Tímarit hjúkrunarfræðinga - 01.06.2013, Blaðsíða 32

Tímarit hjúkrunarfræðinga – 3. tbl. 89. árg. 201328
Á undanförnum misserum hefur mikil vinna verið lögð
í það innan Félags íslenskra hjúkrunarfræðinga að
styrkja ímynd hjúkrunarfræðinga og félagsins. Hér
fylgir samantekt á vinnu ímyndarhóps síðastliðið ár.
ÍMYND, ÁHRIF OG KJÖR HJÚKRUNARFRÆÐINGA
Veggspjald með nýjum gildum Félags
íslenskra hjúkrunarfræðinga.
Eldra veggspjaldið með kjörorðum
sem nú hefur verið breytt.
Vigdís Hallgrímsdóttir, vhallgrimsdottir@gmail.com
Á aðalfundi FÍH vorið 2011 var samþykkt ný stefna Félags íslenskra hjúkrunarfræðinga
í hjúkrunar­ og heilbrigðsmálum til ársins 2020. Stefnan var unnin með þátttöku
fjölmargra hjúkrunarfræðinga. Í henni er sett fram stefna í ýmsum málaflokkum og
með samþykkt hennar voru gildi félagsins endurnýjuð. Ný gildi, þekking, færni og
umhyggja, koma þá í stað eldri gilda, hugur, hjarta og hönd:
Þekking stendur fyrir rannsóknir og fagmennsku í hjúkrun
Færni stendur fyrir þjálfun og notkun faglegrar þekkingar
Umhyggja stendur fyrir virðingu, samheldni og trúnað
Á vormánuðum 2012 hrinti stjórn FÍH af stað verkefninu Ímynd, áhrif og kjör. Skipaðir
voru þrír vinnuhópar sem unnu tillögur sem voru kynntar á aðalfundi félagsins í maí
2012. Undirrituð fékk það verkefni að vera í forsvari fyrir hóp sem vann tillögur að því
hvernig bæta megi ímynd hjúkrunarfræðinga. Í kjölfar þessa verkefnis óskaði stjórn
FÍH eftir því að fjórir hjúkrunarfræðingar úr ímyndarhópnum myndu vinna tillögur að
útliti á nýju veggspjaldi eða gildum félagsins og útliti á nýrri stefnu. Í vinnuhópnum
voru Aðalbjörg Stefanía Helgadóttir, Birna Flygenring, Gyða Baldursdóttir og Vigdís
Hallgrímsdóttir. Hópurinn lagði áherslu á að hönnunin myndi höfða til breiðs hóps
hjúkrunarfræðinga og miðla þeim áhrifum sem hjúkrunarfræðingar geta haft á líf fólks.
Leitað var eftir hugmyndum frá nokkrum hönnuðum og ákvað hópurinn í kjölfar þess
að vinna með Magnúsi Loftssyni sem er grafískur hönnuður með áralanga reynslu í
auglýsinga­ og ímyndar vinnu. Megin hugsun Magnúsar í þessu verkefni er að kynna
hjúkrunar fræðinga og störf þeirra og nýta til þess innihald stefnunnar. Anna Gyða
Gunnlaugsdóttir, hjúkrunarfræðingur og ljósmyndari, var fengin til að taka myndir af
fjölmörgum hjúkrunarfræðingum við störf sín. Myndirnar birtast í nýrri útgáfu af stefnu
félagsins ásamt öðru útgefnu efni sem er meðal annars:
1. Veggspjald með nýjum gildum
Veggspjaldið kemur í stað eldra veggspjalds með kjörorðum hjúkrunar: hugur, hjarta,
hönd. Gert er ráð fyrir að veggspjaldið verði prentað og því dreift á stofnanir þar sem
hjúkrunarfræðingar starfa. Gildin eru í aðalhlutverki og táknin fyrir framan þau hafa
skírskotun til þeirra og í merki félagsins. Mikilvægt er að hjúkrunarfræðingar taki þátt
í að skipta nýju veggspjaldi út fyrir það eldra á vinnustöðum sínum.