Litli Bergþór - 01.07.2017, Blaðsíða 34

34 Litli-Bergþór
Veðrið í Tungunum í vetur. Um vetrarsólstöður
kólnaði í veðri með fyrsta snjó vetrarins. Jólin
urðu hvít, en síðan tóku við umhleypingar milli
jóla og nýjárs með hláku. Gamlársdagur heilsaði
hins vegar bjartur og fagur og skartaði fegursta
sólsetri, norðurljósum og fínu skotveðri um
kvöldið.
Veður var annars meinlaust í vetur og engin
stórviðri að ráði. Uppsveitir sluppu vel við
nokkrar krappar lægðir sem gengu yfir landið
og hitastig hélt sig flesta daga sitt hvoru megin
við frostmarkið, að frátöldum örfáum alvöru
frostdögum. Frost var í kringum kveðjuhóf lækn-
anna í janúar og svo aftur í apríl, sem var ágætt til
að forða gróðri frá ótímabærum gróanda. Snjór
vetrarins féll í logni á einni nóttu 26.-27. febrúar
og hélst fram í fyrstu viku mars. Annars rigndi
frekar, og frá því í byrjun maí hefur hiti ekki farið
niður fyrir frostmark svo kalla má. Góð færð var
flesta daga og lítið um lokanir á vegum. Jörð kom
frostlaus undan vetri og gróður tók því snemma
við sér.
Læknarnir kvaddir. Þeir Pétur Skarphéðinsson
og Gylfi Haraldsson, læknar okkar uppsveitabúa
í yfir 30 ár, voru kvaddir með pompi og prakt
í Aratungu þ. 12. janúar sl., en þeir urðu
báðir sjötugir á síðasta ári. Sveitarstjórnir og
kvenfélög í uppsveitum stóðu sameiginlega að
þessari kveðjuhátíð, sem fór að öllu leyti vel
fram. Haldnar voru ræður, félagar úr Leikdeild
Ungmennafélags Biskupstungna léku, kórar
sungu og kvenfélagskonur báru fram veitingar
Hvað segirðu til?
í boði hreppanna og gengu um beina. Íbúarnir
sýndu hlýhug sinn til þeirra höfðingjanna með
því að fjölmenna í hófið, enda er þeirra Péturs og
Gylfa sárt saknað.
Hólmfríður og Steinar í gróðrarstöðinni Kvist-
um hafa keypt gróðurhúsin í Jarðarberjalandi,
en lóðirnar liggja hlið við hlið, við Lyngbraut í
Reykholti. Þau munu halda áfram jarðarberjarækt
þar.
Knútur og Helena í Friðheimum hafa keypt
íbúðarhúsið að Bjarkarbraut 24, sem var
í eigu Óskars Guðmundssonar og Hafdísar
Leifsdóttur, undir starfsfólk fyrirtækisins. Umsvif
ferðaþjónustunnar í Friðheimum hafa aukist
geysilega síðustu ár og þar með fjöldi starfsmanna.
Nýtt aðstöðuhús fyrir eldhús er einnig í byggingu
við hlið gróðurhússins, þar sem gamla eldhúsið
var algerlega sprungið að sögn Helenu, en þar
verður áfram aðstaða fyrir uppvask og fleira.
Nýja eldhúsið verður á neðri hæð aðstöðuhússins
og skrifstofa, fundarherbergi og kaffiaðstaða
starfsfólks á efri hæðinni.
Íbúðarhúsið í Laugargerði í Laugarási hefur
verið selt nágrönnunum í Lyngási, en Fríður
Pétursdóttir og Reynir Ásberg fluttu á Selfoss á
síðasta ári.
Gistiheimilið Fagrilundur, sem áður var veit-
ingahúsið Kletturinn við Skólabraut í Reykholti,
hefur verið selt Jóhanni Guðna Reynissyni. Ína
Björk dóttir hans er sest að í Fagralundi og mun
reka gistiheimili áfram á staðnum. Pétur og Gylfi kvaddir af Helga Guðmundssyni.
Runólfur og Egill sem Pétur og Gylfi. (Mynd Ívar Sæland).