Dagblaðið Vísir - DV - 01.07.2011, Page 7

– lækkar verð
Eftir ágæta frammistöðu í stundvísi síðasta hálfa árið hefur áætlunarflug okkar í júní því miður verið langt frá
því sem viðunandi er. Á því biðjum við farþega okkar innilega afsökunar. Ástæða þessara seinkana er að
mestu fólgin í breytingum á þjónustu við vélar okkar í Keflavík sem nauðsynlegt var að ráðast í um síðustu
mánaðamót. Í upphafi var gert ráð fyrir að þær breytingar hefðu einungis í för með sér truflanir í örfáa daga
en af óviðráðanlegum ástæðum hefur breytingaferlið tekið lengri tíma en séð var fyrir.
Iceland Express hefur sett sér það markmið að vera með vélar sínar á réttum tíma, þ.e. innan 15 mínútna
skekkjumarka, í að minnsta kosti 75% tilfella. Fyrir sparnaðarflugfélag sem verður að halda niðri kostnaði með
öllum tiltækum ráðum er það metnaðarfullt markmið en samt ekki óraunhæft. Við stefnum þangað ótrauð og
vonum að á leiðinni verði okkur bæði sýndur skilningur og stuðningur.
Samhliða ýtrustu öryggiskröfum hefur Iceland Express alla tíð einbeitt sér að því að lækka verð á flugi til og
frá Íslandi. Engum dylst að það hefur tekist afar vel – og engum getur heldur dulist hve miklu máli það skiptir
fyrir frelsi okkar til að ferðast og möguleika útlendinga til að heimsækja land og þjóð. Margir telja að félagið
hafi á undanförnum árum lækkað verð hvers farmiða flugfélaganna sem hingað fljúga um verulegar fjárhæðir.
Um tvær milljónir ferðamanna fara um Leifsstöð á þessu ári og enda þótt einungis sé reiknað með tíu þúsund
króna lægra fargjaldi hvers þeirra vegna tilvistar Iceland Express á markaðnum þýðir það heildarsparnað upp á
um 20 milljarða króna. Þannig stendur Iceland Express undir nafni sem ósvikið sparnaðarflugfélag fyrir
farþega sína um leið og það leggur samfélaginu til mikil verðmæti.
Um þessar mundir flytur Iceland Express um hálfa milljón farþega á ári og veitir hátt í 300 manns atvinnu.
Með starfsemi okkar og flutningi erlendra ferðamanna til landsins sköpum við umtalsverða atvinnu í ferða-
þjónustu á Íslandi. Í þeim efnum erum við staðráðin í að leggja enn meira af mörkum á næstu misserum. Við
vitum að forsenda þess að þau áform gangi eftir er bætt frammistaða í áreiðanleika. Þess vegna munum við
leggja allt í sölurnar fyrir aukna stundvísi.
Við biðjumst
velvirðingar