennan ódauðlega status.
Það vakti mikla athygli í vikunni
þegar upp komst að starfsmaður á
krabbameinsdeild Landspítalans
hefði starfað þar í tvö ár án þess að
hafa tilskilin réttindi sem hjúkr-
unarfræðingur.
Steinunn Ólína
Þorsteinsdóttir
leikkona vísaði í
fréttina á Facebo-
ok og skrifaði þar
að hún ætlaði að
sækja um „heilaskurðlækn-
ingadjobb“.
Facebook-leikurinn Candy Crush
er að gera allt vitlaust á samskipta-
miðlinum og hið ólíklegasta, önnum
kafna fólk, virðist samkvæmt meld-
ingum á Facebook spila leikinn af
kappi. Listamað-
urinn Hugleikur
Dagsson sendir
skilaboð til þeirra
sem hanga í leikn-
um á síðuna sína í
vikunni. „Til allra sem hafa böggað
mig fyrir að horfa of mikið á sjón-
varp, lesa of mikið af myndasögum
og fara of oft í bíó: Skemmtu þér vel
í candy crush,“ skrifar Hugleikur.
Gaukur Úlfarsson gerði góð-
látlegt grín að félögum sínum á
RÚV. „Dálítil mistök hjá RUV að
vera með Sigmar Gudmundsson og
Jóhönnu Vigdísi að stjórna þessum
umræðuþáttum.
Það væri ávísun á mikið betra
sjónvarp ef Bubbi, Sigga Beinteins
og Einar Bárðar sæu um þetta.“
AF NETINU
Einhverjum hefur sjálfsagt þótt nóg um sjálf-
umgleði sjónvarpskonunnar Sigríðar Elvu
Vilhjálmsdóttur þegar hún lagði spurninguna
„Hvernig finnst þér ég standa mig í sjónvarp-
inu? (Ísland í dag)“ fyrir Bjarna Benedikts-
son, formann Sjálfstæðisflokksins, þegar
hann sat fyrir svörum á Beinni línu á vef DV í
vikunni. Spurningin var þó ekki öll þar sem
hún var séð, ef svo má að orði komast …
Bjarni var reyndar ekki lengi að svara: „Æ,
bara alveg óaðfinnanlega. Alltaf svo einlæg.“
Sannleikurinn er hins vegar sá að sjón-
varpskonan einlæga var alls ekki við tölvuna
sína þegar spurningin var lamin á lykla-
borðið. Hún hafði brugðið sér frá skrifborð-
inu eitt augabragð, Facebook-síðan hennar
var opin og Sigríður svo ljónheppin að Logi
Bergmann Eiðsson, samstarfsmaður hennar
á Stöð 2, átt leið framhjá borðinu …
Yfirmaður hrekkjalómsmála í lýðveldinu
lætur sér yfirleitt ekki gott tækifæri úr
greipum ganga. Svo skemmtilega vill til að
eiginkona hans, Svanhildur Hólm Valsdóttir,
starfar sem aðstoðarmaður Bjarna Bene-
diktssonar, þannig að líklega hefur Loga þótt
hrekkurinn enn skemmtilegri en ella.
Sjónvarpsmaðurinn síkáti gaf á síðasta ári
út Handbók hrekkjalómsins, eins og frægt er.
Hrekkja-
lómur komst
í tölvuna
Sigríður Elva úr Íslandi í dag varar sig eflaust
framvegis á því að slökkva á tölvunni ef hrekkja-
lómurinn Logi Bergmann er nálægt.
Vettvangur
Fyrirsætan Ylfa Geirsdóttir hefur komið víða við en
hún hefur nú gengið til liðs við Latabæ. Ylfa hefur
starfað sem fyrirsæta frá því á unglingsárunum bæði
hér heima og erlendis en á síðasta ári lauk hún námi í
vöruhönnun frá Listaháskóla Íslands.
Latibær sækir fram á ýmsum sviðum svo það er
ekki úr vegi að vöruhönnuður bætist í starfs-
mannaliðið.
Mikill uppgangur virðist vera hjá fyrirtækinu en
nýverið var sagt frá því að Ástríður Viðarsdóttir, fyrr-
verandi starfsmaður Kastljóss, hefði bæst í hóp
starfsfólks Latabæjar.
Lokaverkefni Ylfu frá Listaháskólanum fjallaði um
endurnýtingu og sjálfbærni í hönnun. Ef til vill er
þess að vænta að slíkar áherslur verði allsráðandi í
framtíðarhönnun hjá Latabæ.
Ylfa Geirs
komin til
Latabæjar
Fyrirsætan Ylfa Geirsdóttir hefur hafið
störf sem vöruhönnuður hjá Latabæ.
Morgunblaðið/Eggert