Litli Bergþór - 01.07.2017, Blaðsíða 51
ar ég nálgast og leyfir mér að halda á sér og klappa
sér þegar hinar hænurnar garga, ýfa fjaðrir og stél
og flýta sér burt.
Svo er það kýrin Skrauta. Skrauta er uppáhalds
kýrin mín. Hún er yndisleg með stóru augun sín.
„Hún Skrauta grætur“ segi ég eitt sinn við
pabba. „Hún veit að þú ætlar að senda kálfinn
hennar í sláturhúsið“
„Vitleysa, dýr gráta ekki“ svarar pabbi
ákveðinn. „Ætli hún hafi ekki bara fengið eitthvað
í augað.“
En þó að pabbi sé næstum því alvitur þá hefur
hann rangt fyrir sér með Skrautu. Hún grætur
af sorg. Um það er ég ekki í nokkrum vafa.
Þegar kálfarnir eru teknir frá henni renna tárin
í stríðum straumum og ég græt með henni. Á
góðviðrisdögum legg ég mig ofan á Skrautu.
Henni dettur ekki í hug að hreyfa sig þegar ég
kem skokkandi, klóra henni á bakvið eyrun og
leggst svo á mjúkan belginn. Stundum sofna ég
og vakna löngu seinna og þó að allar kýrnar hafi
fært sig um set þá liggur Skrauta alveg grafkyrr
og jórtrar. Hún stendur ekki upp fyrr en ég vakna
og skríð af hlýju fletinu.
Svo leggst ábyrgðin á litlar herðar. Ég þarf að
byrja morguninn á að sækja kýrnar, gefa kálf-
unum, hænunum eða heimalningunum.
Mér finnst samt ekkert leiðinlegt að sækja
kýrnar. Ekki þegar ég er nógu gömul og get farið
að sækja þær ein. Þá vakna ég líka ein á undan
öllum og fyrr en hinir þurfa að gera, af því að ég
er svo mikill sveimhugi, að það tekur mig mun
lengri tíma að reka þær heim í fjós. Mamma
segir að ástæðan sé sú að ég vilji aldrei slá í
kýrnar en bíði bara eftir að þær lalli sér af stað
aftur ef þær stoppa. Kannski er það ein ástæðan,
enda er Skrauta mín yfirleitt síðust og hvernig
í ósköpunum á ég að fá mig til að slá í bestu
vinkonu mína. Við erum aldrei með prik, en rífum
upp njóla eða brjótum fúnar greinar af trjánum. Ég
nota þessi tól ekki mikið nema til að sveifla þeim
í kringum mig. Ég syng líka stanslaust og þarna
get ég sungið fullum hálsi, allavega á meðan ég er
nógu langt frá bænum og enginn að abbast upp á
mig. Stundum tala ég bara við fuglana, kýrnar og
sjálfa mig.
Svo taka hin morgunverkin við og þá verð ég
að fara út úr mínum dásamlega draumaheimi inní
raunveruleikann.
Litli-Bergþór 51
Leiðréttingar
Mistök voru gerð við vinnslu eftirfarandi atriða í
1. og 2. tbl. síðastliðins árs.
1. tölublað, júlí 2016:
bls. 8 – Rangt farið með fæðingardag. Guðbjörg
Kristjánsdóttir á Ekru, f. 15.08.1940
2. tölublað, desember 2016:
bls. 13 – Rangt farið með fæðingardag. Guðrún
Björk Þrastardóttir á Birkiflöt, f 28.07.1969
bls. 20 – Rangt nafn á mynd.
Á meðfylgjandi mynd eru f.v. Hallur Sighvatsson
Miðhúsum, Bryndís Malmo Bjarnadóttir Helgastöðum,
Kristján Ágúst Njarðarson Brattholti og Stella Björk
Guðjónsdóttir Reykjavöllum.
Blaðið biður þetta fólk velvirðingar á mistökunum.