Skessuhorn - 25.11.2015, Side 36

MIÐVIKUDAGUR 25. NÓVEMBER 201536
Skeifunni 3h ll Sími: 588 5080 ll dynjandi.is
Fallvarnar-
búnaður
Hjá Dynjanda færðu fallvarnarbúnað
sem uppfyllir ströngustu kröfur.
Hafðu samband. Við veitum þér faglega aðstoð.
Áslaug Þorsteinsdóttir hefur starf-
að í Fjöliðjunni á Akranesi í tæpa tvo
áratugi. Hún er bæði samviskusöm
og dugleg, enda var hún valin starfs-
maður ársins hjá Akraneskaupstað
fyrir árið 2014. Áslaug, sem er 39 ára
gömul, hefur búið á Skaganum meira
en helming ævi sinnar en hún ólst upp
á Skálpastöðum í Lundarreykjadal í
Borgarfirði. „Ég flutti fyrst á Akra-
nes til að fara í fjölbraut, þá leigði ég
mér bara herbergi úti í bæ,“ segir Ás-
laug í samtali við Skessuhorn. Hún
ílengdist á Skaganum og segir það
fyrst og fremst hafa verið vegna vin-
anna sem hún hafi þar eignast. „Ég
prófaði að búa aðeins í Reykjavík á
meðan ég var í Iðnskólanum að læra
fatasaum en það átti ekki við mig að
vera í borginni, þannig að ég flutti
aftur á Akranes,“ segir hún. Í Fjöl-
iðjunni starfar Áslaug mest í dósam-
óttökunni. „Mér líkar það mjög vel.
Stundum er samt svolítil bensínlykt
af dósunum og hún fer í taugarnar á
mér. En það er gott að vinna í Fjöl-
iðjunni og ég á marga vini þar.“
Kósý á Skaganum
Áslaug flutti í íbúð á vegum Ör-
yrkjabandalagsins árið 2004 og býr
þar enn. Hún hugsar um sig sjálf
og líkar vel að búa ein. „Mér finnst
gott að búa ein, það er voða kósý
að búa á Skaganum. Ef ég verð ein-
mana, þá bara finn ég mér eitthvað
að gera. Ég nýti kvöldin til að kíkja á
Facebook, fylgist með því hvað aðr-
ir eru að gera og ég perla aðeins á
daginn ef ég er í stuði til þess og ef
ég hef tíma,“ segir hún. Áslaug fer
allra sinna ferða á hjóli, sama hvern-
ig viðrar. Hún fær svo aðstoð frá lið-
veislu ef eitthvað meira stendur til.
„Liðveislan mín kemur yfirleitt einu
sinni í viku og við gerum eitthvað
skemmtilegt saman, förum í bíó eða
til Reykjavíkur. Annars nota ég hjól-
ið, bæði til að fara í vinnuna, á æf-
ingar eða út í búð,“ segir hún. Ás-
laug á kærasta sem býr í næsta húsi
við hana. Það er Guðmundur Örn
Björnsson, kallaður Addi. Þau hafa
verið saman í fimmtán ár, með hlé-
um. „En við erum búin að þekkjast
í 28 ár. Mér finnst ég samt stundum
einhleyp af því að ég bý ein,“ segir
hún brosandi.
Mikil hestakona
Áslaug er mikill dýravinur og á tvö
dýr, gárann Tinna og hryssuna
Stemmu. Hún er mikil hestakona og
safnar öllu sem tengist hestum, bæði
styttum og öðru skrauti. „Ég fékk
fyrsta hestinn þegar ég var ellefu ára
gömul, tryppi sem mamma og pabbi
áttu. Ég elska nærveruna við hest-
ana og svo verða þeir svo miklir vinir
manns,“ segir Áslaug. Stemmu hefur
hún átt síðan 2002. „Ég er í hestaí-
þróttunum á sumrin, bara fyrir mig.
Þá fæ ég Stemmu í hesthús hing-
að á Akranes. Við erum góðar vin-
konur og ég fer oft á henni út á El-
ínarhöfða, mér líkar vel við þá leið.“
Stemma fer svo í sveitina yfir vetrar-
tímann og þá taka önnur verkefni við
hjá Áslaugu. Í skammdeginu æfir hún
íþróttir og stundar félagsstarfið að
Kirkjubraut 40, þar sem hún föndrar.
„Ég æfi bæði sund og boccia á vet-
urna. Ég keppti í sundi um daginn
og bætti mig í báðum greinunum,“
segir Áslaug sem er liðtæk sundkona
og hefur meðal annars unnið til gull-
verðlauna á Special Olympics.
Perlusaumur í
uppáhaldi
Áslaug er handlagin. Hún bæði teikn-
ar, prjónar og stundar perlusaum.
„Svo er ég nýbúin að læra að hekla.
Ég teiknaði líka þegar ég var yngri en
geri minna af því í dag. Kannski helst
skrípamyndir af vinnufélögunum,“
segir Áslaug og skellir upp úr. Hún
selur svo handverkið sem hún gerir í
föndrinu. „Við vorum til dæmis með
basar um daginn og þá lét ég ágóð-
ann renna í styrktar- og minningar-
sjóð Lovísu Hrundar. En núna fer ég
að gera eitthvað jólaföndur, ég reyni
alltaf að gera eitthvað jólaskraut. Svo
gef ég eitthvað af því í jólagjöf,“ segir
hún og brosir. Áslaug segist þó hafa
mest gaman af perlusauminum, hest-
unum og að vera í vinnunni yfir vetr-
artímann. „Mér finnst mjög gam-
an að vera í dósunum. Ég hlusta líka
mikið á tónlist, þá aðallega popptón-
list. Í mestu uppáhaldi eru Madonna,
Kim Larsen, Stuðmenn, David Bo-
wie og UB40,“ heldur Áslaug áfram.
Er jólabarn
Áslaug er jólabarn og hlakkar til að-
ventunnar sem nú fer í hönd. Fram-
undan er innanfélagsmót hjá Þjóti í
desember, þar sem hún mun keppa
í boccia en annars verður jólaund-
irbúningurinn í algleymingi. „Ég
baka alltaf tvær til þrjár sortir fyr-
ir jólin, mér finnst piparkökur best-
ar því það kemur svo góð lykt af
þeim,“ segir Áslaug sem ver jólun-
um í faðmi fjölskyldunnar í Reykja-
vík. „Ég er alltaf hjá systur minni
á jólunum og kem svo aftur upp á
Skaga því ég vinn alltaf á milli jóla
og nýárs. Ég veit svo ekki hvað
ég geri um áramótin núna, það er
óráðið,“ segir Áslaug Þorsteins-
dóttir að endingu.
grþ
Finnst skemmtilegast í
vinnunni yfir veturinn
Áslaug Þorsteinsdóttir.
Áslaug og Stemma eru góðar vinkonur,
enda hefur Áslaug átt Stemmu í 13 ár.
Hluti af handverki Áslaugar. Munina selur hún, gefur eða geymir fyrir sig sjálfa.
Leikandi
jólagjöf
Gjafakort í Þjóðleikhúsið gleður
unga sem aldna, enda ávísun á
upplifun og ævintýri.
Hafðu samband við miðasölu
Þjóðleikhússins í síma 551 1200
eða á midasala@leikhusid.is
Töfrastund sem gleymist seint.
19
50
-
20
15
ÞJ
Ó
Ð
LE
IK
H
Ú
SI
Ð
65