Dagblaðið Vísir - DV - 17.10.2008, Blaðsíða 36

föstudagur 17. október 200836 Helgarblað
Plöturnar eru báðar mjög per-sónulegar. Það fer alltaf svo-lítið af sjálfri mér í lögin,“ segir Lovísa Elísabet Sigrún-
ardóttir, tónlistarkona og lagahöf-
undur, betur þekkt undir listamanns-
nafninu Lay Low.
Hún söng sig inn í hug og hjarta Ís-
lendinga fyrir tveimur árum er fyrsta
plata hennar, Please don´t hate me,
kom út. Platan seldist gríðarlega vel
og sópaði hún að sér tilnefningum til
íslensku tónlistarverðlaunanna það
árið.
Aðdáendur söngkonunnar heyra
hreinskilnina á fyrstu plötunni.
Blaðamaður spyr hvort hún upplifi
sig berskjaldaða á plötunni og svar-
ar hún játandi. „Flestir setja sjálfa
sig inn í lögin sem þeir semja, auð-
vitað mismikið en svo fer það algjör-
lega eftir textunum,“ segir Lovísa
sem vann nýju plötuna sín, Farewell
Good Night’s Sleep, í London með
upptökustjóranum Liam Watson
sem tók meðal annars upp plötuna
Elephant með The White Stripes.
Betri söngkona
„Helsti munurinn á nýju plötunni
og þeirri gömlu er að þær eru unnar
á mjög ólíkan hátt. Fyrsta platan var
var tekin upp heima og það var mik-
ill kósí fílingur yfir henni. Nýja platan
var unnin í stúdíói með reynslumikl-
um upptökustjóra og heilli hljóm-
sveit. Það er aðeins meira um að vera
á þessari plötu,“ útskýrir Lovísa. „Það
er meira kántrí á þessari plötu. Hún
er samt mun hressari en fyrri platan
og ég er ótrúlega ánægð með útkom-
una,“ bætir hún við.
Lovísa viðurkennir að erfitt hafi
verið að sleppa plötunni frá sér. „Ég
hefði getað unnið að henni enda-
laust. Einhver varð að koma og segja
stopp,“ segir hún og hlær.
Þar sem plötur hennar eru afar
persónulegar forvitnast blaðamaður
um hvaðan innblásturinn kemur.
„Ég leita í svo margt, tilfinning-
ar mínar, lífsreynslu mína og sög-
ur af vinum mínum.“ Hún segir að
breytingar hafi orðið á henni sem
söngkonu á þessum tveimur árum.
„Þegar fyrri platan kom út var ég til-
tölulega nýbyrjuð að syngja og var
frekar óreynd á því sviði. Þó að ég
sé ekki með mestu reynsluna í dag,
heyri ég mikinn mun á rödd minni.“
Ekki æst í sviðsljósið
Lovísa varð stjarna á nánast einni
nóttu. Hún viðurkennir að mikl-
ar breytingar hafa orðið á lífi henn-
ar. „Auðvitað var þetta mikil breyt-
ing fyrir mig. Ég fór frá því að vera
óþekkt í það að vera frekar mikið út
á við. Mér finnst ég samt vera mjög
heppin, hvernig þetta er allt saman
búið að fara. Ég hef fengið tækifæri
til að vinna við það sem mér finnst
skemmtilegt og því fylgir að vera
meira út á við,“ viðurkennir Lovísa
og bætir við: „Það þjálfast að vera í
sviðsljósinu en ég er ekki æst í það.“
Auk þess að sinna sínum eigin söng-
ferli er Lovísa í rokksveitinni Benny
Crespo´s Gang sem einnig spilar á
Airwaves í ár. Magnús Öder, bassa-
leikari sveitarinnar, og Lovísa voru
gift um tíma. Sambandið gekk ekki
upp og þau skildu. Lovísa gerir lít-
ið úr því þegar blaðamaður spyr út
í hjónabandið. „Þetta er ekkert stór-
mál. Við vorum ung. Við erum góðir
vinir í dag og spilum enn saman.“
Fjölskyldan sameinast
á tónleikum
Lovísa er uppalin af móður sinni
í Reykjavík. En móðir hennar bjó um
tíma í London á Englandi þar sem
hún kynntist föður Lovísu, Hiran
sem er ættaður frá Sri Lanka.
„Mamma og pabbi kynntust í
London. Seinna skildu þau og ég
flutti ásamt mömmu mjög ung til Ís-
lands. Ég á varla neinar minningar
þaðan.“
Blaðamaður spyr hvernig sam-
band hennar sé við föður sinn eða
hvort það sé eitthvað samband.
„Ég fór alltaf á sumrin til hans og
við eyddum miklum tíma saman í
sumar til dæmis er ég var að taka upp
plötuna,“ segir hún. „Við erum mikl-
ir vinir og hann er rosalega spennt-
ur yfir tónlistarferli mínum. Hann er
einmitt staddur hér á landi núna og
var viðstaddur útgáfutónleikana og
ætlar að koma með mér á Airwaves-
hátíðina,“ segir Lovísa. Hiran, faðir
hennar, á aðra dóttur sem einnig er
stödd hér á landi um þessar stundir.
„Svo kom amma mín sérstaklega til
landsins, en hún býr í Portúgal. Það
var sannkallað ættarmót í Fríkirkj-
unni,“ segir Lovísa og hlær.
Fær að gera það
sem hún elskar
Í kjölfar velgengni Please don’t
hate me fékk Lovísa nokkur merkileg
verkefni upp í hendurnar. Hún söng
lag inn á kvikmyndina Brúðgumann
og var tónlistarstjóri í leikverkinu
Ökutímar.
„Ég var titluð sem tónlistarstjóri
og fannst mér það frekar stórt verk-
efni. En það var mjög skemmtilegt
og ágætis tilbreyting frá því að spila
og túra og fara síðan í svona stab-
ílt verkefni. Mér fannst þetta erfitt
og tónlistin kom ekki auðveldlega.
En ég var þarna eins og leikari á öll-
um æfingum og samdi lögin í kring-
um það,“ viðurkennir Lovísa. Verkið
Ökutímar, sem sýnt var hjá Leikfé-
lagi Akureyrar, verður sýnt í Borgar-
leikhúsinu næsta vor og mun Lovísa
einnig koma að því verkefni. Tónlist-
in var tilnefnd til Grímunnar í ár og
hreppti verðlaunin örugglega.
Í dag hefur Lovísa fengið það
tækifæri að vinna einungis við tón-
listina sem hún elskar meira en allt.
„Eins og er geri ég ekkert annað, en
ég veit ekki hvernig verkefnin verða
seinna meir. Ég sé bara til.“
Helgin fer að mestu í Airwaves.
„Ég spila á Rósenberg á laugardeg-
inum og ég spila líka með Benny
Crespo´s Gang. Þess á milli langar
mig að sjá aðrar sveitir og auðvit-
að verja tíma með pabba mínum.
Ég fæ að taka hann með mér þegar
ég er að spila, en ég veit ekki hvort
hann fari á hátíðina sjálfa,“ segir
hún hlæjandi.
Söngkonan Lovísa Elísabet Sigrúnardóttir sendir frá sér sína aðra breiðskífu sem Lay Low. Hún hefur fengið
gífurlega góðar undirtektir hjá gagnrýnendum. Lovísa hélt útgáfutónleika í Fríkirkjunni í gær og hélt síðan
beinustu leið á NASA þar sem hún kom fram sem hluti af Airwaves-hátíðinni. Öll fjölskyldan var samankom-
in til þess að styðja söngkonuna. Faðir hennar flaug frá London til að vera viðstaddur tónleikana ásamt systur
hennar. Hún segir hann rosalega spenntan yfir tónlistarferli dóttur sinnar. Amma hennar flaug einnig frá
Portúgal þar sem hún er búsett til að bera barnabarn sitt augum.
Ættarmót
á útgáfutónleikum
Lay Low gefur út sína aðra
breiðskífu sem hlotið hefur heitið
farewell good Night’s sleep.
MYND HEIÐA HELGADÓTTIR
Ástsæl söngkona Íslendingar tóku ástfóstri við
Lovísu elísabetu er fyrsta plata hennar kom út.
Hún segist elska að vinna við tónlistina.
MYND HEIÐA HELGADÓTTIR