Frjáls verslun - 01.11.2009, Blaðsíða 67
F R J Á L S V E R S L U N • 1 1 . T B L . 2 0 0 9 67
l a x v e i ð i
Lax-á ehf. hefur um árabil verið
umfangsmesti söluaðili veiðileyfa á Íslandi
og á síðari árum hefur sömuleiðis starfsemi
félagsins vaxið hröðum skrefum. Lax-á hefur
með höndum sölu veiðileyfa í Argentínu,
Noregi, Skotlandi, Rússlandi, Írlandi,
Svíþjóð, Bandaríkjunum, Suður-Afríku og
á Grænlandi, Kúbu, Belize, Bahamaeyjum
og Spáni. Að sögn Stefáns Sigurðssonar,
sölustjóra Lax-ár, hefur velta félagsins vaxið
að sama skapi og verður trúlega á milli 800
og 1000 milljónir króna á þessu ári.
Að sögn Stefáns hefur veiðileyfasalan
gengið mjög vel að undanförnu. „Við
höfum verið heppnir með árnar okkar sem
allflestar skiluðu toppveiði 2009. Fyrir vikið
hefur salan gengið vel og við erum bjartsýn
um gott gengi á næsta ári,“ segir Stefán.
Að hans sögn tókst að lækka
veiðileyfaverðið í velflestum ánum
fyrir sumarið 2009. „Við munum ekki
hækka veiðileyfaverð fyrir 2010 og
einhverjar ár munu lækka áfram í
verði. Okkar hlutdeild hefur alltaf verið
mjög stór á útlendingamarkaðnum en
árlega koma 1200 til 1500 erlendir
veiðimenn á okkar vegum til landsins.
Við pössuðum okkur á því að halda
þessum erlendu viðskiptavinum okkar inni
á góðæristímanum og vegna veikingar
krónunnar eru mikil sóknarfæri erlendis
hvað varðar sölu á veiðileyfum á Íslandi
og ég býst fastlega við því að erlendum
veiðimönnum á okkar vegum eigi enn eftir
að fjölga verulega.“
Samkvæmt upplýsingum Stefáns
verðleggur Lax-á veiðileyfi á erlendum
markaði í evrum en á innanlandsmarkaði er
stuðst við verðskrá í krónum. Stefán leynir
því ekki að mikil samkeppni sé um
veiðimenn þegar laxveiði er annars vegar og
hann segir að samkeppnin komi einna helst
frá veiðileyfasölum í Rússlandi, Kanada og
Skotlandi. Þá megi ekki gleyma að
sjóbirtingsveiði eigi vaxandi vinsældum að
fagna og þar séu það helst veiðisvæði í
Argentínu sem keppi við íslensku
sjóbirtingsveiðisvæðin.
Lax ehf. hefur starfað um
nokkurra ára skeið og félagið
hefur unnið sér sess sem
þriðji stærsti einstaki söluaðili
veiðileyfa á landinu. Meðal
veiðisvæða sem Lax ehf. leigir
og selur veiðileyfi á má nefna
Laxá í Kjós, Langá á Mýrum,
Grímsá og Hafralónsá, Hölkná
og Svalbarðsá í Þistilfirði en
að auki er félagið með ár eins
og Úlfarsá (Korpu), Gljúfurá
í Húnavatnssýslu og Litlá í
Kelduhverfi á leigu en veiðileyfi
í þær eru seld á vegum SVFR
sem einnig selur veiðileyfi að
hluta í Laxá í Kjós og Langá í
samvinnu við Lax ehf.
Að sögn Jóns Þórs
Júlíussonar, annars
framkvæmdastjóra Lax ehf.,
hafa miklar breytingar orðið á
íslenskum veiðileyfamarkaði á
skömmum tíma.
„Skellurinn í ár birtist í því
að innanlandsmarkaður hrundi
og við fundum einnig fyrir því
að útlendingar voru tregari
til en venjulega að festa sér
veiðidaga í lok síðasta árs.
Salan fór hins vegar af stað
af fullum krafti í lok janúar
og eftir á að hyggja varð
niðurstaðan betri en maður
hefði þorað að vona í ljósi
þeirrar miklu kreppu sem riðið
hefur yfir,“ segir Jón Þór.
Líkt og allir aðrir
veiðileyfasalar settust
stjórnendur Lax ehf. niður
með sínum viðsemjendum til
að leita leiða til að bregðast
við gjörbreyttum aðstæðum á
veiðileyfamarkaðnum. Jón Þór
segir að þeir samningar hafi
gengið vel og átakalaust fyrir sig.
„Ég tel að verðlækkanir verði
um 6-10% á næsta ári. Verð
veiðileyfa kemur til með að
lækka í jaðri besta veiðitímans
en að öðru leyti reikna ég með
því að verðið verði óbreytt á milli
ára,“ segir Jón Þór.
Hann segir engan vafa leika á
því að á næsta ári muni erlendir
kaupendur veiðileyfa bera uppi
rekstur stærstu og dýrustu
laxveiðiánna. Það sé út af fyrir
sig góð þróun því ekki veiti af
því að fá gjaldeyri inn í landið
með öllum ráðum við þær erfiðu
aðstæður sem nú ríki.
Jón Þór segist telja að flestir
veiðileyfasalar á Íslandi séu með
verðskrá sína í erlendri mynt eða
að þeir taki a.m.k. mið af gengi
erlendra gjaldmiðla við ákvörðun
á verði. Samkeppnin sé mikil
erlendis frá og hún fari síst
minnkandi.
„Við erum m.a. að keppa við
veiðileyfasala sem selja veiðileyfi
á Írlandi, í Skotlandi, Rússlandi,
Kanada, Argentínu og Chile. Það
sem mér finnst ef til vill vera í
mestum vexti um þessar mundir
er veiðileyfasalan í Alaska,“
segir Jón Þór Júlíusson.
Stefán Sigurðsson sölustjóri hjá Lax-á:
engar verðhækkanir á næsta ári
Við gættum þess að halda erlendum veiðimönnum inni á tímum góðærisins, segir
Stefán Sigurðsson sölustjóri hjá Lax-á. Á milli 1200 og 1500 erlendir veiðimenn koma á
vegum Lax-ár til landsins á hverju ári. Verðskráin er í evrum erlendis en krónum hér heima.
Jón Þór Júlíusson hjá Laxi ehf.