Gerðir kirkjuþings - 01.01.2011, Side 80

80

Kynþáttafordómar leynast víða
Ekki eru allir kynþáttafordómar sýnilegir eða uppi á borðinu, segir Toshiki Toma,
prestur innflytjenda í viðtali við sjónvarp kirkjunnar. Toshiki segir að duldir fordómar
komi meðal annars fram í því hvernig opinbera kerfið veitir útlendingum ekki sömu
þjónustu og Íslendingum. Þetta er oft vandséð vegna þess að útlendingar hafa ekki
alltaf sterka málsvara hér á landi.
Toshiki brýnir líka að við þurfum að vera vakandi fyrir því hvað börnin okkar skoða á
netinu því rasistahópar nota netið grimmt til að ná til ungs fólks með sinn vonda
boðskap. Eineltismál sem snerta börn og alla fjölskylduna tengjast oft því sem er að
finna á netinu, því þarf að vera vakandi og gagnrýnin á efnið þar.
Kirkjurnar taki höndum saman
Það er kjarnaatriði í kristinni trú að meta alla menn jafnt, segir Baldur Kristjánsson
formaður þjóðmálanefndar í viðtali við sjónvarp kirkjunnar. Boðskapur Jesú Krists og
kirkjunnar snýr að því að allir menn séu jafnir, jafngildir og jafnverðmætir. Þar eru
menn ekki flokkaðir heldur teknir fyrir það sem þeir eru.
Við eigum að halda áfram að nálgast alla sem koma hingað. Eitt praktískt atriði lýtur
að því að kirkjurnar á Íslandi starfi saman í því að bjóða útlendinga velkomna. Ekki
hugsa hvað er lúthersk kirkja og hvað er kaþólsk, heldur taka höndum saman í því að
nálgast innflytjendur og rjúfa einangrun. Því það er svo dýrmætt að mætast í kirkjunni
og annars staðar, segir Baldur.
Kirkjustarf gegn kynþáttafordómum
Magnús Erlingsson, sóknarprestur á Ísafirði, sagði frá kirkjustarfi á Vestfjörðum. Þar
búa margir erlendir ríkisborgarar. Kirkjan hefur meðal annars staðið fyrir friðarvöku
með þátttakendum frá ólíkum þjóðlöndum. Hún var haldin í kirkjunni og lauk með
matarsamkomu. Magnús benti á að kirkjan gæti haft frumkvæði og boðið upp á
vettvang til samtals og uppbyggingar.
Svavar Stefánsson og Ragnhildur Ásgeirsdóttir sögðu frá starfi meðal nýbúa og inn-
flytjenda í Fella- og Hólakirkju. Listasmiðjan Litróf er vel heppnað verkefni þar sem
koma saman um 70 stúlkur, þar af eru 15 af erlendum uppruna og með ólíkan
bakgrunn.

Málþing um fátækt
Á mesta velferðarskeiði Íslandssögunnar jókst misskipting í landinu. Eftir hrun hefur
mistekist að verja hag þeirra sem minnst mega sín. Útilokað er að lifa af lægstu
launatöxtum eða örorkubótum og atvinnuleysi er mikið. Fátækt hefur aftur numið land
á Íslandi.
Þjóðmálanefnd kirkjunnar kallar til málþings um fátækt á Íslandi föstudaginn 6. maí.
Þar verður leitað svara við því hvernig við eigum að bregðast við fátæktinni og