Skírnir - 01.09.2015, Blaðsíða 90

Fyrir umræðuna á þessum síðum má álykta að engin sérstök ástæða
sé til að draga ártalið 1226 í efa.
En hvað þá með ritunartíma Egils sögu? Ef gert er ráð fyrir að ár-
talið 1226 sé rétt má segja að vegna mögulegra rittengsla hennar við
Tristrams sögu hafi höfundur Eglu hlotið að hafa komist í tæri við
söguna tiltölulega fljótlega eftir þýðingu, því Egils saga er talin með
elstu Íslendingasögum. Um það vitnar langelsta handritsbrot Ís-
lendingasögu sem er aldursgreint til miðrar 13. aldar (Speed Kjeld-
sen 2005b: 195; Vésteinn Ólason 2006: 40). Egils saga er auk þess
eina Íslendingasagan sem hefur með talsverðum líkum verið eignuð
nafngreindum höfundi. Kenningar um nánari tímasetningu ritunar
hennar um miðja 13. öld byggjast nokkuð á því að Snorri Sturluson
sé höfundur Eglu. Árið 1904 færði Björn M. Ólsen (1904: 229) rök
fyrir því18 og byggði meðal annars á þeirri þekkingu höfundar sem
birtist í verkinu, sögusviði þess og líkindum við Heimskringlu. Sig-
urður Nordal (1933: xciii) tókst á við efnið og var einnig sannfærður
um að Snorri væri höfundur hennar. Þó að þetta verði aldrei útkljáð
með vissu hafa vísbendingar um að Snorri kunni að vera höfundur-
inn styrkst eftir því sem tímar hafa liðið, meðal annars með rann-
sóknum Peters Hallberg sem sýndu mjög mikil líkindi orðaforða
Eglu og Heimskringlu sem einnig er eignuð Snorra, líkindi sem
Hallberg segir án vafa meiri en hægt sé að krefjast af tveimur
verkum sama höfundar (Hallberg 1968: 39). Það má benda á vegna
tengsla Eglu við forngrískan hugmyndaheim að menntun Snorra
virðist einmitt hafa litast mjög af hugmyndum 12. aldar endur-
reisnar, eins og Helgi Þorláksson (2014: 371–373) hefur fjallað um.
Björn M. Ólsen (1904: 230–231) miðar við að Snorri hafi skrifað
verkið ekki síðar en 1208,19 á meðan hann bjó á Borg. Rökin eru
lýsingar á landnámi Skalla-Gríms í sögunni og að verkið beri þess
merki að vera ritað þegar Snorri var ungur (Björn M. Ólsen 1937–
1939: 211). Síðari tíma fræðimenn telja þetta allt of snemmt og vilja
annaðhvort miða við fyrri för Snorra til Noregs (1218–20) eða
390 brynja þorgeirsdóttir skírnir
18 Rökin leggur Björn fram á bls. 202–230 í ritgerð sinni „Landnáma og Egils saga“
(Björn M. Ólsen 1904).
19 Varðandi ártalið, sjá neðanmálsgrein Björns á bls. 230.
Skírnir Haust 2015 NOTA ÞESSA.qxp_Layout 1 19.10.2015 10:51 Page 390