Litli Bergþór - 01.07.2017, Blaðsíða 22

22 Litli-Bergþór
Leikskólinn Álfaborg
Lambadalur
Í Lambadal, yngri deild leikskólans, er ávallt líf og fjör. Mestu
máli skiptir að börnunum líði vel og finni fyrir öryggi. Við veitum
þeim hlýju, umhyggju og sýnum þeim festu. Rík áhersla er lögð á
vináttuna; að börnin sýni hvert öðru vinsemd í orðum og gjörðum.
Þau eru hvött til að hjálpast að, deila með sér hlutum og skiptast
á. Við tölum mikið um það að vera vinur og mikilvægi þess að
vera góður við aðra til þess að eignast vini. Frjálsi eða sjálfsprottni
leikurinn er í hávegum hafður hjá okkur. Í gegnum hann eflist
félagsfærni barnanna og við gætum þess að leikefnið sé börnunum
sem aðgengilegast, bæði fyrir ýmsa borðvinnu, leik á gólfinu og
síðast en ekki síst hlutverkaleikinn/ þykjustuleikinn.
Í tónlistarstundum hafa þau meðal annars verið að læra muninn á
veikum og sterkum hljóðum, klappa eftir atkvæðum (t.d. nöfnin
sín), þau hlusta og dansa við tónlist og fá að prófa ýmis hljóðfæri.
Í myndlistinni gera þau alls konar listaverk, bæði einstaklings og
sameiginleg, og kynnast þannig ólíkum efnivið og þjálfa fínhreyfingar.
Í íþróttahúsinu, ásamt börnunum í eldri deild leikskólans, fá þau útrás
fyrir hreyfiþörfina, fara í alls konar þrautabrautir og leiki, leika
frjálst með bolta og fleira sem er í boði. Útikennslan fær sífellt
meira vægi hjá okkur og nýtist vel í að kenna börnunum að bera
virðingu fyrir náttúrunni okkar. Þau hafa farið í gönguferðir og týnt
rusl og lært í kjölfarið að ruslið á að fara í ruslafötur eða ruslapoka.
Yngri börn Lambadals hafa einnig farið í myndlist í vetur, kynnst
hljóðfærum í gegnum leik og fengið líkamlega útrás og styrkingu
í útiverunni.
Við erum að safna efnivið í svokallaðan könnunarleik (rannsóknar-
leikur), sem ætlaður er fyrir börn á aldrinum 1-3 ára. Efniviðurinn
þarf að vera mjög fjölbreyttur svo börnin fái sem mesta örvun út
úr leiknum. Það geta verið þvottaklemmur (tré), allskonar borðar,
keðjur af ýmsum stærðum, könglar, sleifar, ausur, krukkulok
(málmur, plast), hurðarhúnar
(tré), gardínuhringir. Svona
mætti lengi telja og ef þið
lumið á einhverju af þessu
tagi og viljið losa ykkur við,
þá tökum við fagnandi á móti.
Sólar- og sumarkveðjur
Eyrún Ósk, deildarstjóri
Lambadals.
Einu sinni í viku hafa
elstu börn Lambadals
farið í skipulagðar stundir
í tónlist, myndlist og
íþróttum. Þar læra þau að
vera í hóp, að taka tillit til
hvers annars, að hlusta og
að fara eftir fyrirmælum.
Greipur Guðni og Thelma Rán hjálpast að við
að byggja turn.
Leikið með hljóðfæri. frá vinstri Sara Katrín,
Ólafur og Þorleifur Máni.
Leikið með snjó og dýr inni. Frá vinstri
Hallgrímur Valur, Greipur Guðni, Sara Katrín,
Aðalbjörg og Ólafur.
Málað. Frá vinstri Emelía Ísold og Aðalbjörg.
Áki Hlynur og Thelma Rán vatnslita.