Læknablaðið - 01.01.2015, Blaðsíða 56

U M f J Ö l l U n O G G R E i n a R
56 LÆKNAblaðið 2015/101
■ ■ ■ Hávar Sigurjónsson
„Þetta er uppsafnaður vandi til margra
ára sem hefur skapað þetta ástand, þó
launakjörin og nýliðun í stéttinni séu í
brennidepli núna,“ segir Einar Páll Indr-
iðason svæfinga- og gjörgæslulæknir
á Landspítalanum sem hefur sagt upp
störfum frá og með 1. janúar. Hann er
ekki sá eini í hópi lækna sem tekið hefur
þessa erfiðu ákvörðun þar sem tveir aðrir
læknar í sömu sérgrein hafa einnig sagt
upp þegar þetta er skrifað (16. desember)
og líklega munu fleiri hafa bæst í hópinn
um áramótin.
Einar Páll hefur starfað á Landspítalanum
frá árinu 2001, eftir 8 ára sérnám við há-
skólasjúkrahúsið í Lundi í Svíþjóð. Hann
hefur verið í 100% stöðu við Landspítalann
frá árinu 2010 en áður var hann í 80%
stöðu við spítalann og einn dag í viku á
einkaskurðstofum í Domus. Það verður
því skarð fyrir skildi er hann hverfur af
vettvangi, hann er einn af mörgum færum
sérfræðingum í svæfinga- og gjörgæslu-
lækningum á Landspítala, en þeim fer
sífellt fækkandi læknunum sem helga
spítalanum alla starfskrafta sína. „Slæm
launakjör brenna einnig heitast á okkur
sem þiggjum eingöngu laun á spítal-
anum,“ segir hann.
seinþreyttir til vandræða
„Uppsafnaður vandi segi ég, eftir óábyrgar
sparnaðarkröfur á spítalann, slegið hefur
verið í og úr með byggingu nýs spítala allt
frá því ég kom hér til starfa, álagið á starfs-
fólkið hefur aukist jafnt og þétt og tæki og
húsnæði gengið úr sér án þess að hugað
sé að endurnýjun. Þegar síðan bætist við
getuleysi stjórnvalda til að bæta launa-
kjör okkar og ekkert virðist eiga að koma
til móts við lækna, finnst mér bara komið
nóg. Nýliðun í læknastéttinni verður að
tryggja og það gerist eingöngu ef launa-
kjör og starfsaðstaða batnar. Þetta er líka
mitt svar við orðum heilbrigðisráðherra
þegar hann segir að hann trúi því ekki að
læknar muni segja upp. Við læknar erum
vissulega seinþreyttir til vandræða og
höfum sætt okkur við að dragast aftur úr í
launakjörum alltof lengi. Og hafi eitthvað
skort á samstöðuna meðal lækna áður þá
er hún algjör núna og stjórnvöld verða
bara að átta sig á því ef ekki á verulega illa
að fara.“
Hann kveðst ekki hafa hugsað það til
enda hvað hann taki sér fyrir hendur eftir
að starfstíma hans á Landspítalanum lýk-
ur. „Það er allt opið. Ég get farið að vinna
á stofu út í bæ og ég get ráðið mig í hálfa
stöðu á spítala í Svíþjóð og farið á milli
þó fjölskyldan búi hér. Samgöngur eru
það góðar að slíkt er ekki nein hindrun
lengur.“
Einar Páll kveðst munu íhuga að draga
uppsögn sína til baka ef samningar takast
fyrir áramót. „Með uppsögninni er ég
vissulega að leggja mitt af mörkum til þess
að samningar takist. Við erum þrjú í þess-
ari sérgrein hér á gjörgæsludeild Land-
spítalans í Fossvogi sem höfum sagt upp
nú þegar og það þýðir að verulega mun
þrengja að starfseminni og erfitt verður að
manna vaktir svo fullnægjandi sé.“
sinna veikustu sjúklingunum
Svæfinga- og gjörgæslulæknar starfa
við svæfingar í öllum aðgerðum auk
þess að sinna sjúklingunum sem liggja
á gjörgæsludeild. „Þetta eru veikustu
sjúklingar spítalans og ég segi bara hreint
út að ef svæfinga- og gjörgæslulæknar
hverfa af spítalanum þá lamast hann. Þá
er ekki hægt að sinna veikustu og mest
slösuðu sjúklingunum og ekki hægt að
framkvæma neinar aðgerðir sem kalla á
svæfingar.“
Alls eru 12 svæfinga- og gjörgæslu-
læknar starfandi í Fossvogi og að sögn
Einars Páls eru fleiri í þeim hópi að íhuga
uppsögn. Þá eru ótaldir læknar í öðrum
sérgreinum á Landspítala við Hring-
braut og í Fossvogi, bæði sérfræðingar og
almennir læknar, sem sagt hafa upp að
undanförnu eða hyggjast gera það á næst-
unni.
„Ég vil starfa á spítala og helst hér á
Landspítala. Þetta er frábær vinnustaður,
og þá á ég við samstarfsfólkið, því hér er
valinn maður í hverju rúmi og ómetanleg
verðmæti fólgin í mannauðnum. Það væri
óbætanlegt tjón að glata honum. Það er
ekki auðveld ákvörðun að segja upp eftir
13 ára starf. Ég vil þó ekki vinna hér nema
búið sé betur að okkur en nú er gert.“
„Óbætanlegt að glata mannauðnum”
„Hér er valinn maður í hverju rúmi og ómetanleg verðmæti fólgin í mannauðnum. Það væri óbætanlegt tjón að glata
honum,“ segir Einar Páll Indriðason svæfinga- og gjörgæslulæknir.
Einar Páll Indriðason
svæfinga- og
gjörgæslulæknir
hefur sagt upp