Litli Bergþór - Dec 2018, Page 7

Litli-Bergþór 7
Þemað á Krummakletti í vetur hefur verið: „Ég
sjálfur - fjölskyldan og samfélagið”. Við leggjum
áherslu á hugtökin „ég sjálf/ur og umhverfið mitt
og ég sjálf/ur og líkami minn". Við höfum verið
að vinna með ýmsar spurningar t.d.: Hver er ég?
Hvað heiti ég? Hver er fjölskyldan mín? Hvað heita
mamma og pabbi? Hvernig er leikskólinn minn
og nánasta umhverfi? Hvað er vinur? Við höfum
líka unnið verkefni sem tengjast líkamanum, lært
líkamsheiti, skoðað bækur og fjallað um hvernig
líkaminn starfar. Við höfum farið í vettvangsferðir
einu sinni í viku. Þær eru hluti af menningu og
samfélagsnámi barnanna. Í vettvangsferðum
læra börnin að taka tillit til umhverfisins og
bera virðingu fyrir því. Markmið vettvangsferða
eru: að víkka sjóndeildarhringinn og að kynnast
nánasta umhverfi og náttúru. Krummaklettar eru
uppáhaldsstaður barnanna og eru þau dugleg að
skapa sinn eigin heim út í náttúrunni. Þau hafa
fundið tröllhest sem hefur breyst í stein, búið til
sögu um gullkistu sem grafin er í holtinu, fundið
hella og álfasteina og margt fleira. Við fullorðna
fólkið skiljum sjaldnast leikinn - hann hefur
ekki endilega upphaf né enda, heldur er hann
hringur sem heldur endalaust áfram og þau ráða
algjörlega för sjálf. Eftir vettvangsferðir fjöllum
við um hvað við sáum og gerum ýmis verkefni
t.d. erum við að búa til hverfið okkar, við málum
götur, búum til hús og fleira. Í lok október flutti
Krummaklettadeildin út í Bergholt. Þar líður
okkur mjög vel og við hlökkum til að takast á við
fleiri verkefni.
Guðbjörg Gunnarsdóttir
Deildarstjóri á Krummakletti.
Fréttir frá Krummakletti
eldri deild leikskólans