Litli Bergþór - 01.07.2017, Blaðsíða 33
Litli-Bergþór 33
Haustfundurinn okkar var haldinn þann 29.
september og eftir fundinn kom gyðjan og
jógakennarinn Unnur Arndísardóttir og fór í
gegnum smá gyðjuathöfn með okkur, til að
virkja góðar hugsanir og samkennd í hópnum.
Að lokum lét hún hverja konu draga spil og lýsti
persónueinkennum hennar út frá því.
Kvenfélagið kom að hátíð, sem haldin var í tilefni
30 ára afmælis leikskólans Álfaborgar og gaf
vinnu við veitingar. Var þetta frábær samkoma
og einstaklega gefandi. Fjöldi tónlistarmanna úr
héraði kom fram á samkomunni, auk Svavars
Knúts, og safnaðist nokkurt fé til styrktar
leikskólanum. En vegna skemmda á húsnæði og
innbúi skólans, af völdum myglusvepps, þurfti að
flytja starfsemina yfir í grunnskólann og endurnýja
hluta af munum og leikföngum.
Þann 1. október fórum við í haustferð með eldri
borgurum og var það blómabærinn Hveragerði,
sem varð fyrir valinu í þetta sinn. Fyrsta stopp
var á Listasafni Árnesinga, þar sem samsýning
Karls Kvarans og Erlu Þórarinsdóttur var skoðuð.
Við fórum á steinasýninguna Ljósbrá, sem er
eitt stærsta kristalla- og steingervingasafn í
einkaeigu á Íslandi. Fengum okkur síðan kaffi
í Skyrgerðinni, gamla Þinghúsinu, þar sem við
hittum Njörð Sigurðsson sagnfræðing, sem keyrði
með okkur um Hveragerði og sagði okkur sögur.
Að lokum var snæddur gómsætur kvöldverður í
Tryggvaskála í boði Kvenfélagsins, en rútan var
í boði Bláskógabyggðar. Skemmtileg ferð og allir
komu sælir heim.
Hinn árlegi jólamarkaður var þ. 26. nóvember
með tilheyrandi kaffiveitingum og tombólu og
jólafund héldum við í Bergholti
þ. 6. desember, þar sem konur
gerðu sér glaðan dag.
Kvenfélag Biskupstungna
tók að sjálfsögðu þátt í vinnu
við veitingar í kveðjuhófi
læknanna okkar, þeirra Péturs
og Gylfa, sem haldið var í
Aratungu þ. 12. janúar s.l. En
það var samvinnuverkefni
allra hreppa og kvenfélaga í
uppsveitum Árnessýslu, auk
fleiri hópa, eins og leikdeildar
Umf. Bisk o.fl. Var þetta hin
skemmtilegasta samkoma og
öllum til sóma.
Kvenfélagskonur drifu sig í
sumarbústaðarferð að Gljúfri í
Ölfusi síðustu helgina í febrúar og nutu þar lífsins
við spjall, veislumat og pottferðir. Síðari nóttina
kyngdi niður mesta snjó vetrarins, en það kom
ekki að sök, því konur voru vel búnar skóflum
og allar komust heim. Sundlaugar Hveragerðis
voru vel nýttar um helgina, Kvennabókasafnið á
Eyrabakka heimsótt og matnum á Heilsuhælinu
gerð góð skil. Hin besta helgi.
Hveragerðisþemað hélt áfram viku síðar, þegar
konur fjölmenntu í leikhúsferð til Hveragerðis
og sáu leikritið „Naktir í náttúrunni“ í byrjun
mars. Góð skemmtun og ekki spilltu fyrir góðar
veitingar á Menam á Selfossi fyrir sýningu.
Kvenfélagið sá um fimm erfidrykkjur á árinu
2016, sem er með meira móti. Ágóðinn af þeim
mun skila sér aftur til samfélagsins í formi
styrkja til ýmissa verkefna. Á síðasta ári styrkti
Kvenfélagið m.a.:
Leikskólann, með lestrarverkefninu „Lubbi finnur
málbein“ (kr 45.850), Kvikmynd vegna 100 ára
kosningaréttar kvenna, (100.000), hoppukastala
á Tvær úr Tungunum (62.000), Þjóðhátíðarnefnd
(50.000) o.m.fl.
Lausleg áætlun á sjálfboðavinnu kvenfélagskvenna
í þágu samfélagsins síðasta starfsár, er um 1511
klst, fyrir utan fundarsetu og almenn félagsstörf.
Kvenfélagið óskar lesendum Litla-Bergþórs
gleðilegs sumars með þökk fyrir samstarfið í
vetur.
Agnes Geirdal formaður.
Sigrún Elfa skefur af bílnum fyrir heimferð úr sumarbústaðnum.